ອົງການອະນາໄມໂລກເຕືອນ ຢ່າບອກວ່າ ໂອມິຄຣອນ ບໍ່ຮຸນແຮງ ພົບ 90% ຂອງຜູ້ຕິດເຊື້ອອາການໜັກຍ້ອນບໍ່ໄດ້ສັກວັກຊີນ
ຜູ້ອຳນວຍການອົງການອະນາໄມໂລກເຕືອນ ຢ່າບອກວ່າໂຄວິດສາຍພັນໂອມິຄຣອນບໍ່ຮຸນແຮງ ເພາະມີຜູ້ຕິດເຊື້ອອາການໜັກ ແລະ ເສຍຊີວິດຈາກສາຍພັນນີ້ຢູ່. ຂະນະທີ່ຂໍ້ມູນຫລ້າສຸດຊີ້ ຜູ້ຕິດເຊື້ອອາການໜັກ 90% ເປັນກຸ່ມຄົນທີ່ບໍ່ໄດ້ສັກວັກຊີນ.
ວັນທີ 7 ມັງກອນ 2022, ສຳນັກຂ່າວຣອຍເຕີ ລາຍງານອ້າງການຖະແຫລງຂ່າວຂອງທ່ານ ທີໂດຣສ ອັດຮານອມ ກີບຣີເຍຊຸສ ຜູ້ອຳນວຍການໃຫຍ່ອົງການອະນາໄມໂລກ ເມື່ອວັນທີ 6 ມັງກອນ ທີ່ລະບຸວ່າ: ເຖິງວ່າໄວຣັສໂຄວິດສາຍພັນໂອມິຄຣອນຈະເບິ່ງຄືມີຄວາມຮຸນແຮງໜ້ອຍກວ່າສາຍພັນເດວຕາ ໂດຍສະເພາະກັບຄົນທີ່ໄດ້ຮັບວັກຊີນແລ້ວ, ແຕ່ນັ້ນບໍ່ໄດ້ໝາຍຄວາມວ່າ ສາຍພັນໂອມິຄຣອນບໍ່ຮຸນແຮງ.
ຜູ້ອຳນວຍການໃຫຍ່ອົງການອະນາໄມໂລກ ເນັ້ນວ່າ: ໃນທ້າຍທີ່ສຸດແລ້ວ ໄວຣັສໂຄວິດສາຍພັນໂອມິຄຣອນກໍຄືກັບໄວຣັສໂຄວິດສາຍພັນກ່ອນໜ້າ ທີ່ເຮັດໃຫ້ມີຜູ້ຕິດເຊື້ອອາການໜັກເຂົ້າໂຮງໝໍ ລວມທັງມີຜູ້ເສຍຊີວິດຈາກການຕິດເຊື້ອນີ້ຢູ່ດີ. ພ້ອມເຕືອນເຖິງທ່າອ່ຽງການແພ່ລະບາດລະຫວ່າງສາຍພັນໂອມິຄຣອນ ແລະ ເດວຕາພ້ອມກັນ ທີ່ຈະເຮັດໃຫ້ເກີດຜູ້ຕິດເຊື້ອຈຳນວນຫລາຍຢ່າງວ່ອງໄວ ເປັນຄືສຶນາມິໂຄວິດທີ່ຈະສົ່ງຜົນກະທົບຕໍ່ລະບົບສາທາລະນະສຸກຂອງປະເທດຕ່າງໆ.
ອົງການອະນາໄມໂລກເປີດເຜີຍວ່າ: ຂໍ້ມູນການຕິດເຊື້ອຫລ້າສຸດທົ່ວໂລກ ພົບວ່າມີຈຳນວນຜູ້ຕິດເຊື້ອໂຄວິດເພີ່ມຂຶ້ນ 71% ໃນອາທິດຜ່ານມາ. ຂະນະທີ່ອັດຕາຜູ້ຕິດເຊື້ອຮຸນແຮງຈາກໂຄວິດ-19 ຕອນນີ້ 90% ເປັນກຸ່ມຄົນທີ່ບໍ່ໄດ້ສັກວັກຊີນ.
ທ່ານ ທີໂດຣສ ຍັງເນັ້ນໃນການຖະແຫລງຂ່າວຫລ້າສຸດເຖິງຂໍ້ຮຽກຮ້ອງການເຂົ້າເຖິງວັກຊີນປ້ອງກັນໂຄວິດຢ່າງເທົ່າທຽມທົ່ວໂລກ ໂດຍຊີ້ວ່າການທີ່ບາງປະເທດສັກວັກຊີນກະຕຸ້ນເປັນເຂັມທີສາມ ຈະບໍ່ຊ່ວຍຢຸດການລະບາດຂອງໂຄວິດ-19 ໄດ້ ຕາບໃດທີ່ຍັງມີປະຊາກອນຫລາຍພັນລ້ານຄົນຍັງບໍ່ໄດ້ສັກວັກຊີນ. ພ້ອມສະແດງຄວາມກັງວົນເຖິງເປົ້າໝາຍຂອງອົງການອະນາໄມໂລກທີ່ຕ້ອງສັກວັກຊີນປ້ອງກັນໂຄວິດໃຫ້ປະຊາກອນ 70% ທົ່ວໂລກພາຍໃນເດືອນກັນຍານີ້ວ່າ ອາດມີສູງເຖິງ 109 ປະເທດທີ່ເຮັດບໍ່ໄດ້ຕາມເປົ້າໝາຍນີ້.
ອ້າງອີງ:
https://www.channelnewsasia.com/…/omicron-may-be-less…
https://www.bbc.com/news/world-59901547
