ອິນເດຍພົບຜູ້ເສຍຊີວິດຈາກ ໂອມິຄຣອນ ຄົນທຳອິດ ຍອດຕິດໂຄວິດວັນດຽວເພີ່ມເກືອບແສນ ເຕືອນຮອບນີ້ລະບາດໄວກວ່າຮອບກ່ອນ

ອິນເດຍພົບຜູ້ເສຍຊີວິດຈາກໂອມິຄຣອນຄົນທຳອິດ, ຂະນະທີ່ຈຳນວນຜູ້ຕິດເຊື້ອໂຄວິດ-19 ວັນທີ 6 ມັງກອນວັນດຽວສູງເຖິງ 90.000 ຄົນ ຢືນຢັນມີຜູ້ຕິດເຊື້ອໄວຣັສສາຍພັນໃໝ່ໃນປະເທດແລ້ວ 2.600 ກວ່າຄົນ.

ວັນທີ 6 ມັງກອນ 2022, ເດິອິນເດຍເອັກເພຣສ (The Indian Express) ລາຍງານສະຖິຕິຜູ້ຕິດເຊື້ອໂຄວິດ-19 ໃນຮອບ 24 ຊົ່ວໂມງຜ່ານມາຈາກການເປີດເຜີຍຂອງກະຊວງສາທາລະນະສຸກອິນເດຍ ລະບຸວ່າ: ພົບຜູ້ຕິດເຊື້ອເພີ່ມຂຶ້ນ 90.928 ຄົນ ສົ່ງຜົນໃຫ້ຈຳນວນຜູ້ຕິດເຊື້ອສະສົມໃນປະເທດມີທັງໝົດ 35.019.286 ຄົນ, ສ່ວນຜູ້ເສຍຊີວິດເພີ່ມຂຶ້ນ 235 ຄົນ ເຮັດໃຫ້ປັດຈຸບັນມີຜູ້ເສຍຊີວິດແລ້ວຢ່າງໜ້ອຍ 482.876 ຄົນ.

ສຳລັບຜູ້ຕິດເຊື້ອໄວຣັສໂຄວິດ-19 ສາຍພັນໃໝ່ໃນປະເທດທີ່ໄດ້ຮັບການຢືນຢັນໃນຮອບ 24 ຊົ່ວໂມງຜ່ານມາ ເພີ່ມຂຶ້ນ 495 ຄົນ ເຊິ່ງເປັນຕົວເລກສູງສຸດນັບແຕ່ມີການກວດພົບການລະບາດຂອງໄວຣັສສາຍພັນໃໝ່ໃນປະເທດ ສົ່ງຜົນໃຫ້ຕອນນີ້ອິນເດຍມີຜູ້ຕິດເຊື້ອໄວຣັສໂອມິຄຣອນສະສົມໃນປະເທດແລ້ວຢ່າງໜ້ອຍ 2.630 ຄົນ.

ກະຊວງສາທາລະນະສຸກຍັງເປີດເຜີຍວ່າ: ໄດ້ຮັບລາຍງານຜູ້ເສຍຊີວິດທີ່ມີການກ່ຽວຂ້ອງກັບໄວຣັສສາຍພັນໂອມິຄຣອນຄົນທຳອິດໃນປະເທດ ໂດຍເປັນຜູ້ຊາຍອາຍຸ 74 ປີ ໃນລັດຣາຊສະຖານ ທາງຕາເວັນຕົກຂອງປະເທດ ເຊິ່ງມີພະຍາດປະຈຳຕົວເປັນພະຍາດເບົາຫວານ ແລະ ມີອາການປ່ວຍຂອງພະຍາດອື່ນໆນຳ.

ລັດຖະບານອິນເດຍຖະແຫລງສະຖານະການການແພ່ລະບາດຂອງໂຄວິດ-19 ໃນວັນທີ 5 ມັງກອນ ຊີ້ວ່າ: ສາເຫດທີ່ເຮັດໃຫ້ຈຳນວນຜູ້ຕິດເຊື້ອໂຄວິດ-19 ເປັນເພາະການລະບາດຂອງໄວຣັສສາຍພັນໂອມິຄຣອນທີ່ສາມາດແພ່ກະຈາຍເຊື້ອຢ່າງວ່ອງໄວ. ພ້ອມລະບຸວ່າ: ຄ່າ R-naught (R0) ເຊິ່ງເປັນຄ່າຄິດໄລ່ທີ່ບົ່ງຊີ້ຄວາມສາມາດໃນການແພ່ກະຈາຍເຊື້ອໂດຍສະເລ່ຍຈາກຜູ້ຕິດເຊື້ອຄົນດຽວໄປຫາຄົນອື່ນໆ ໃນປັດຈຸບັນຢູ່ທີ່ 2,69 ສູງກວ່າຕອນທີ່ອິນເດຍເຂົ້າສູ່ຈຸດສູງສຸດຂອງການລະບາດຮອບຜ່ານມາ ເຊິ່ງມີຄ່າ R0 ພຽງ 1,69 ເທົ່ານັ້ນ.

ຂະນະດຽວກັນ ເມືອງໃຫຍ່ທົ່ວປະເທດຕ່າງລາຍງານຍອດຜູ້ຕິດເຊື້ອເພີ່ມຂຶ້ນແບບກ້າວກະໂດດ ໂດຍນະຄອນມຸມໄບ ພົບຜູ້ຕິດເຊື້ອແຕ່ລະວັນເພີ່ມຫລາຍກວ່າ 15.000 ຄົນ ເຊິ່ງເປັນຈຳນວນສູງສຸດນັບແຕ່ເກີດການລະບາດໃນເດືອນມີນາ 2020, ສ່ວນນະຄອນຫລວງນິວເດລີ ພົບຜູ້ຕິດເຊື້ອໃໝ່ເພີ່ມຂຶ້ນສອງເທົ່າໃນວັນທີ 5 ມັງກອນ ເຖິງ 10.665 ຄົນ ແລະ ເມືອງປູເນ່ ເມືອງໃຫຍ່ທາງຕາເວັນຕົກມີລາຍງານຜູ້ຕິດເຊື້ອເພີ່ມຂຶ້ນກ້າວກະໂດດສູງເຖິງ 6 ເທົ່າຈາກ 447 ຄົນໃນວັນທີ 3 ມັງກອນ ມາເປັນ 2.813 ຄົນໃນເວລາພຽງອາທິດດຽວ ສ້າງຄວາມກັງວົນວ່າລະບົບສາທາລະນະສຸກອາດຕ້ອງຕົກຢູ່ໃນສະພາບກົດດັນອີກ.

ອ້າງອີງ:

https://indianexpress.com/…/as-daily-cases-jump-6…/

https://indianexpress.com/…/covid-19-omicron-india…/

https://indianexpress.com/…/covid-india-records-first…/