ປີ 2021 ສາມາດເກັບຄ່າພາສີ-ອາກອນຈາກທຸລະກິດນໍ້າມັນເຊື້ອໄຟ 2.503 ຕື້ກວ່າກີບ
ໃນວັນທີ 29 ທັນວາ 2021 ທີ່ກະຊວງການເງິນ, ໄດ້ຈັດກອງປະຊຸມສະຫຼຸບຜົນການຄຸ້ມຄອງການເກັບພັນທະຈາກທຸລະກິດນໍ້າມັນເຊື້ອໄຟ ແລະ ກໍານົດທິດທາງໃນການຄຸ້ມຄອງປີ 2022 ໂດຍການເປັນປະທານຂອງ ທ່ານ ປອ ບຸນເຫຼືອ ສິນໄຊວໍຣະວົງ ຮອງລັດຖະມົນຕີກະຊວງການເງິນ, ມີຫົວໜ້າກົມ, ຮອງຫົວໜ້າກົມ, ຜູ້ຕາງໜ້າກົມທີ່ກ່ຽວຂ້ອງຂອງອົງການກວດກາແຫ່ງລັດ, ກະຊວງປ້ອງກັນຄວາມສະຫງົບ, ກະຊວງອຸດສາຫະກຳ ແລະ ການຄ້າ, ທະນາຄານແຫ່ງ ສປປ ລາວ, ພາສີ-ສ່ວຍສາອາກອນ ປະຈຳນະຄອນຫຼວງວຽງຈັນ, ດ່ານພາສີຂົວມິດຕະພາບ 1, ສະມາຄົມນໍ້າມັນເຊື້ອໄຟເຂົ້າຮ່ວມ.
ກອງປະຊຸມໃນຄັ້ງນີ້ເພື່ອເປັນການທົບທວນຄືນການຈັດຕັ້ງປະຕິບັດຂອງແຕ່ລະກົມກອງ, ຂອດການປະ ສານງານ, ຂອດການເກັບກໍາຂໍ້ມູນ ແລະ ການແລກປ່ຽນເຊິ່ງກັນ ແລະ ກັນໃຫ້ທັນສະພາບການຕາມລະບຽບກົດ ໝາຍ ແລະ ນິຕິກໍາລຸ່ມກົດໝາຍຕ່າງໆທີ່ກະຊວງການເງິນໄດ້ອອກ, ພ້ອມທັງຖອດຖອນ ແລະ ປັບປຸງວຽກງານໃນປີ 2022 ທີ່ຈະມາເຖິງນີ້ໃນການຈັດຕັ້ງປະຕິບັດວຽກງານໃຫ້ສາມາດຈັດຕັ້ງຜັນຂະຫຍາຍໃຫ້ເປັນຮູບປະທໍາໃນຕໍ່ໜ້າ.
ອີງຕາມການລາຍງານຂອງທ່ານ ວົງວັນເພັງ ພູມສະຫວັນ ຮອງຫົວໜ້າກົມພາສີ ກະຊວງການເງິນ ໃນນາມ ຄະນະຊີ້ນໍາກວດກາຕິດຕາມການນໍາເຂົ້າ-ຈໍາໜ່າຍສິນຄ້າປະເພດນໍ້າມັນເຊື້ອໄຟໄດ້ລາຍງານກ່ຽວກັບການຄຸ້ມຄອງນໍາເຂົ້າ ແລະ ທິດທາງໃນການຄຸ້ມຄອງນໍ້າມັນເຊື້ອໄຟຂອງຂະແໜງພາສີ, ໃນໄລຍະຜ່ານມາການຈັດຕັ້ງປະຕິບັດຕາມດໍາລັດສະບັບເລກທີ 331/ນຍ, ລົງວັນທີ 27 ຕຸລາ 2017 ວ່າດ້ວຍທຸລະກິດນໍ້າມັນເຊື້ອໄຟ, ຊຶ່ງໃນຕົ້ນປີ 2021 ບໍລິສັດທີ່ດຳເນີນທຸລະກິດນໍາເຂົ້ານ້ຳມັນເຊື້ອໄຟມີທັງໝົດ 11 ບໍລິສັດ, ບໍລິສັດທີ່ດຳເນີນທຸລະກິດຈໍາໜ່າຍນໍ້າມັນເຊື້ອໄຟ ພາຍໃນມີທັງໝົດ 14 ບໍລິສັດ ແລະ ໃນທ້າຍປີ 2021 ບໍລິສັດທີ່ດຳເນີນທຸລະກິດນໍາເຂົ້ານ້ຳມັນເຊື້ອໄຟມີທັງໝົດ 13 ບໍລິສັດ, ບໍລິສັດທີ່ດຳເນີນທຸລະກິດຈໍາໜ່າຍນໍ້າມັນເຊື້ອໄຟພາຍໃນມີທັງໝົດ 14 ບໍລິສັດ.
