67 ປີອົງການກາແດງແຫ່ງຊາດລາວ ເອົາໃຈໃສ່ຊ່ວຍເຫລືອສັງຄົມ
ອົງການກາແດງແຫ່ງຊາດລາວແມ່ນການຈັດຕັ້ງທາງສັງຄົມຂອງ ສປປ ລາວ ສ້າງຕັ້ງຂຶ້ນໃນວັນທີ 1 ມັງ ກອນ 1955 ຊຶ່ງປີນີ້ເປັນປີຄົບຮອບ 67 ປີ(01/01/1955-01/01/2022)ໂດຍຜ່ານມາໄດ້ເຄື່ອນໄຫວວຽກ ງານມະນຸດສະທຳຢ່າງເປັນເອກະລາດ ຢູ່ພາຍໃຕ້ລັດຖະທຳມະນູນ, ກົດໝາຍ ແລະ 7 ຫຼັກການພື້ນຖານຂອງຂະບວນການກາແດງ ແລະ ຊີກວົງເດືອນແດງສາກົນ, ມີພາລະບົດບາດສ້າງ ແລະ ສົ່ງເສີມຄຸນຄ່າດ້ານມະນຸດສະທຳເປັນຕົ້ນການຊ່ວຍເຫຼືອບັນເທົາທຸກເບື້ອງຕົ້ນ; ການປຸກລະດົມຂົນຂວາຍບໍລິຈາກເລືອດ ແລະ ສະໜອງເລືອດທີ່ປອດໄພ; ການສົ່ງເສີມສຸຂະພາບຂັ້ນພື້ນຖານ; ການປະຖົມພະຍາບານ; ການກູ້ໄພສຸກເສີນ; ການໂຄສະນາຂົນຂວາຍແຫຼ່ງທຶນ; ການສ້າງສະມາຊິກ ແລະ ອາສາສະໝັກກາແດງ; ການສືບທາວຫາຍາດພີ່ນ້ອງ; ການພົວພັນ ແລະ ຮ່ວມມືສາກົນ.
ຕະຫຼອດ 67 ປີຜ່ານມາ ໂດຍການຮ່ວມມືຈາກອົງການປະສານສົມທົບກໍ່ຄືບັນດາກະຊວງ, ອົງການ, ອົງ ການປົກຄອງ ແລະ ຄູ່ຮ່ວມມືສາກົນ, ຄະນະນໍາອົງການກາແດງລາວແຕ່ລະໄລຍະແຕ່ລະສະໄໝ ໄດ້ປັບ ປຸງການຈັດຕັ້ງ ແລະ ພາລະບົດບາດຂອງຕົນ ເຮັດໃຫ້ສາມາດປັບເຂົ້າກັບສະພາບການໃໝ່ ແລະ ສືບຕໍ່ເຮັດໜ້າທີ່ການເມືອງຂອງຕົນ, ສາມາດໂຄສະນາດຶງດູດເອົາກຳລັງຂອງສັງຄົມ, ມະຫາຊົນ, ປະຊາຊົນ, ສ້າງອາສາສະໝັກຊາວໜຸ່ມກາແດງເຂົ້າຮ່ວມໃນຂະບວນການວຽກງານກາແດງ ໄດ້ດີສົມຄວນ. ຮອດປັດ ຈຸບັນຂະຫຍາຍການຈັດຕັ້ງລົງຮອດທ້ອງຖິ່ນຮາກຖານ, ມີຫ້ອງການກາແດງແຂວງ 17 ແຂວງ, 1 ນະ ຄອນຫຼວງ ແລະ ກາແດງເມືອງ 56 ເມືອງ ສ່ວນເມືອງທີ່ບໍ່ມີເງື່ອນໄຂ ມີຜູ້ປະສານງານກາແດງເມືອງ, ທົ່ວປະເທດມີພະນັກງານ 546 ຄົນ, ຍິງ 274 ຄົນ; ໄດ້ເຄື່ອນໄຫວວຽກງານມະນຸດສະທຳຢ່າງຕັ້ງໜ້າ, ໄດ້ພັດທະນານິຕິກຳກ່ຽວຂ້ອງຫຼາຍສະບັບເປັນຕົ້ນດຳລັດກ່ຽວກັບການຈັດຕັ້ງ ແລະ ການເຄື່ອນໄຫວຂອງອົງການກາແດງລາວ, ກົດໝາຍວ່າດ້ວຍວຽກງານກາແດງລາວ, ແຜນຍຸດທະສາດວຽກງານກາແດງລາວ, ແຜນປະຕິບັດງານ 