ການຈັດຕັ້ງປະຕິບັດວຽກຫັນເປັນທັນສະໄໝຂອງການເງິນໃນໄລຍະຜ່ານມາ ແລະ ທິດທາງໃນຕໍ່ໜ້າ
ໃນທ້າຍອາທິດຜ່ານມາ, ທີ່ຫ້ອງປະຊຸມກົມສ່ວຍສາອາກອນ ກະຊວງການເງິນ, ໄດ້ຈັດກອງປະຊຸມຄົ້ນຄວ້າແຜນຍຸດທະສາດຫັນວຽກງານການເງິນພາກລັດເປັນດິຈີຕອນ, ເພື່ອລາຍງານຜົນການປະຕິບັດວຽກງານຫັນເປັນທັນສະໄໝຂອງຂະແໜງການເງິນໃນໄລຍະຜ່ານມາ ແລະ ທິດທາງແຜນການໃນຕໍ່ໜ້າ, ໂດຍການເປັນປະທານຂອງທ່ານ ບຸນໂຈມ ອຸບົນປະເສີດ ລັດຖະມົນຕີກະຊວງການເງິນ, ມີທ່ານ ສຈ.ປອ ບໍ່ວຽງຄຳ ວົງດາຣາ ລັດຖະມົນຕີກະຊວງເຕັກໂນໂລຊີ ແລະ ການສື່ສານ, ພ້ອມດ້ວຍພາກສ່ວນບໍລິສັດພັດທະນາໂຄງການ ແລະ ກົມທີ່ກ່ຽວຂ້ອງເຂົ້າຮ່ວມ.
ໃນກອງປະຊຸມທ່ານ ປອ ບຸນເຫຼືອ ສິນໄຊວໍຣະວົງ ຮອງລັດຖະມົນຕີກະຊວງການເງິນ ໄດ້ຂຶ້ນລາຍງານວຽກງານຂົງເຂດລາຍຮັບ, ຂົງເຂດລາຍຈ່າຍ, ລະບົບຊໍາລະສະສາງ, ການພັດທະນາລະບົບພື້ນຖານໂຄງລ່າງເຄືອຂ່າຍສຳລັບ (ລາຍຮັບ-ລາຍຈ່າຍ), ລະບົບຖານຂໍ້ມູນລວມສູນຂະແໜງການເງິນພາກລັດ ແລະ ວິເຄາະວິໄຈຂໍ້ມູນ (Lao FIDA) ລວມເຖິງສິ່ງທ້າທາຍໃນວຽກງານ ແລະ ທິດທາງແຜນການໃນຕໍ່ໜ້າ.
ພາຍຫຼັງສຳເລັດລົງນາມບົດບັນທຶກຄວາມເຂົ້າໃຈ (MOU) ຄັ້ງວັນທີ 16 ກັນຍາ 2021 ກັບບໍລິສັດຫົວເຫວີຍເທັກໂນໂລຢີ(ລາວ) ຈຳກັດຜູ້ດຽວ, ກະຊວງການເງິນໄດ້ສົມທົບກັບບັນດາກົມກ່ຽວຂ້ອງອ້ອມຂ້າງກະຊວງການເງິນ ແລະ ສູນອິນເຕີເນັດແຫ່ງຊາດ, ກົມເຕັກໂນໂລຊີດິຈິຕອນ ແລະ ສູນບໍລິຫານລັດດ້ວຍເອເລັກໂທຣນິກ, ກະຊວງເຕັກໂຕໂລຊີ ແລະ ການສື່ສານເຮັດວຽກຮ່ວມກັບຊ່ຽວຊານບໍລິສັດ ຫົວເຫວີຍ ແລະ ໄດ້ສໍາເລັດການສໍາຫຼວດການອອກແບບຮ່າງບົດສຶກສາຄວາມເປັນໄປໄດ້ຂອງໂຄງການ (Feasibility Study) ແລະ ຮ່າງແຜນຍຸດທະສາດການຄຸ້ມຄອງລະບົບການເງິນພາກລັດເປັນດິຕິຕອນ.
