ພິກໂສມໜ້າໃໝ່ໄປກັບລົດໄຟຄວາມໄວສູງ ລາວ-ຈີນ

ໂດຍ: ທິດກໍ່າ

ນັບແຕ່ໂຄງການກໍ່ສ້າງທາງລົດໄຟຄວາມໄວສູງ ລາວ-ຈີນ ໄດ້ສຳເລັດຜົນຢ່າງຍິ່ງໃຫຍ່ ແລະ ໄດ້ເປີດນຳໃຊ້ບໍລິການມວນຊົນຢ່າງເຕັມສ່ວນ ມາແຕ່ວັນທີ 3 ທັນວາ 2021 ເປັນຕົ້ນມາ ປາກົດວ່າຊາວລາວ ແລະ ຊາວຕ່າງປະເທດທີ່ດຳລົງຊີວິດຢູ່ລາວໄດ້ໄປສຳຜັດໃຊ້ບໍລິການຢ່າງໜາແໜ້ນ ແລະ ຄຶກຄັກໃນບາງວັນ ໂດຍສະເພາະວັນສຸກ, ວັນເສົາ ແລະ ວັນອາທິດມີມວນຊົນໄປລຽນແຖວຊື້ປີ້ເພື່ອໄປທຸລະກິດການງານ ແລະ ໄປທ່ອງທ່ຽວພາກເໜືອຈົນຍາວຢຽດ, ຍິ່ງໄປກວ່ານັ້ນ ມີບາງຄົນໄດ້ພາກັນໄປຈອງຄິວຊື້ປີ້ຕັ້ງແຕ່ 4:00 ໂມງຫາ 5:00 ໂມງເຊົ້າ.
ຈາກສະຖິຕິໃນໜຶ່ງເດືອນເຕັມຜ່ານມາ ຄືນັບແຕ່ວັນທີ 3 ທັນວາ 2021 ຫາວັນທີ 3 ມັງກອນ 2022 ຢູ່ທາງຝັ່ງເບື້ອງຈີນມີຄົນໄປໃຊ້ບໍລິການເຖິງ 670.000 ເທື່ອຄົນ. ສ່ວນຢູ່ທາງຝັ່ງເບື້ອງລາວກໍມີຜູ້ໄປໃຊ້ບໍລິການເຖິງ 5 ໝື່ນກວ່າເທື່ອຄົນ ເຊິ່ງສະເລ່ຍໃນມື້ໜຶ່ງພັນກວ່າຄົນ.

ນີ້ກໍສະແດງໃຫ້ເຫັນປັດໄຈໃໝ່ ແລະ ໂສມໜ້າໃໝ່ແຫ່ງການເດີນທາງໄປມາຈາກນະຄອນຫລວງວຽງຈັນໄປບັນດາແຂວງພາກເໜືອຢ່າງວ່ອງໄວທັນໃຈກວ່າເກົ່າຕັ້ງຫລາຍທົບເທົ່າ ຖ້າທຽບໃສ່ຕອນຍັງບໍ່ທັນມີເສັ້ນທາງລົດໄຟຄວາມໄວສູງ ລາວ-ຈີນ ຫລືເວົ້າອີກຢ່າງໜຶ່ງກໍແມ່ນການຄົມມະນາຄົມຂົນສົ່ງໂດຍສານຂອງລາວເຮົາໄດ້ກ້າວເຂົ້າສູ່ຄວາມເປັນອັນທັນສະໄໝໄປຕື່ມຢ່າງກ້າວກະໂດດຂັ້ນ.

ນອກຈາກການບໍລິການຂົນສົ່ງໂດຍສານຜ່ານທາງລາງລົດໄຟຄວາມໄວສູງມີຄວາມວ່ອງໄວທັນສະໄໝແລ້ວ, ການຂົນສົ່ງສິນຄ້າຂອງລາວໄປຈີນ, ຈາກຈີນມາລາວ ຫລື ໄປຍັງຕ່າງປະເທດກໍວ່ອງໄວທັນໃຈກວ່າສະໄໝກ່ອນຫລາຍທົບເທົ່າ. ຕົວຢ່າງ: ກ່ອນບໍ່ທັນມີເສັ້ນທາງລົດໄຟຄວາມໄວສູງ ລາວ-ຈີນ ການຂົນສົ່ງສິນຄ້າຈາກລາວໄປຍັງປະເທດຈີນຕ້ອງໄດ້ຜ່ານປະເທດໄທໃຊ້ເວລາໄປຮອດຈີນ 30 ວັນ, ແຕ່ພໍມີລົດໄຟຄວາມໄວສູງ ລາວ-ຈີນ ແມ່ນໃຊ້ເວລາພຽງ 1 ວັນກໍໄປຮອດຄຸນໝິງ ປະເທດຈີນ. ນີ້ກໍຖືວ່າເປັນມິຕິໃໝ່ ຫລືວ່າ ໂສມໜ້າໃໝ່ແຫ່ງການຂົນສົ່ງສິນຄ້າຈາກລາວໄປຍັງປະເທດຈີນ ຫລື ຈາກລາວໄປຍັງປະເທດອື່ນໆໃນພາກພື້ນ ແລະ ໃນໂລກ. ສະເພາະ 1 ເດືອນຜ່ານມາ ມີຂະບວນຂົນສົ່ງສິນຄ້າທັງໝົດ 380 ຖ້ຽວ ມີນ້ຳໜັກເຖິງ 170.000 ໂຕນ. ຄາດວ່ານັບແຕ່ນີ້ເປັນຕົ້ນໄປ ໃນອະນາຄົດພາຍຫລັງມີເສັ້ນທາງລົດໄຟຄວາມໄວສູງແລ້ວ ລາວເຮົາຈະກາຍເປັນສູນກາງການຂົນສົ່ງແຫ່ງໜຶ່ງທີ່ສຳຄັນໃນອາຊຽນ ແລະ ໃນພາກພື້ນ.

ທັງໝົດທີ່ກ່າວມາຂ້າງເທິງນີ້ ແມ່ນມິຕິໃໝ່ ທັງເປັນໂສມໜ້າໃໝ່ທີ່ພິກປີ້ນໜ້າປະຫວັດສາດຂອງຊາດລາວ, ຄົນລາວທີ່ຈະກ້າວເດີນໄປສູ່ຄວາມຮັ່ງມີໃນອະນາຄົດ. ສ່ວນວ່າຍັງມີພວກຈັງໄຮໄດ້ຕຳໜິວິຈານໃນເຊີງທາງລົບວ່າຄ່າປີ້ລົດໄຟແພງບໍ່ມີໃຜສາມາດຂີ່ ຍ້ອນຄົນລາວຍັງທຸກຍາກ, ເງິນເດືອນຕໍ່າ ທັງບໍ່ມີປັນຍາໃຊ້ໜີ້ຈີນນັ້ນ ເຂົາຊິວ່າແນວໃດກໍຕາມຊ່າງ ເພາະວ່າເຂົາກັບເຮົາມັນຢູ່ຄົນລະບ້ານ ກິນແກງຄົນລະໝໍ້, ກິນເຂົ້າຄົນລະຕິບ ຊ້ຳບໍ່ໜຳກໍແຍກກັນຢູ່ຄົນລະມຸມ.