5 ປີ; ໄດ້ຊ່ວຍລັດຖະບານໃນການແກ້ໄຂບັນເທົາທຸກເບື້ອງຕົ້ນຜູ້ປະສົບໄພຕ່າງໆ, ສະໜອງເລືອດປອດໄພຕໍ່ລົມຫາຍໃຈແກ່ຄົນເຈັບທີ່ຂາດເລືອດ, ຊ່ວຍກູ້ໄພຜູ້ເຄາະຮ້າຍຈາກອຸບັດເຫດ ຫຼື ໄພ ສຸກເສີນອື່ນໆ, ຂະຫຍາຍສູນບໍລິການເລືອດທົ່ວປະເທດ ໃນນີ້ຢູ່ສູນກາງ 1 ແຫ່ງ, ສູນເລືອດແຂວງ 17 ແຫ່ງ ແລະ ໜ່ວຍເກັບຮັກສາເລືອດຂັ້ນເມືອງ 31 ແຫ່ງ ສາມາດຕອບສະໜອງເລືອດຕາມຄາດໝາຍທີ່ສະພາແຫ່ງຊາດກຳນົດໃຫ້, ມີໜ່ວຍກູ້ໄພສຸກເສີນປະຈຳຢູ່ນະຄອນຫຼວງ ແລະ ຢູ່ 5 ແຂວງ, ມີໜ່ວຍວິຊາ ການປະຖົມພະຍາບານ, ໜ່ວຍບໍລິການນໍ້າສຸກເສີນ, ຄູຝຶກຕອບໂຕ້ໄພພິບັດ, ໜ່ວຍຕອບໂຕ້ການລະບາດ ພະຍາດໂຄວິດ-19, ມີອາສາສະໝັກທັງໝົດ: 56.214 ຄົນ, ຍິງ 10.214 ຄົນ ເປັນຕົ້ນ ອາສາສະໝັກບໍ ລິຈາກເລືອດ, ກູ້ໄພ, ປະຖົມພະຍາບານ ແລະ ຕອບໂຕ້ການລະບາດພະຍາດໂຄວິດ-19 ຢູ່ແຕ່ລະແຂວງ ແລະ ບາງເມືອງ.
ສະເພາະປີ 2021, ວຽກງານພົ້ນເດັ່ນໄດ້ຂົນຂວາຍແຫຼ່ງທຶນການຊ່ວຍເຫຼືອຈາກສັງຄົມ ແລະ ສາກົນ, ປຸກລະດົມພະນັກງານ ແລະ ອາສາສະໝັກກາແດງຕະລຸມບອນ ເຂົ້າໃນຕ້ານໄພນ້ຳຖ້ວມ,ຕ້ານການລະບາດພະຍາດໂຄວິດ-19, ໄດ້ແຈກຢາຍເຄື່ອງບັນເທົາທຸກໃຫ້ແກ່ຜູ້ປະສົບໄພທຳມະຊາດ ແລະຜູ້ຖືກຜົນກະທົບຈາກພະຍາດໂຄວິດ-19 ສະແດງອອກຄື ຊ່ວຍເຫຼືອບັນເທົາທຸກຜູ້ທີ່ໄດ້ຮັບຜົນກະທົບຈາກໄພທຳມະຊາດ 65 ເມືອງ, 420 ບ້ານ, 13.016 ຄອບຄົວ, 73.729 ຄົນ, ຍິງ 39.700 ຄົນ ລວມມູນຄ່າ: 7.468.693.000 ກີບ; ຂົນຂວາຍບໍລິຈາກເລືອດໄດ້ 57.979 ຖົງ; ລະດົມທຶນປະກອບສ່ວນໃນການປ້ອງກັນ, ຄວບຄຸມ ແລະ ແກ້ໄຂການລະບາດພະຍາດໂຄວິດ-19 ລວມມູນຄ່າ 8.217.328.625 ກີບ,ມີ ຜູ້ໄດ້ຮັບຜົນປະໂຫຍດ 129.237 ຄົນ, ຍິງ 72.017 ຄົນ; ຂົນຂວາຍການສະໜັບສະໜູນອຸປະກອນປ້ອງກັນຕົນເອງ, ອຸປະກອນການແພດ, ວັກຊີນ ແລະ ເຄື່ອງກວດຫາເຊື້ອໂຄວິດ-19 ແບບໄວຈາກກາແດງສາ ກົນ ແລະ ກາແດງເພື່ອນມິດ…ສະໜອງໃຫ້ກະຊວງສາທາລະນະສຸກ ແລະ ປະຊາຊົນທີ່ຖືກຜົນກະທົບຈາກ ພະຍາດໂຄວິດ-19.
