5 ສາເຫດນີ້ທີ່ເຮັດໃຫ້ຜູ້ເປັນຜົວເບື່ອເມຍ

    ກ່ອນແຕ່ງດອງ ຫລື ເປັນແຟນກັນຢູ່ ອາດຈະຮັບນິໄສຂອງກັນ ແລະ ກັນໄດ້ ແລະ ເມື່ອແຕ່ງດອງກັນໄປແລ້ວ ກໍຄົງຄິດວ່າຈະປັບໂຕເຂົ້າຫາກັນໄດ້, ແຕ່ເມື່ອຄູ່ຮັກທີ່ແຕ່ງດອງກັນມາດົນແລ້ວ ຊຳ້ພັດບໍ່ສາມາດທົນຕໍ່ຂໍ້ເສຍຂອງກັນ ແລະ ກັນໄດ້ ເຮັດໃຫ້ເກີດຄວາມເບື່ອຂຶ້ນມາ ຍ້ອນຂໍ້ເສຍບາງຢ່າງທີ່ຜູ້ເປັນເມຍອາດບໍ່ຮູ້ໂຕວ່າເຮັດລົງໄປແລ້ວເກີດຄວາມບໍ່ພໍໃຈ ບໍ່ຖືກໃຈຂອງຝ່າຍຜົວ ຈຶ່ງເປັນຕົ້ນກຳເນີດໃຫ້ຄວາມຮັກຫລຸດໜ້ອຍຖອຍລົງ ແລະ ອາດຈະຮ້າຍແຮງຂຶ້ນເຖິງຂັ້ນຜົວນອກໃຈ ຫລື ໄປມີເພດສຳພັນກັບແມ່ຍິງຄົນອື່ນໄດ້.​ ສະນັ້ນ,​ ມື້ນີ້ພວກເຮົາຈຶ່ງນຳເອົາສິ່ງທີ່ຄວນຮູ້ເອົາໄວ້ກ່ອນ ກັບ 5 ຂໍ້ເສຍທີ່ອາດກາຍເປັນບັນຫາໃນຊີວິດຄູ່ໄດ້ມາແນະນຳບັນດາເອື້ອຍນ້ອງທ່ານຍິງພວກເຮົາ.

1. ເຮັດໂຕເປັນແມ່ຫລາຍກ່ວາເມຍ : ເມຍທີ່ເຮັດໂຕເປັນຄືແມ່ ທີ່ຈອບແຕ່ສັ່ງໃຫ້ຜົວເຮັດນັ້ນເຮັດນີ້ ເປັນຈອມຜະເດັດການຄອຍບົງການທຸກຢ່າງໃນຊີວິດ, ຈອບຕຳໜິໃນສິ່ງທີ່ຜົວເຮັດ ກໍເທົ່າກັບເປັນຄວາມຜິດພາດຫລາຍ ເພາະຜູ້ຊາຍທີ່ເປັນຜູ້ນຳ ຫລື ຫົວໜ້າຄອບຄົວນັ້ນ ເຂົາບໍ່ມັກໃຫ້ໃຜມາຄວບຄຸມຈົນຫລາຍເກີນໄປ ດັ່ງນັ້ນ ການພະຍາຍາມໄປຄວບຄຸມຊີວິດຜົວຄົງບໍ່ເປັນຜົນດີຕໍ່ຊີວິດຄູ່ຫລັງແຕ່ງດອງແນ່ນອນ ລວມໄປເຖິງການພົບພໍ້ເມຍທີ່ເວົ້າຫລາຍ,​ ມັກຈົ່ມ ຫລື ມັກນິນທາ ຈັບເອົາເລື່ອງຂອງຄົນອື່ນມາເວົ້າໃຫ້ຟັງທັນທີທີ່ຜົວກັບມາຮອດເຮືອນ ຮັບຮອງວ່າຫາກທ່ານມີພຶດຕິກຳແບບນີ້ ຜົວຂອງທ່ານຈະຕ້ອງເບື່ອທ່ານແນ່ນອນ.
