ກຳປູເຈຍ-ອິນໂດເນເຊຍ ປຶກສາຫາລື ກ່ຽວກັບການຮ່ວມມືອາຊຽນ-ສະພາບການ ຢູ່ມຽນມາ
ຕາມຂ່າວຈາກ VOVWORLD, ເມື່ອບໍ່ດົນມານີ້, ກະຊວງ ການຕ່າງປະເທດ ແລະ ຮ່ວມມືສາກົນ ກຳປູເຈຍ ໃຫ້ຮູ້ວ່າ: ທ່ານ ຮຸນເຊນ ນາຍົກ ລັດຖະມົນຕີ ກຳປູເຈຍ ໄດ້ມີ ການເຈລະຈາ ຜ່ານທາງໂທລະສັບ ກັບ ທ່ານ ໂຈໂກ ວີໂດໂດ ປະທານາທິບໍດີ ອິນໂດເນເຊຍ ເພື່ອປຶກສາຫາລື ກ່ຽວກັບ ການຮ່ວມມື ໃນຂອບເຂດ ອາຊຽນ ແລະ ສະພາບການ ດ້ານການເມືອງ ຢູ່ ມຽນມາ. ຈາກນັ້ນ ທ່ານ ໂຈໂກ ວີໂດໂດ ຢັ້ງຢືນວ່າ ຈະໃຫ້ການ ໜູນຊ່ວຍ ຢ່າງສຸດຂີດ ເພື່ອໃຫ້ ກຳປູເຈຍ ປະຕິບັດ ສຳເລັດບົດບາດ ເປັນປະທານ ອາຊຽນ 2022, ພ້ອມທັງ ເນັ້ນໜັກວ່າ ສິ່ງດັ່ງກ່າວ ຈະປະກອບສ່ວນ ສ້າງຜົນສຳເລັດ ໃຫ້ແກ່ ອິນໂດເນເຊຍ ເມື່ອປະເທດນີ້ ເປັນ ປະທານ ອາຊຽນ ໃນປີ 2023. ສ່ວນ ທ່ານ ຮຸນເຊນ ໄດ້ຕີລາຄາສູງ ຕໍ່ ອິນໂດເນເຊຍ ຍ້ອນມີ ຫລາຍຂໍ້ລິເລີ່ມ ປະກອບສ່ວນ ເຂົ້າໃນວິວັດ ການສ້າງ ປະຊາຄົມ ອາຊຽນ ຢ່າງເຂັ້ມແຂງ.
ນອກຈາກນັ້ນ, ຜູ້ນຳ ສອງປະເທດ ກໍໄດ້ແລກປ່ຽນ ທັດສະນະ ກ່ຽວກັບ ການຜັນແປ ໃນປັດ ຈຸບັນຢູ່ ມຽນມາ, ພ້ອມທັງ ເນັ້ນໜັກເຖິງ ຄວາມສຳຄັນ ຂອງການຊຸກຍູ້ ບັນດາ ຄວາມມານະ ພະຍາຍາມ ຂອງ ອາຊຽນ ໃນການ ໜູນຊ່ວຍ ມຽນມາ ຊອກຫາ ມາດຕະການ ແກ້ໄຂ ເໝາະສົມ ເພື່ອບັນລຸໄດ້ ຄວາມປອງ ດອງຊາດ, ສັນຕິພາບ ຍາວນານ, ສະຖຽນ ລະພາບ ແລະ ການພັດທະນາ ແບບຍືນຍົງ./.
