ດ່ານພາສີສາກົນຂົວມິດຕະພາບ III ແຂວງຄຳມ່ວນ ເກັບລາຍຮັບປີ 2021 ໄດ້ 275 ຕື້ກີບ ບໍ່ບັນລຸຄາດໝາຍ
ດ່ານພາສີສາກົນຂົວມິດຕະພາບ III ແຂວງຄຳມ່ວນ, ໄດ້ຮັບຕົວເລກແຜນການງົບປະມານແຫ່ງລັດໃນປີ 2021 ຈຳນວນ 337 ຕື້ກວ່າກີບ, ແຕ່ສຳລັບການຈັດຕັ້ງປະຕິບັດຕົວຈິງໝົດປີສາມາດປະຕິບັດໄດ້ 275 ຕື້ກວ່າກີບ ຫຼື ເທົ່າກັບ 81,61% ຂອງແຜນການປີ.
ທ່ານ ບຸນທະນົງສັກ ເທບພະລັກ ຫົວໜ້າດ່ານພາສີສາກົນຂົວມິດຕະພາບ III ໃຫ້ສໍາພາດວ່າ: ດ່ານພາສີສາກົນຂົວມິດຕະພາບ III ແມ່ນການຈັດຕັ້ງໜຶ່ງຂອງກົມພາສີ ກະຊວງການເງິນ ທີ່ປະຈຳການຢູ່ຊາຍແດນ, ຊຶ່ງພາຍໃຕ້ການຄຸ້ມຄອງກວດກາ-ກວດກາຂອງກົມພາສີໂດຍສະເພາະແມ່ນພາສີປະຈຳແຂວງຄຳມ່ວນ, ການນຳພາດ້ານແນວຄິດ-ການເມືອງດ່ານພາສີສາກົນຂົວມິດຕະພາບ III ເປັນຄະນະໜ່ວຍພັກ, ດ້ານການຈັດຕັ້ງ ແລະ ພະນັກງານ ປະ ກອບມີ 03 ກຸ່ມງານ, 01 ເຂດເສດຖະກິດສະເພາະ, 01 ດ່ານພາສີທ້ອງຖິ່ນ, 03 ດ່ານພາສີປະເພນີ, ມີສາງຄ່ຽນຖ່າຍສິນຄ້າ 04 ບ່ອນ, ປະກອບມີພະນັກງານ-ເຈົ້າໜ້າທີ່ພາສີທັງໝົດ 38 ທ່ານ.
ດ້ານວິຊາສະເພາະດ່ານພາສີສາກົນຂົວມິດຕະພາບ III ໄດ້ຮັບຕົວເລກມອບໝາຍຈັດເກັບລາຍຮັບເຂົ້າງົບປະມານແຫ່ງລັດຈຳນວນ 337 ຕື້ກວ່າກີບ, ແຕ່ຜ່ານການຈັດຕັ້ງປະຕິບັດຕົວຈິງໝົດປີ 2021 ປະຕິບັດໄດ້ 275 ຕື້ກວ່າກີບ ຫຼື ເທົ່າກັບ 81,61% ຂອງແຜນການປີ.
ສາເຫດທີ່ພາໃຫ້ຈັດເກັບລາຍຮັບບໍ່ບັນລຸຕາມແຜນການທີ່ວາງໄວ້, ເນື່ອງຈາກສະພາບການແຜ່ລະບາດຂອງພະຍາດໂຄວິດ-19 ເປັນວົງກວ້າງຊຶ່ງເປັນອຸປະສັກ ແລະ ສິ່ງທ້າທາຍຕໍ່ການຈັດເກັບລາຍຮັບເຂົ້າງົບປະມານແຫ່ງລັດ, ການເຂົ້າ-ອອກຂອງພາຫະນະມີການຫຼຸດລົງລວມເຖິງສິນຄ້າປະເພດຕ່າງໆກໍ່ຫຼຸດລົງ, ສິນຄ້ານຳເຂົ້າເພື່ອສົ່ງອອກເປັນ ຕົ້ນ: ສິນຄ້າປະເພດກະທິງແດງຫຼຸດລົງ, ການນຳເຂົ້ານໍ້າມັນເຊື້ອໄຟຫຼຸດລົງ ແລະ ລວມເຖິງການເຄື່ອນຍ້າຍມາຈາກຕ່າງແຂວງ.
ສະນັ້ນ, ເພື່ອຮັບປະກັນໃນການຈັດຕັ້ງປະຕິບັດການຈັດເກັບລາຍຮັບໃນຕໍ່ໜ້າໃຫ້ບັນລຸຕາມແຜນທີ່ວາງໄວ້ ຈະໄດ້ເອົາໃຈໃສ່ສຶກສາອົບຮົມວຽກງານການເມືອງແນວຄິດ ໃຫ້ແກ່ພະນັກງານ-ເຈົ້າໜ້າທີ່ພາສີພາຍໃນດ່ານ, ປຸກ ລະດົມຜູ້ປະກອບການພາກທຸລະກິດໃຫ້ເຂົາເຈົ້າມາໃຊ້ບໍລິການດ່ານໃຫ້ຫຼາຍຂຶ້ນ, ປະສານສົມທົບກັບພາກສ່ວນກ່ຽວຂ້ອງ, ອຳນວຍຄວາມສະດວກດ້ານການຄ້າໃຫ້ສອດຄ່ອງ, ວ່ອງໄວ ທັງຮັບປະກັນຕໍ່ການຈັດເກັບລາຍຮັບເຂົ້າງົບປະມານເພີ່ມຂຶ້ນ.
ຄຽງຄູ່ກັນນັ້ນ, ໄດ້ປະຕິບັດຄຳສັ່ງເລກທີ 18/ນຍ ລົງວັນທີ 16 ກັນຍາ 2021 ວ່າດ້ວຍການເພີ່ມທະວີຄຸ້ມຄອງການຮົ່ວໄຫລຂອງງົບປະມານແຫ່ງລັດ ແລະ 07 ມາດຕະການຈັດເກັບລາຍຮັບໃນປີ 2022 ແລະ 06 ທິດທາງ, ແຜນການຈັດຕັ້ງປະຕິບັດວຽກງານໃນປີ 2022 ໃຫ້ມີຄວາມເຂັ້ມງວດ ແລະ ນິຕິກໍາອື່ນໆນໍາອີກ.