ໂຄງການສຶກສາຄວາມເປັນໄປໄດ້ຂອງໂຄງການ (Feasibility Study) ແລະ ແຜນຍຸດທະສາດການຄຸ້ມຄອງລະບົບການເງິນພາກລັດເປັນດິຕິຕອນແບ່ງອອກເປັນສາມໄລຍະຄື: ໄລຍະທີ 1 ເຮັດການບູລະນະ ແລະ ຍົກລະ ດັບລະບົບທີ່ມີຢູ່, ໄລຍະທີ 2 ການກໍ່ສ້າງລະບົບພື້ນຖານໂຄງລ່າງເພີ່ມເຕີມ ແລະ ເຮັດການເຊື່ອມກັບລະບົບທີ່ມີຢູ່ແລ້ວຂອງກະຊວງການເງິນ, ໄລຍະທີ 3 ແມ່ນການຫັນປ່ຽນຂໍ້ມູນຂ່າວສານ.
ການຄົ້ນຄວ້າອອກແບບໄດ້ແບ່ງອອກເປັນ 4 ຂັ້ນຕອນເປັນຕົ້ນ: ການວາງແຜນວິໄສທັດ, ການວິເຄາະສະ ພາບການປັດຈຸບັນ, ການວາງແຜນຜັງ ແລະ ແນວທາງການປະຕິຮູບ, ສະນັ້ນ, ເພື່ອຮອງຮັບແຜນການພັດທະນາໃນອານາຄົດຂອງຂະແໜງການເງິນ, ຍົກລະດັບການເກັບພາສີອາກອນ ຫຼື ລາຍຮັບຂອງລັດ, ຊຸກຍູ້ການຂະຫຍາຍໂຕຂອງເສດຖະກິດ.
ການວາງແຜນຜັງການຫັນເປັນດິຈິຕອນຂອງຂະແໜງການເງິນແຫ່ງລັດ ໄດ້ແບ່ງອອກເປັນສາມລະດັບ ຄື: ລະດັບພື້ນຖານໂຄງລ່າງ, ລະດັບລະບົບທີ່ນໍາໃຊ້, ແລະ ລະດັບນະໂຍບາຍ, ລະບຽບກົດໝາຍ, ໂດຍມີເສົາຄ້ຳຫຼັກເປັນຄວາມປອດໄພຂອງຂໍ້ມຸນ ແລະ ການສ້າງບຸກຄະລາກອນ, ແຜນພັດທະນາ 5 ປີ.
ໃນນີ້, ລວມມິີການບໍລິການແບບປະຕູດຽວ, ຍົກລະດັບວຽກຫ້ອງການຂອງລັດຖະບານ, ນຳໃຊ້ Big Data ໃນການຕັດສິນໃຈ ຫຼື ອອກນະໂຍ ບາຍ, ຍົກລະດັບການໃຫ້ບໍລິການແກ່ການບໍລິການແກ່ປະຊາຊົນທີ່ຢູ່ເຂດຫ່າງໄກສອກຫຼີກ.
ສ່ວນການປະຕິຮູບເລີ່ມຕົ້ນຈາກນະໂຍບາຍ ແລະ ການພັດທະນາບຸກຄະລາກອນ, ການສ້າງລະບົບພື້ນຖານໂຄງລ່າງຂອງໄອຊິທີໃນການຫັນເປັນດິຈີຕອນຂອງຂະແໜງການທີ່ກ່ຽວຂ້ອງ, ຍົກລະດັບການເຊື່ອມຈອດຂໍ້ມູນລະຫວ່າງກົມພາສີ ແລະ ອາກອນໃນການບໍລິການແບບລວມສູນໂດຍຜ່ານລະບົບ Single Windows,E-Payment ແລະ ລະບົບຄຸ້ມຄອງຄວາມສ່ຽງໃນການຄຸ້ມຄອງບໍລິຫານຈັດການວຽກງານພາສີ ແລະ ອາກອນ, ໂດຍນໍາເອົາການຊຳລະ, ການສະແດງຜົນ ແລະ ການລາຍງານສະພາບການຊ່ວຍສາອາກອນແບບ Real Time ເຊື່ອມຕໍ່ກັບລະບົບການແຈ້ງອາກອນຂອງວິສາຫະກິດຂະໜາດໃຫຍ່ eRP, ລະບົບການແຈ້ງຊໍາລະອາກອນຂອງຫົວໜ່ວຍວິສາຫະກິດ SME ແລະ ລະບົບການຊໍາລະຜ່ານທຸກທະນາຄານທຸລະກິດຂອງ Lapnet ເຮັດໃຫ້ມີຄວາມສະດວກສະບາຍໃນການເກັບກໍາກວດກາຂໍ້ມູນ ແລະ ຊຳລະພັນທະອາກອນຜ່ານລະບົບທະນາຄານ.