2. ຈອບຈັບຜິດຢູ່ຕະຫລອດເວລາ : ຄົງບໍ່ມີໃຜມັກໃຫ້ຄົນອື່ນມາຈອບຈັບຜິດຢູ່ຕະຫລອດເວລາແມ່ນບໍ່ ? ຜົວຂອງທ່ານກໍຄືກັນ ບໍ່ແມ່ນວ່າເຂົາຈະເຮັດຫຍັງ, ໄປໃສ, ກັບເຮືອນເດິກ ຫລື ອັນໃດກໍຕາມທີ່ອາດເຮັດໃຫ້ເມຍລະແວງສົງໄສ ກໍຂໍໃຫ້ຖາມແບບກົງໆ ຖາມໂດຍໃຊ້ເຫດຜົນ ໃຊ້ຄວາມເຊື່ອໃຈ ບໍ່ແມ່ນຈະຈອບຈັບຜິດ ຖາມດ້ວຍອາລົມ ແລະ ເຮັດໂຕເປັນນັກສືບຈອບເອົາແຕ່ຄວາມຜິດ,​ ຍິງຄຳຖາມເກົ່າໆຊຳ້ໆ ເຊັ່ນ : ໄປໃສມາ, ໄປກັບໃຜ, ເປັນຫຍັງຄືກັບເຮືອນເດິກ,​ ຂໍເບິ່ງໂທລະສັບແດ່ ແບບນີ້ຕະຫລອດ ເຖິງວ່າຜົວຈະຮັກເມຍຫລາຍປານໃດ ຖ້າພົບສະຖານະການແບບນີ້ຕະຫລອດ ໂດຍຄືກັບບໍ່ໄວ້ໃຈ ເຂົາກໍເກີດຄວາມເບື່ອໄດ້ ເພາະຜູ້ຊາຍເຖິງວ່າຈະແຕ່ງດອງມີຄອບຄົວ ມີລູກມີເມຍແລ້ວ ກໍຍັງຄົງມີໂລກສ່ວນໂຕ ເລື່ອງລັບໆທີ່ເຂົາຍັງບໍ່ຢາກໃຫ້ທ່ານຮູ້,​ ລໍຖ້າໃຫ້ເຂົາບອກທ່ານເອງຈະດີກ່ວາ.
3. ບໍ່ເອົາໃຈໃສ່ : ຜູ້ເປັນເມຍຢ່າຄິດວ່າ ຢ່າອ້າງວ່າເຮັດວຽກເມື່ອຍແລ້ວ ຍັງຕ້ອງມາເອົາໃຈຜົວອີກ ເຊິ່ງຫາກຄິດແບບນີ້ກໍບໍ່ຜິດ,​ ແຕ່ຢ່າລືມວ່າຂະໜາດທ່ານທີ່ເປັນເມຍຍັງຕ້ອງການໆເອົາອົກເອົາໃຈເລີຍ ແລ້ວເປັນຫຍັງຜົວທີ່ເປັນຜູ້ຊາຍເຂົາເປັນເພດທີ່ຕ້ອງການໆເອົາອົກເອົາໃຈ ບໍ່ແມ່ນເຢັນຊາໃສ່, ຖ້າຢາກເຮັດແບບນີ້ກໍເຮັດໄດ້ ແຕ່ເລື່ອງເພດສຳພັນທ່ານຕ້ອງດີນຳ ບໍ່ດັ່ງນັ້ນຈະກາຍເປັນວ່າຜົວສຸດທີ່ຮັກຂອງທ່ານອາດຈະໄປມີແມ່ຍິງຄົນອື່ນໄດ້ ຖ້າບໍ່ຢາກໃຫ້ເກີດຂຶ້ນ ຜູ້ເປັນເມຍກໍຄວນທີ່ຈະເອົາໃຈໃສ່ຜົວ,​ ເບິ່ງແຍງເປັນຫ່ວງເປັນໄຍເລື່ອງເພດສຳພັນຢ່າໃຫ້ຂາດ ເຖິງຈະແຕ່ງດອງກັນມາດົນແລ້ວກໍຕາມ,​ ເຮັດໜ້າທີ່ແມ່ທີ່ດີຂອງລູກ ແລະ ເມຍທີ່ດີຂອງຜົວນຳ ບໍ່ຕ້ອງຫລວງຫລາຍ ແຕ່ເຮັດສະໝໍ່າສະເໝີກໍພຽງພໍແລ້ວ.
