ການວິໄຈຂອງເດນມາກຊີ້ ໂອມິຄຣອນ ຫລົບຫລີກພູມຕ້ານທານໄດ້ດີກວ່າ ເດວຕາ ແຕ່ສ່ຽງເກີດອາການຮຸນແຮງໜ້ອຍກວ່າ

ເດນມາກ ເປີດເຜີຍຜົນວິໄຈຫລ້າສຸດພົບໂອມິຄຣອນສາມາດຫລົບຫລີກພູມຕ້ານທານໄດ້ດີກວ່າ, ແຕ່ສ່ຽງເຮັດໃຫ້ເກີດອາການຮຸນແຮງໜ້ອຍກວ່າເດວຕາ. ຊີ້ເປັນສາເຫດທີ່ລະບາດໄວ ແຕ່ອັດຕາເຂົ້າໂຮງໝໍຍັງຕໍ່າ.

ວັນທີ 4 ມັງກອນ 2022, ສຳນັກຂ່າວຣອຍເຕີລາຍງານວ່າ: ຄະນະນັກວິໄຈຈາກມະຫາວິທະຍາໂຄເປນເຮເກນ, ສຳນັກງານສະຖິຕິແຫ່ງຊາດເດນມາກ ແລະ ສະຖາບັນເຊຣຳແຫ່ງເດນມາກ ເປີດເຜີຍຜົນການວິໄຈຫລ້າສຸດພົບວ່າ: ເຊື້ອໄວຣັສໂຄວິດ-19 ສາຍພັນໂອມິຄຣອນ ມີຄວາມສາມາດໃນການຫລົບຫລີກພູມຕ້ານທານໄດ້ດີກວ່າໄວຣັສສາຍພັນເດວຕາ ເຊິ່ງນີ້ຊ່ວຍອະທິບາຍວ່າເຫດໃດໄວຣັສໂອມິຄຣອນຈຶ່ງແພ່ກະຈາຍໄດ້ງ່າຍຂຶ້ນ.

ການວິໄຈດັ່ງກ່າວດຳເນີນໂດຍໃຊ້ຕົວຢ່າງຈາກຊາວເດນມາກເກືອບ 12.000 ຄອບຄົວໃນຊ່ວງກາງເດືອນທັນວາຜ່ານມາ ໂດຍນັກວິໄຈພົບວ່າ: ໄວຣັສສາຍພັນໂອມິຄຣອນສາມາດແພ່ກະຈາຍໄດ້ໄວກວ່າເດວຕາ 2,7-3,7 ເທົ່າ ໃນກຸ່ມປະຊາກອນທີ່ໄດ້ຮັບການສັກວັກຊີນແລ້ວ ຊີ້ໃຫ້ເຫັນວ່າໄວຣັສສາຍພັນໃໝ່ແພ່ກະຈາຍໄດ້ໄວກວ່າ ເນື່ອງຈາກມີຄວາມສາມາດໃນການຫລົບຫລີກພູມຕ້ານທານທີ່ໄດ້ຮັບຈາກວັກຊີນໄດ້ດີກວ່າ.

ຜົນການວິໄຈຍັງພົບອີກວ່າ: ຜູ້ທີ່ສັກວັກຊີນເຂັມກະຕຸ້ນແລ້ວມີໂອກາດແພ່ເຊື້ອໄວຣັສໜ້ອຍກວ່າຜູ້ທີ່ຍັງບໍ່ໄດ້ຮັບການສັກວັກຊີນ.

ທັງນີ້, ປັດຈຸບັນມີຊາວເດນມາກ 78% ໄດ້ຮັບການສັກວັກຊີນຄົບໂດສແລ້ວ, ຂະນະທີ່ 48% ຂອງປະຊາກອນສັກວັກຊີນເຂັມ 3 ແລ້ວ ໂດຍປະຊາກອນຊາວເດນມາກຫລາຍກວ່າ 8 ໃນ 10 ຄົນໄດ້ຮັບການສັກວັກຊີນຂອງໄຟເຊີ-ໄບໂອເອັນເທັກ.

ໄທຣາ ໂກຟ ເຄົາ ຜູ້ອຳນວຍການຝ່າຍເຕັກນິກຂອງ SSI ເຊິ່ງເປັນໜຶ່ງໃນທີມວິໄຈ ເປີດເຜີຍຕໍ່ສື່ເດນມາກວ່າ: “ເຖິງວ່າໄວຣັສໂອມິຄຣອນຈະຍັງສ້າງແຮງກົດດັນຕໍ່ລະບົບສາທາລະນະສຸກຂອງພວກເຮົາ, ແຕ່ຂໍ້ມູນທັງໝົດທີ່ມີບົ່ງຊີ້ວ່າ ໄວຣັສສາຍພັນນີ້ມີຄວາມຮຸນແຮງໜ້ອຍກວ່າສາຍພັນເດວຕາ” ໂດຍທ່ານໄດ້ອະທິບາຍຕໍ່ວ່າ: ຄວາມສ່ຽງໃນການເຂົ້າປິ່ນປົວຢູ່ໂຮງໝໍຈາກໂອມິຄຣອນໜ້ອຍກວ່າຄວາມສ່ຽງຈາກເດວຕາປະມານ 50%.

ການວິໄຈຫລ້າສຸດນີ້ສອດຄ່ອງກັບຕົວເລກສະຖິຕິຂອງເດນມາກ ເຊິ່ງພົບວ່າມີຜູ້ຕິດເຊື້ອເຂົ້າຮັບການປິ່ນປົວໃນໂຮງໝໍເນື່ອງຈາກການຕິດເຊື້ອໂອມິຄຣອນຈຳນວນ 93 ຄົນໃນຊ່ວງທ້າຍເດືອນທັນວາຜ່ານມາ, ແຕ່ໃນຈຳນວນນັ້ນມີຜູ້ຕິດເຊື້ອບໍ່ເຖິງ 5 ຄົນທີ່ມີອາການໜັກ.

“ໄວຣັສສາຍພັນນີ້ອາດຈະມາຊ່ວຍພາພວກເຮົາຫລຸດພົ້ນຈາກວົງຈອນລະບາດຂອງໂຄວິດ-19 ແລະ ເຮັດໃຫ້ການລະບາດຄັ້ງນີ້ເປັນການລະບາດຮອບສຸດທ້າຍ” ເຄົາ ກ່າວ.

ອ້າງອີງ:

https://www.reuters.com/…/omicron-evades-immunity…/