ກຸ່ມກະບົດກຽມກໍ່ຄວາມວຸ້ນວາຍບານເຕະລາຍການ ແອຟຣີກາ ຄັບ ອອບ ເນຊັນ
ການແຂ່ງຂັນ ແອຟຣິກາ ຄັບ ອອບ ເນຊັນ ທີ່ແຄມເມີຣູນ ອາດມີຄວາມວຸ້ນວາຍເກີດຂຶ້ນ ຫລັງມີລາຍງານວ່າກຸ່ມກະບົດກໍ່ຄວາມຮຸນແຮງເພື່ອປັ່ນປ່ວນການແຂ່ງຂັນ ໂດຍສະເພາະໃນເມືອງ ກາຣູອາ ແລະ ລິມເບ 2 ຈາກ 5 ເມືອງເຈົ້າພາບ ຂະນະທີ່ລັດຖະບານອັງກິດເຕືອນຫລີກລ່ຽງເດີນທາງເຂົ້າພື້ນທີ່ສ່ຽງ.
ການແຂ່ງຂັນແອຟຣິກາ ຄັບ ອອບ ເນຊັນ ເຊິ່ງພວມຈະເປີດສາກຂຶ້ນທີ່ປະເທດແຄມເມີຣູນ ໃນວັນອາທິດທີ 9 ມັງກອນນີ້ ອາດພົບບັນຫາໃຫຍ່ ຫລັງກຸ່ມກະບົດໃນບາງພື້ນທີ່ຂອງປະເທດ ໂດຍສະເພາະໃນເມືອງລິມເບ ແລະ ກາຣູອາ ເຊິ່ງເປັນ 2 ຈາກ 5 ເມື່ອທີ່ໄດ້ຮັບເປັນເຈົ້າພາຈັດການແຂ່ງຂັນນັ້ນ ອາດກຽມໃຊ້ຄວາມຮຸນແຮງເພື່ອກໍ່ກວນການແຂ່ງຂັນ ສົ່ງຜົນໃຫ້ລັດຖະບານອັງກິດອອກປະກາດແນະນຳໃຫ້ປະຊາກອນຂອງປະເທດຫລີກລ່ຽງການເດີນທາງໄປຍັງແຄມເມີຣູນແລ້ວ.
ລາຍງານຈາກ ‘‘ ຣອຍເຕີ ’’ ສຳນັກຂ່າວຕ່າງປະເທດຊື່ດັງລະບຸວ່າ ກ່ອນຫນ້ານີ້ມີຄວາມຂັດແຍ່ງເກີດຂຶ້ນໃນປະເທດແຄມເມີຣູນ ລະຫວ່າງລັດຖະບານເຊ່ິງຕັ້ງຢູ່ໃນພື້ນທີ່ທີ່ເວົ້າພາສາຝຣັ່ງ ກັບກຸ່ມກະບົດເຊິ່ງຢູ່ໃນພື້ນທີ່ທີ່ໃຊ້ພາສາອັງກິດເປັນຫລັກ ໂດຍໃນຮອບປີທ່າຍມາ ມີຄວາມພະຍາຍາມວາງລະເບີດເຖິງ 8 ຄັ້ງໃນພື້ນທີ່ທາງຕະເວັນຕົກຂອງປະເທດ ແລະມີຄວາເປັນໄດ້ທີ່ສະຖານະການທີ່ສຳຄັນໃນຫລາຍເມືອງ ລວມເຖິງໃນນະຄອນຢາອຸນເດ ເມືອງຫລວງຂອງປະເທດ ອາດກາຍເປັນເປົ້າຫມາຍໂຈມຕີຂອງຸ່ມກະບົດ ຂະນະທີ່ ເດລີ ເມລ ສື່ໃນອັງກິດລາຍງານເພີ່ມວ່າ : ແມ່ນແຕ່ຄົນທີ່ແຕ່ງຊຸດມັສຄອດປຈຳການແຂ່ງຂັນ ຍັງຕ້ອງສວມຂຸດເກາະກັນລູກປືນ ລະຫວ່າງເຮັດຫນ້າທີ່ປະຊາສຳພັນການແຂ່ງຂັນໃນພື້ນທີ່ສຽງນຳອີກ.
ດ້ວຍເຫດດັ່ງກ່າວ ສົ່ງຜົນໃຫ້ກະຊວງການຕ່າງປະເທດອັງກິດຕ້ອງອອກປະກາດແນະນຳປະຊາກອນຂອງປະເທດ ໃຫ້ຫລີກລ່ຽງການເດີນທາງໄປຍັງແຄມເມີຣູນ ໂດຍສະເພາະໃນພື້ນທີ່ສ່ຽງ ເຊິ່ງລວມເຖິງເມືອງ ກາຣູອາ ແລະ ລິມເບ ເຊິ່ງເປັນ 2 ຈາກ 5 ເມືອງເຈົ້າພາບການແຂ່ງຂັນໃນກຸ່ມ D ເຊິ່ງປະກອບດ້ວຍ : ອີຢິບ, ຊູດານ, ໄນຈີເຣຍ ແລະ ກີນີ ບິສເຊົາ ເຊິ່ງມີນັກເຕະດາວດັງຈາກພຣີເມຍລີກຫລາຍຄົນທີ່ຕ້ອງລົງຫລິ້ນທີ່ເມືອງນີ້ ເຊ່ັນ : ໂມຮາເຫມັດ ຊາລາ ດາວຍິງທີມຊາດອີຢິບຈາກສະໂມສອນ ລີເວີພູລ ລວມເຖິງທີມໄນຈີເຣຍ ທີ່ມີ ອາເລັກ ອິໂວບີ ຈາກເອຟເວີຕັນ ລວມເຖິງ ວິລເຟຣັດ ເອັນດິດີ ແລະ ເຄເລຊີ ອີເຮຍນາໂຊ ຈາກ ເລສເຕີ ຊິຕີ ນອກຈາກນີ້ ຍັງຈະຈັດເກມຮອບ 8 ທີມສຸດທ້າຍອີກ 1 ນັດ.
ສ່ວນເມືອງ ລິມເບ ເຊິ່ງກ່ອນຫນ້ານີ້ມີລາຍງານວ່າທະຫານຕ້ອງນຳລົດຕິດອາວຸດອອກມາກວດກາເພື່ອເບິ່ງແຍງຄວາມປອດໄພໃນພື້ນທີ່ ລວມເຖິງຕ້ອງມີການຕັ້ງດ່ານຄວາມຫມັ້ນຄົງໃນຖະຫນົນສາຍຫລັກຫລາຍເສັ້ນນັ້ນ ກໍຈະເປັນເຈົ້າພາບຈັດນັດໃນກຸ່ມ F ເຊິ່ງປະກອບດ້ວຍ ຕູນີເຊຍ, ມາລີ, ມໍຣິທາເນຍ ແລະ ແກມເບຍ ລວມເຖິງເກມຮອບ 16 ທີມສຸດທ້າຍອີກ 2 ນັດ.