4. ຂີ້ຫງຸດຫງິດ ເຈົ້າອາລົມ : ອັນໃດກໍໃຊ້ແຕ່ອາລົມ, ອັນໃດກໍຫງຸດຫງິດໄປໝົດ ບໍ່ວ່າຜົວຈະເຮັດຫຍັງທີ່ອາດເກີດຄວາມບໍ່ພໍໃຈກໍພານໃສ່,​ ຜູ້ຊາຍບາງຄົນເຂົາອາດຈະມັກການປະສາດ ມັກຢອກລໍ້ຜູ້ເປັນເມຍ ຖ້າຢອກຫລິ້ນແລ້ວຜູ້ເປັນເມຍຊຳ້ພັດເມົາແຕ່ຫງຸດຫງິດ ພານໃສ່ເຂົາ ມັນຈະເຮັດໃຫ້ເຂົາບໍ່ກ້າທີ່ຫລິ້ນຫຍັງກັບທ່ານອີກເລີຍ ຈົນເຮັດໃຫ້ຄວາມຮັກຈືດຈາງ ແລະ ໜ້າເບື່ອໃນທີ່ສຸດ ແລະ ເຖິງຈະເປັນເລື່ອງພຽງເລັກນ້ອຍກໍຈະອາລົມເສຍຢ່າງຫລວງຫລາຍ ທັງໂຍນສິ່ງຂອງ,​ ຮ້ອງໂວຍວາຍສຽງດັງໃສ່, ເວົ້າດ້ວຍຄຳເວົ້າທີ່ຫຍາບຄາຍ ແລະ ແທງໃຈຜົວ ຫາກເປັນແບບນີ້ການໃຊ້ຊີວິດຄູ່ອາດຈະສຸ່ມສ່ຽງທີ່ຜົວອາດຈະເກີດການນອກໃຈໄດ້.
5. ຕິດຕາມເຂົາໄປທຸກບ່ອນ ເຮັດໃຫ້ອຶດອັດ : ບາງຄັ້ງຜູ້ເປັນຜົວກໍຢາກມີໂລກສ່ວນໂຕແດ່, ຢາກໄປໃສມາໃສກັບໝູ່ທີ່ບໍ່ໄດ້ພົບພໍ້ກັນມາດົນ,​ ຢາກລົມກັນໃນສິ່ງທີ່ຝ່າຍຍິງບໍ່ຕ້ອງຮູ້ແດ່ກໍໄດ້,​ ບໍ່ແມ່ນເມຍຈະຂໍຕິດຕາມຜົວໄປທຸກບ່ອນ, ໄປໃສມາໃສນຳກັນຕະຫລອດ ໂດຍເຂົ້າໃຈວ່າຊີວິດຄູ່ – ຊີວິດຫລັງແຕ່ງດອງແມ່ນການຕ້ອງຢູ່ນຳກັນ, ແຕ່ຮູ້ຫລືບໍ່ວ່າການມີໄລຍະຫ່າງທີ່ເໝາະສົມນັ້ນຈະເຮັດໃຫ້ພວກທ່ານຮູ້ສຶກໃກ້ຊິດ ແລະ ມີຄວາມຄິດເຖິງກັນ, ມີຄວາມຮັກຫລາຍຂຶ້ນ. ການເຮັດໂຕຕິດກັນນັ້ນຈະເຮັດໃຫ້ອີກຝ່າຍຮູ້ສຶກອຶດອັດ ແລະ ລະເບີດຄວາມເບື່ອຂຶ້ນມາໃນທີ່ສຸດໄດ້ ບໍ່ພຽງແຕ່ຜູ້ເປັນເມຍເທົ່ານັ້ນ ຜູ້ເປັນຜົວກໍເປັນຄືກັນ ຫາກມີນິໄສແບບນີ້ກໍຈະເຮັດໃຫ້ຝ່າຍເມຍເບື່ອໄດ້ຄືກັນ ເຊິ່ງຫາກຝ່າຍຜົວຕົກລົງປົງໃຈເລືອກແມ່ຍິງມາເປັນຄູ່ ກໍຢ່າກາຍມາເປັນຜູ້ຊາຍຂີ້ເບື່ອເອົາງ່າຍໆ ເພາະແນວໃດກໍຕາມ ຊີວິດຄູ່ຈະບໍ່ເກີດຂຶ້ນ ຫາກຄົນທັງສອງບໍ່ມີຄວາມຮັກໃຫ້ແກ່ກັນ. ດັ່ງນັ້ນ ຈຶ່ງຄວນຮັບຮູ້ຂໍ້ດີຂອງແຕ່ລະຝ່າຍ ແລະ ພະຍາຍາມປັບປຸງຂໍ້ເສຍຂອງຕົນເອງ,​ ເມື່ອເບື່ອໄດ້ກໍຕ້ອງຫາວິທີແກ້ໃຫ້ເຊົາເບື່ອໄດ້ຄືກັນ.