ອຸດົມໄຊ ປະກາດອະໄພຍະໂທດຫຼຸດຜ່ອນໂທດ ແລະ ປ່ອຍຕົວນັກໂທດ

ພິທີປະກາດ ອະໄພຍະໂທດຫຼຸດຜ່ອນໂທດ ແລະ ປ່ອຍຕົວນັກໂທດ ປະຈໍາປີ 2021 ໄດ້ຈັດຂຶ້ນໃນວັນທີ 31 ທັນວາ 2021 ຜ່ານມາ ທີ່ຫ້ອງປະຊຸມ ອົງການໄອຍະການປະຊາຊົນແຂວງອຸດົມໄຊ ໂດຍການເປັນປະທານຂອງທ່ານ ສົມຈິດ ປັນຍາສັກ ຮອງເຈົ້າແຂວງ ປະທານຄະນະກຳມະການອະໄພຍະໂທດ ຂັ້ນແຂວງ. ມີຄະນະກໍາມະການອະໄພຍະໂທດ ຂັ້ນແຂວງ ແລະ ນັກໂທດຜູ້ທີ່ມີຄວາມກ້າວໜ້າ ແລະ ມີເງື່ອນໄຂໄດ້ຮັບການອະໄພຍະໂທດເຂົ້າຮ່ວມ.

ທ່ານ ສົມຈິດ ປັນຍາສັກ ກ່າວວ່າ: ພັກ ແລະ ລັດໄດ້ຕົກລົງໃຫ້ອະໄພຍະໂທດປ່ອຍຕົວ ແລະ ອະໄພຍະໂທດຫຼຸດຜ່ອນໂທດ ໃຫ້ແກ່ນັກໂທດຜູ້ທີ່ມີຄວາມກ້າວໜ້າໃນການດັດສ້າງຄັ້ງນີ້ ເພື່ອຂໍ່ານັບຮັບຕ້ອນ ວັນຊາດທີ 2 ທັນວາຄົບຮອບ 46 ປີ , ເປັນການປະຕິບັດນະໂຍບາຍທາງດ້ານມະນຸດສະທຳຂອງ ພັກ ແລະ ລັດຖະບານລາວ ຕໍ່ຜູ້ກະທຳຜິດ, ຕໍ່ບັນດານັກໂທດທີ່ໄດ້ກະທຳຜິດ ທາງອາຍາໃນສະຖານຕ່າງໆ, ເປັນການສຶກສາອົບຮົມຜູ້ຖືກລົງໂທດ ໃຫ້ມີຄວາມຮູ້ສຶກກິນແໜງແຄງໃຈຕໍ່ການກະທຳຜິດຂອງຕົນ, ມີຄວາມຈິງໃຈໄຊ້ແທນຄ່າເສຍຫາຍທາງແພ່ງທີ່ເນື່ອງມາຈາກການກະທຳຜິດຂອງຕົນ, ຈິງໃຈດັດສ້າງ ແລະ ກໍ່ສ້າງຕົນເອງໃຫ້ມີຈິດໃຈບໍລິສຸດຕໍ່ການອອກແຮງງານ, ປະຕິບັດກົດໝາຍຢ່າງຖືກຕ້ອງ ແລະ ເຂັ້ມງວດ, ມີສະຕິ ເຄົາລົບລະບຽບການດຳລົງຊີວິດຢູ່ໃນສັງຄົມ, ພ້ອມທັງປ້ອງກັນບໍ່ໃຫ້ການກະທຳຜິດເທື່ອໃໝ່ເກີດຂຶ້ນອີກ, ເພື່ອເຮັດໃຫ້ນັກໂທດຜູ້ທີ່ໄດ້ຮັບການອະໄພຍະໂທດ, ຮູ້ບຸນຄຸນ ຂອງພັກ – ລັດຖະບານກໍຄືການນຳຂອງແຂວງທີ່ຍາມໃດກໍມີນະໂຍບາຍອັນຖືກຕ້ອງຕໍ່ນັກໂທດ ແລະ ກໍຢາກໃຫ້ກຸ່ມຄົນເຫຼົ່ານີ້ມີຄວາມຕື່ນຕົວສູງໃນເວລາປະຕິບັດໂທດ ແລະ ຈິງໃຈກໍ່ສ້າງຕົນເອງໃຫ້ເປັນຄົນດີແລ້ວກັບຄືນສູ່ສັງຄົມ, ຕັ້ງໜ້າດັດສ້າງ ແລະ ຝຶກຝົນຫຼໍ່ຫຼອມຕົນເອງໃຫ້ກາຍເປັນພົນລະເມືອງດີ, ມີຄຸນສົມບັດສິນທຳປະຕິວັດ, ມີຄວາມຈົງຮັກພັກດີຕໍ່ປະເທດຊາດ, ຕໍ່ປະຊາຊົນ, ເຄົາລົບລະບຽບກົດ
ໝາຍຂອງບ້ານເມືອງຢ່າງເຂັ້ມງວດ ດຳລົງຊີວິດດ້ວຍຄວາມປອດໃສ ແລະ ຊື່ສັດ.

ປີ 2021 ແຂວງອຸດົມໄຊ ມີນັກໂທດທີ່ໄດ້ຮັບການອະໄພຍະໂທດ ທັງໝົດ 35 ຄົນ, ຍິງ 11 ຄົນໃນນີ້ໄດ້ຮັບການອະໄພຍະໂທດຜ່ອນໂທດ 12 ເດືອນ 1 ຄົນ, ຖືກຜ່ອນ 9 ເດືອນ 28 ຄົນ, ຍີງ 9 ຄົນ ແລະ ໄດ້ຮັບການອະໄພຍະໂທດປ່ອຍຕົວ 6 ຄົນ, ຍິງ 2 ຄົນ.

ທ່ານ ສົມ ປັນຍາສັກ ໄດ້ຮຽກຮ້ອງບັນດານັກໂທດທີ່ພວມປະຕິບັດໂທດຢູ່ຄ້າຍຄຸມຂັງ – ດັດສ້າງ ໃນປັດຈຸບັນຈົ່ງພ້ອມກັນຕັ້ງໜ້າແຂ່ງຂັນ, ຝຶກຝົນຫຼໍ່ຫຼອມຕົນເອງໃຫ້ກາຍເປັນພົນລະເມືອງດີ ເພື່ອຈະມີໂອກາດກັບຄືນສູ່ສັງຄົມຄືດັ່ງບັນດາຜູ້ທີ່ໄດ້ຮັບການໃຫ້ອະໄພຍະໂທດຜ່ອນໂທດ ແລະ ປ່ອຍຕົວ.