ດ່ານນຳເຂົ້ານ້ຳມັນເຊື້ອໄຟມີຈໍານວນ 19 ດ່ານ,ມີປໍ້າຍ່ອຍທົ່ວປະເທດມີທັງໝົດ 2.028 ປໍ້າ, ສາງນ້ຳມັນເຊື້ອໄຟມີຈໍານວນ 158 ສາງ, ແຕ່ເຫັນວ່າສ່ວນຫຼາຍບໍລິສັດບໍ່ທັນໄດ້ແຍກສາງລະຫວ່າງ ບໍລິສັດນໍາເຂົ້າ-ສົ່ງອອກ ແລະ ບໍລິສັດຈໍາໜ່າຍພາຍໃນຢ່າງຂາດຕົວຕາມດໍາລັດສະບັບເລກທີ 331/ນຍ. ການນໍາເຂົ້ານ້ຳມັນເຊື້ອໄຟປີ 2021 ໃນທົ່ວປະເທດມີທັງໝົດ: ຈໍານວນ 1.069 ລ້ານກວ່າລິດ, ມູນຄ່າ 576 ລ້ານໂດລາ, ຄ່າພາສີ-ອາກອນ 2.503 ຕື້ກວ່າກີບ, ກວມເອົາ 30% ຂອງລາຍຮັບພາສີ.
ພ້ອມກັນນັ້ນ,ທ່ານ ໄພທູນ ທ່ຽງລະໄມ ຮອງຫົວໜ້າກົມສ່ວຍສາອາກອນ ກະຊວງການເງິນ ຄະນະຊີ້ນໍາກວດກາຕິດຕາມການນໍາເຂົ້າ-ຈໍາໜ່າຍ ສິນຄ້າປະເພດນໍ້າມັນເຊື້ອໄຟ ໄດ້ລາຍງານວຽກງານການຄຸ້ມຄອງນໍາເຂົ້າ ແລະ ທິດທາງໃນການຄຸ້ມຄອງນໍ້າມັນເຊື້ອໄຟຂອງຂະແໜງສ່ວຍສາອາກອນ, ໃນການຈັດຕັ້ງປະຕິບັດພັນທະອາກອນ ປະເພດຕ່າງໆຂອງບັນດາບໍລິສັດນ້ຳມັນເຊື້ອໄຟ ແລະ ອາຍແກັສພ້ອມທັງກວດກາບັນຊີຂອງບໍລິສັດທີ່ໄດ້ຮັບອະນຸຍາດກ່ອນ ດໍາລັດເລກທີ 331/ນຍ ແລະ ຕາມດຳລັດ 331/ນຍ, ໃນປີ 2021 ຜ່ານມາ ແລະ ວາງທິດທາງແຜນການ ປີ 2022.
ກົມສ່ວຍສາອາກອນໄດ້ສຸມໃສ່ຊຸກຍູ້ໃຫ້ບັນດາບໍລິສັດນໍ້າມັນເຊື້ອໄຟເຂົ້າສູ່ລະບົບການຖືບັນຊີທີ່ຖືກຕ້ອງ, ເຂົ້າໃນລະບົບອາກອນມູນຄ່າເພີ່ມ ແລະ ປະຕິບັດການແຈ້ງ-ມອບອາກອນປະເພດຕ່າງໆ ຕາມລະບຽບກົດໝາຍກຳນົດຢ່າງເຂັ້ມງວດ. ທັງສຸມໃສ່ການກວດກາບັນຊີປະຈໍາປີ ໃນຈໍານວນ 23 ບໍລິສັດນໍ້າມັນເຊື້ອໄຟທີ່ຂື້ນກັບການຄຸ້ມຄອງຂອງກົມ ແລະ ແນະນໍາໃຫ້ບັນດາແຂວງສຸມໃສ່ກວດກາບໍລິສັດທີ່ຂື້ນກັບແຂວງ ແລະ ບັນດາສາເຫດທີ່ເຮັດໃຫ້ເກີດຂໍ້ຄົງຄ້າງ, ພ້ອມທັງປຶກສາຫາລືເປັນເອກະພາບເພື່ອຊອກຫາທາງແກ້ໄຂຮ່ວມກັນກັບຂະແໜງການທີ່ກ່ຽວຂ້ອງເພື່ອຊ່ວຍໃຫ້ການຈັດຕັ້ງປະຕິບັດການຄຸ້ມຄອງນໍ້າມັນເຊື້ອໄຟມີປະສິດທິຜົນ ແລະ ໄດ້ຮັບການແກ້ໄຂໃຫ້ດີຂຶ້ນກວ່າເກົ່າ.
