ຈຸດດຳເທິງຜັກທຽມແມ່ນເຊື້ອລາຫລືບໍ່ ແລະ ສ່ຽງເປັນມະເຮັງບໍ່ ?
ເຄີຍຈັບຜັກທຽມມາປຸງແຕ່ງອາຫານແລ້ວພົບຈຸດດຳໆເທິງຜັກທຽມຫລືບໍ່ ? ມັນແມ່ນເຊຶ້ອລາຫລືບໍ່ ? ປາດອອກແລ້ວເອົາມາປຸງແຕ່ງອາຫານໄດ້ຄືເກົ່າຫລືບໍ່ ? ອັນຕະລາຍຫລາຍໜ້ອຍປານໃດ ເລື່ອງນີ້ຈາກທີ່ມີການເຜີຍແຜ່ຂໍ້ມູນວ່າ ຮອຍສິນ້ຳຕານທີ່ພົບເທິງຜັກທຽມແມ່ນເຊື້ອລາ ເຊິ່ງສ່ວນຫລາຍເຊື້ອລາເຫລົ່ານີ້ເປັນເຊື້ອລາທີ່ມີພິດ ຫລື ສານກໍ່ມະເຮັງນັ້ນ ທາງສະຖາບັນມະເຮັງໄດ້ກວດສອບເລື່ອງດັ່ງກ່າວ ແລະ ພົບວ່າ : ຈຸດສີນ້ຳຕານ ຫລື ຈຸດສີດຳເທິງຜັກທຽມເກີດຈາກຮອບຊ້ຳຂອງຜັກທຽມ ສົ່ງຜົນໃຫ້ເຊື້ອລາຫລາກຫລາຍຊະນິດອາດປົນເປື້ອນ ຫລື ເຂົ້າໄປຈະເລີນເຕີບໃຫຍ່ຢູ່ໃນບໍລິເວນຮອຍຊ້ຳນັ້ນ ໂດຍມັກພົບໃນຜັກທຽມທີ່ມີການເກັບຮັກສາບໍ່ເໝາະສົມ ຫລື ເກັບໄວ້ເປັນເວລາດົນ.
ຈຸດດຳໃນຜັກທຽມເປັນສານກໍ່ມະເຮັງຫລືບໍ່ ? ຕາມທີ່ມີຂໍ້ກັງວົນວ່າເຊື້ອລາທີ່ຢູ່ເທິງຜັກທຽມອາດສ້າງສານພິດ ຫລື ສານກໍ່ມະເຮັງນັ້ນ ຈາກການສຶກສາຂໍ້ມູນການວິໄຈພົບວ່າ : ເຊື້ອລາ Aspergillus flavus ແລະ Aspergillus parasiticus ເປັນເຊື້ອລາທີ່ສາມາດສ້າງສານອະຟລາທັອກຊິນ ເຊິ່ງຈັດເປັນສານກໍ່ມະເຮັງໃນມະນຸດ. ແນວໃດກໍຕາມ, ປັດຈຸບັນຍັງບໍ່ມີຂໍ້ມູນຢັ້ງຢືນວ່າພົບສານອະຟລາທັອກຊິນບໍລິເວນຮອຍຈຸດນ້ຳຕານ ຫລື ຈຸດດຳເທິງຜັກທຽມ.
ສະຫລຸບກໍຄື : ຮອຍຈຸດສີນ້ຳຕານ ຫລື ຈຸດສີດຳເທິງຜັກທຽມແມ່ນຮອຍຊ້ຳ ຈຶ່ງສົ່ງຜົນໃຫ້ເຊື້ອລາ ຫລື ຈຸລິນຊີຊະນິດອື່ນໆປົນເປື້ອນເຂົ້າໄປຈະເລີນເຕີບໃຫຍ່ຢູ່ບໍລິເວນຮອຍຊ້ຳນັ້ນ ເຊິ່ງໃນປັດຈຸບັນຍັງບໍ່ມີການວິໄຈທີ່ລະບຸວ່າຮອຍຈຸດສີນ້ຳຕານເທິງຜັກທຽມນີ້ມີສານກໍ່ມະເຮັງ.
ປາດຮອຍດຳ ຫລື ຮອຍສີນ້ຳຕານອອກ ແລ້ວເອົາມາປຸງແຕ່ງເປັນອາຫານໄດ້ຫລືບໍ່ ? ຫາກພົບຮອຍຈຸດດຳ ຫລື ຈຸດສີນ້ຳຕານເທິງຜັກທຽມຄວນເອົາຖິ້ມ ຫລື ອາດປາດບໍລິເວນນັ້ນຖິ້ມ ແລະ ຄວນກິນຜັກທຽມທີ່ຜ່ານການປຸງແຕ່ງສຸກເພື່ອຫລຸດການປົນເປື້ອນຂອງຈຸລິນຊີຊະນິດອື່ນໆ ແລະ ແນະນຳໃຫ້ເລືອກຊື້ຜັກທຽມທີ່ສົດໃໝ່ຢູ່ໃນພາຊະນະບັນຈຸທີ່ສະອາດ, ບໍ່ມີລັກສະນະຂອງເສັ້ນໄຍ ແລະ ສະປໍຂອງເຊື້ອລາ, ການເກັບຮັກສາຄວນເກັບໄວ້ໃນບ່ອນແຫ້ງ, ບໍ່ອັບຊຸ່ມ ແລະ ບໍ່ເກັບໄວ້ດົນເກີນໄປ.
