ອາຟຣິກາໃຕ້ຫລຸດຜ່ອນຄວບຄຸມໂຄວິດ ປະເມີນ “ໂອມິຄຣອນ” ຜ່ານຈຸດຮ້າຍແຮງແລ້ວ ລັດຖະບານຢືນຢັນແພ່ເຊື້ອໄວແຕ່ບໍ່ຮຸນແຮງ

ລັດຖະບານອາຟຣິກາໃຕ້ລະບຸ ໂຄວິດໂອມິຄຣອນລະບາດໃນປະເທດຈົນຜ່ານຈຸດຮ້າຍແຮງແລ້ວ, ຢືນຢັນແພ່ເຊື້ອໄວແຕ່ບໍ່ຮຸນແຮງ ພ້ອມສັ່ງຜ່ອນຄາຍມາດຕະການບາງສ່ວນ.

ວັນທີ 31 ທັນວາ 2021, ຄະນະລັດຖະບານຊຸດພິເສດຂອງລັດຖະບານອາຟຣິກາໃຕ້ອອກຖະແຫລງການໃນວັນທີ 30 ທັນວາ ລະບຸເຖິງການລະບາດຂອງໂຄວິດ-19 ຮອບທີ 4 ໃນປະເທດ ຜົນຈາກໄວຣັສໂຄວິດສາຍພັນໂອມິຄຣອນ ໂດຍຊີ້ວ່າ: ຈາກຂໍ້ມູນຕ່າງໆບົ່ງຊີ້ໄປໃນທາງດຽວກັນວ່າ: ຕົວເລກຜູ້ຕິດເຊື້ອໂຄວິດຮອບທີ 4 ໃນອາຟຣິກາໃຕ້ໄດ້ຜ່ານຈຸດຮ້າຍແຮງໄປແລ້ວ.

ລັດຖະບານອາຟຣິກາໃຕ້ລະບຸວ່າ: ໃນອາທິດຜ່ານມາ ຈົນຮອດວັນທີ 25 ທັນວາ ຈຳນວນຜູ້ຕິດເຊື້ອໂຄວິດຫລຸດລົງເຖິງ 29,7% ເປັນ 89,781 ຄົນ ຈາກທີ່ພົບຜູ້ຕິດເຊື້ອໂຄວິດໃນອາທິດກ່ອນໜ້າ 127.753 ຄົນ ເຊັ່ນດຽວກັບຈຳນວນຜູ້ຕິດເຊື້ອໂຄວິດເຂົ້າໂຮງໝໍທີ່ມີອັດຕາຫລຸດລົງໃນເກືອບທຸກແຂວງ.

ສ່ວນອັດຕາຜູ້ເສຍຊີວິດຈາກໂຄວິດ-19 ຫລ້າສຸດ ລັດຖະບານອາຟຣິກາໃຕ້ປະເມີນວ່າ: ມີຈຳນວນຜູ້ເສຍຊີວິດເພີ່ມຂຶ້ນໃນທຸກແຂວງ, ແຕ່ຕົວເລກດັ່ງກ່າວບໍ່ໄດ້ເປັນການເພີ່ມຢ່າງມີໄນສຳຄັນແຕ່ຢ່າງໃດ.

ຈາກຂໍ້ມູນເຫລົ່ານີ້ເຮັດໃຫ້ລັດຖະບານອາຟຣິກາໃຕ້ລະບຸວ່າ: ໄວຣັສໂຄວິດສາຍພັນໂອມິຄຣອນມີອັດຕາການແພ່ເຊື້ອສູງ, ແຕ່ມີອັດຕາຜູ້ຕິດເຊື້ອເຂົ້າໂຮງໝໍຕໍ່າກວ່າການລະບາດໃນຮອບຜ່ານມາ ເຮັດໃຫ້ລະບົບສາທາລະນະສຸກປົກກະຕິຂອງປະເທດມີປະສິດທິພາບຮອງຮັບໄດ້ຢ່າງພຽງພໍ.

ການປະເມີນຂອງລັດຖະບານອາຟຣິກາໃຕ້ ເຮັດໃຫ້ທາງການຕັດສິນໃຈຜ່ອນຄາຍມາດຕະການຄວບຄຸມໂຄວິດ ໂດຍສະເພາະການຍົກເລີກເຄີຟິວຊ່ວງເວລາກາງຄືນ, ແຕ່ຍັງເນັ້ນໃຫ້ທຸກຄົນປ້ອງກັນການຕິດເຊື້ອຢ່າງເຂັ້ມງວດ, ຈຳກັດການລວມກຸ່ມຂອງຄົນຈຳນວນຫລາຍ, ຮັກສາໄລຍະຫ່າງ ແລະ ໃສ່ຜ້າປິດປາກ-ດັງໃນບ່ອນສາທາລະນະ ໂດຍເນັ້ນວ່າການບໍ່ໃສ່ຜ້າປິດປາກ-ດັງໃນຈຸດທີ່ກຳນົດອາດຖືກດຳເນີນຄະດີອາຍາ.

ທ່າທີຂອງລັດຖະບານອາຟຣິກາໃຕ້ເກີດຂຶ້ນຂະນະທີ່ອົງການອະນາໄມໂລກ (WHO) ອອກມາເຕືອນວ່າ: ໂລກອາດຜະເຊີນສຶນາມິໂຄວິດຈາກການລະບາດຂອງໂຄວິດສາຍພັນໂອມິຄຣອນ ແລະ ສາຍພັນເດວຕາພ້ອມກັນ ເຊິ່ງການລະບາດໃນຮູບແບບນີ້ອາດສົ່ງຜົນກະທົບຕໍ່ລະບົບສາທາລະນະສຸກໃຫ້ມີຄວາມສ່ຽງລົ້ມສະຫລາຍ.

ສຳລັບອາຟຣິກາໃຕ້ເປັນປະເທດທຳອິດທີ່ລາຍງານການພົບໂຄວິດສາຍພັນໂອມິຄຣອນນັບແຕ່ເດືອນຜ່ານມາ ໂດຍພົບວ່າສາຍພັນດັ່ງກ່າວເປັນເຊື້ອກາຍພັນ ແລະ ເລີ່ມພົບສັນຍານການລະບາດຢ່າງວ່ອງໄວ ກ່ອນຈະກະຈາຍໄປທົ່ວໂລກໃນປັດຈຸບັນ ເຊິ່ງຈຳນວນຜູ້ຕິດເຊື້ອໂຄວິດສະສົມໃນອາຟຣິກາໃຕ້ນັບແຕ່ວັນທຳອິດທີ່ມີການລະບາດມີເກືອບ 3,5 ລ້ານຄົນ ແລະ ມີຜູ້ເສຍຊີວິດ 90.000 ກວ່າຄົນ.

ອ້າງອີງ:

https://www.gov.za/…/cabinet-approves-several-changes…

https://www.bbc.com/news/world-africa-59832843