ໂອມິຄຣອນ ລະບາດທົ່ວໂລກ ຄົນຕິດໂຄວິດເຖິງ 10 ລ້ານຕໍ່ອາທິດ ສູງກວ່າສະຖິຕິເກົ່າເກືອບ 2 ເທົ່າ

ຕົວເລກຜູ້ຕິດເຊື້ອໂຄວິດ-19 ແຕ່ລະອາທິດທົ່ວໂລກເພີ່ມສູງຜ່ານຫລັກສິບລ້ານ ທຳລາຍສະຖິຕິເກົ່າຕອນເດືອນເມສາ 2021.

ວັນທີ 3 ມັງກອນ 2022 ເວັບໄຊ Our World in Data ເປີດເຜີຍຕົວເລກຜູ້ຕິດເຊື້ອໂຄວິດ-19 ທົ່ວໂລກໃນຮອບ 7 ວັນຜ່ານມາ ນັບແຕ່ວັນທີ 27 ທັນວາ 2021 ຫາ 2 ມັງກອນ 2022 ມີລາຍງານເຂົ້າມາເຖິງ 10,15 ລ້ານຄົນ ເຊິ່ງເປັນຕົວເລກສູງທີ່ສຸດນັບແຕ່ເລີ່ມຕົ້ນລະບາດ.

ຈຳນວນດັ່ງກ່າວສູງກວ່າສະຖິຕິເກົ່າຕອນລະບາດຮຸນແຮງກ່ອນໜ້ານີ້ ເມື່ອທ້າຍເດືອນເມສາ 2021 ທີ່ມີລາຍງານເຂົ້າມາ 5,79 ລ້ານຄົນ.

ເຖິງວ່າການລະບາດຄັ້ງໃຫຍ່ນີ້ຈະຍັງບໍ່ສົ່ງຜົນກະທົບຕໍ່ລະບົບສາທາລະນະສຸກຫລາຍ ເນື່ອງຈາກທົ່ວໂລກມີອັດຕາການສັກວັກຊີນທີ່ສູງໃນຫລາຍພື້ນທີ່ ບວກກັບຫລັກຖານເບື້ອງຕົ້ນຊີ້ວ່າ: ເຊື້ອກາຍພັນສາຍພັນໂອມິຄຣອນທີ່ກຳລັງລະບາດຢູ່ ມີໂອກາດເຮັດໃຫ້ເກີດອາການໜັກນ້ອຍກວ່າສາຍພັນກ່ອນໜ້ານີ້.

ເຖິງຢ່າງໃດກໍຕາມ, ທຸລະກິດບາງປະເພດເຊັ່ນ: ສາຍການບິນ ເລີ່ມຈະໄດ້ຮັບຜົນກະທົບແລ້ວ ຈາກກໍລະນີທີ່ມີນັກບິນ ແລະ ຈຸບິນຈຳນວນໜຶ່ງຕ້ອງເຂົ້າຮັບການກັກຕົວຫລັງຕິດເຊື້ອ ເຮັດໃຫ້ເກີດການຂາດເຂີນດ້ານບຸກຄະລາກອນ ສົ່ງຜົນເຮັດໃຫ້ຖ້ຽວບິນຈຳນວນຫລາຍຕ້ອງຖືກຍົກເລີກໄປໃນຊ່ວງເທດສະການຄຣິດສມາສ ແລະ ປີໃໝ່ຜ່ານມາ.

ອ້າງອີງ:

https://ourworldindata.org/covid-cases