ເຕືອນໄພ ດື່ມກາເຟຫລາຍເກີນໄປ ສ່ຽງສະໝອງເສື່ອມ
ຫລາຍຄົນທີ່ເປັນຄໍກາເຟ ອາດຈະຊື່ນຊອບໃນລົດຊາດ ແລະ ການໄດ້ຕື່ນໂຕສົດຊື່ນຫ້າວຫັນຈາກເຄື່ອງດື່ມລົດຊາດຂົມແຕ່ກິ່ນຫອມອຸ່ນໆທຸກເຊົ້າ, ແຕ່ການດື່ມກາເຟຫລາຍຈົນເກີນໄປ ອາດສົ່ງຜົນຮ້າຍຕໍ່ຮ່າງກາຍໄດ້ຄືກັນ.
ວຽກງານວິໄຈທີ່ເຜີຍແຜ່ຜ່ານເວັບໄຊ Nutritional Neuroscience ເມື່ອວັນທິ 24 ມິຖຸນາ 2021 ລະບຸວ່າ : ຄົນເຮົາບໍ່ຄວນດື່ມກາເຟຫລາຍກ່ວາ 5 – 6 ຈອກຕໍ່ມື້ ເພາະອາດທຳຮ້າຍສະໝອງໄດ້ ໂດຍລວບລວມຂໍ້ມູນຈາກຄົນປະມານ 400.000 ຄົນທີ່ດື່ມກາເຟເປັນປະຈຳ (ທັງແບບມີກາເຟອີນ ແລະ ແບບດີແຄັບ ບໍ່ມີກາເຟອີນ) ແບ່ງກຸ່ມທົດລອງອອກເປັນຫລາຍກຸ່ມ ທັງກຸ່ມທີ່ດື່ມຈອກດຽວ ໄປຈົນເຖິງກຸ່ມທີ່ດື່ມຫລາຍເຖິງ 6 ຈອກຕໍ່ມື້ ແລະ ເອົາຄົນປະມານ 18.000 ຄົນມາສະແກນສະໝອງຜ່ານເຄື່ອງ MRI .
ຫລັງຈາກຕິດຕາມຂໍ້ມູນຢູ່ດົນ 11 ປີ ນັກວິໄຈພົບວ່າ ເມື່ອປຽບທຽບກັບຄົນທີ່ດື່ມກາເຟໜ້ອຍກ່ວາ (1 – 2 ຈອກຕໍ່ມື້) ແລ້ວ ຄົນທີ່ດື່ມກາເຟຫລາຍ (ຫລາຍກ່ວາ 6 ຈອກຕໍ່ມື້) ມີຄວາມສ່ຽງທີ່ຈະມີຂະໜາດສະໝອງນ້ອຍລົງຫລາຍກ່ວາ ໂດຍສະເພາະສະໝອງພາກສ່ວນຮິບໂປແຄມປັສ Hippocampus ເຊິ່ງເປັນພາກສ່ວນທີ່ເຮັດໜ້າທີ່ຮັກສາຄວາມຊົງຈຳ ທັງໄລຍະສັ້ນ ແລະ ໄລຍະຍາວ.
ຄົນທີ່ດື່ມກາເຟຫລາຍຍັງມີຄວາມສ່ຽງຕໍ່ການຖືກບົ່ງມະຕິວ່າເປັນພະຍາດສະໝອງເສື່ອມຫລາຍກ່ວາຄົນທີ່ດື່ມກາເຟພຽງເລັກໜ້ອຍເຖິງ 53% ໂດຍບໍ່ກ່ຽວຂ້ອງວ່າຈະເປັນກາເຟແບບມີກາເຟອີນ ຫລື ບໍ່ມີກາເຟອີນ (ດີແຄັບ) ກໍຕາມ.
ເຖິງວ່ານັກວິໄຈຈະຍັງບໍ່ພົບຫລັກຖານຈະແຈ້ງວ່າເປັນຍ້ອນສາເຫດໃດກາເຟຈຶ່ງເຂົ້າໄປທຳລາຍສະໝອງພາກສ່ວນຂອງຄວາມຈື່ຈຳໄດ້, ແຕ່ນັກວິໄຈກໍສະແດງໃຫ້ເຫັນວ່າ ກາເຟອາດມີຄາເຟສຕອລ Cafestol ຫລື ໂມເລກຸນໃນກາເຟທີ່ອາດສົ່ງຜົນໃຫ້ຄໍເລສເຕີໂຣນໃນຮ່າງກາຍສູງຂຶ້ນໄດ້.
ແນວໃດກໍຕາມ, ນັກວິໄຈບໍ່ໄດ້ແນະນຳໃຫ້ຢຸດດື່ມກາເຟຢ່າງເດັດຂາດໄປເລີຍ, ແຕ່ຄວນຫລຸດປະລິມານລົງ ໂດຍດື່ມບໍ່ເກີນ 2 ຈອກຕໍ່ມື້ ແລະ ບໍ່ຄວນດື່ມຫລັງ 16.00 – 17.00 ໂມງ ເພື່ອບໍ່ໃຫ້ລິດຂອງກາເຟອີນທີ່ຢູ່ໃນກາເຟລົບກວນການນອນຫລັບ.
