ແບລດເຕີ ບໍ່ເຫັນດີຈັດບານໂລກທຸກ 2 ປີ ຊີ້ເປັນການຫລຸດຄວາມສຳຄັນຂອງສະໂມສອນ

ເຊບ ແບລດເຕີ ອະດີດປະທານສະຫະພັນບານເຕະນາໆຊາດ ຫລື ( FIFA )  ອອກມາລະບຸວ່າ ລາວບໍ່ເຫັນດີຢ່າງຍິ່ງກັບແຜນການປັບຮູບແບບການແຂ່ງຂັນບານເຕະໂລກ ມາແຂ່ງຂັນທຸກໆ 2 ປີ ແທນທີ່ການແຂ່ງຂັນທຸກ 4 ປີ ເນື່ອງຈາກເບິ່ງວ່າມັນຈະສົ່ງຜົນກະທົບຢ່າງຫລາຍກັບການແຂ່ງຂັນໃນລະດັບສະໂມສອນ ຫລັງອົງການບານເຕະໂລກພາຍໃຕ້ການນຳຂອງ ຈານນີ ອິນຟານຕີໂນ ປະທານຄັດປັດຈຸບັນພວມດຳເນີນຊຸກຍູ້ໂຄງການດັ່ງກ່າວຢ່າງເຕັມທີ່ ເຖິງຈະຖືກຕໍ່ຕ້ານຢ່າງຫນັກຈາກຫລາຍພາກສ່ວນ ລວມເຖິງສະຫະພັນບານເຕະຢູໂຣບ (EUFA)  ແລະ ສະມາພັນບານເຕະອາເມິລກາໃຕ້ (ຄອນເມໂບລ) ກໍຕາມ.

ແບລດເຕີ ອາຍຸ 85 ປີ ເຊິ່ງດຳລົງຕຳແຫນ່ງປະທານຟີຟາລະຫວ່າງປີ 1998-2015 ກ່ອນຈະຖືກຖອດອອກຈາກຕຳແຫນ່ງຫລັງຖືກກ່າວຫາວ່າມີສ່ວນພົວພັນກັບການສໍ້ໂກງໃນອົງກອນນັ້ນ ໄດ້ໂພດຂໍ້ຄວາມໃນທະວິດເຕີສ່ວນຕົວວ່າ ‘‘ ຂ້ອຍຮູ້ສຶກກັງວົນແຜນການຈັດການແຂ່ງຂັນບານເຕະໂລກທຸກໆ 2 ປີ ເຮົາຕ້ອງບໍ່ລືມວ່າພື້ນຖານຂອງການແຂ່ງຂັນບານເຕະຄືບັນດາສະໂມສອນ ແລະ ຜົນກະທົບຂອງພວກເຂົາທີ່ມີຕໍ່ສັງຄົມ ແລະຖ້າໂປຣແກຣມເຕະຂອງທີມຊາດມັນຖີ່ຂະຫນາດນັ້ນ ສະໂມສອນເຫລົ່ານັ້ນກໍອາດຈະສູນເສຍສິດທິການການດຳລົງຢູ່ຂອງສະໂມສອນ ດັ່ງນັ້ນ ຂ້ອຍບໍ່ເຫັນດີຢ່າງເດັດຂາດກັບບານໂລກທີ່ເຕະກັນທຸກໆ 2 ປີ ’’.