ກຸ່ມມຸດສະລິມຕິດອາວຸດຢູ່ຟີລິບປິນ ຂ້າຕັດຄໍຕົວປະກັນ 7 ຄົນ
ກຸ່ມມຸດສະລິມຕິດອາວຸດຢູ່ຟີລິບປິນລົງມືຂ້າຕັດຄໍຕົວປະກັນ 7 ຄົນ ເຊິ່ງເປັນກຳມະກອນຕັດໄມ້ທີ່ຖືກລັກພາຕົວໄປຢູ່ຖານທີ່ໝັ້ນຂອງກຸ່ມໃນພາກໃຕ້ຂອງປະເທດໃນອາທິດຜ່ານມາ.
ເຈົ້າໜ້າທີ່ຕຳຫລວດຟີລິບປິນເປີດເຜີຍໃນວັນທີ 30 ກໍລະກົດແລ້ວນີ້ວ່າ: ສົບຂອງຕົວປະກັນທັງ 7 ຄົນຖືກພົບໃນວັນທີ 30 ກໍລະກົດແລ້ວນີ້ ຢູ່ບ້ານເທິງພູແຫ່ງໜຶ່ງໃນເກາະບາຊິລັນ ໂດຍລະບຸວ່າ: ກຸ່ມທີ່ເປັນສະມາຊິກຂອງກຸ່ມມຸດສະລິມຕິດອາວຸດອາບູໄຊຍາບ ທີ່ຢູ່ໃນພື້ນທີ່ດັ່ງກ່າວເປັນຜູ້ລົງມື. ຕຳຫລວດຟີລິບປິນກ່າວອີກວ່າ: ກຸ່ມຂອງທ້າວຟູຣູຈິ ອິນດາມາ ເຊິ່ງເປັນແກນນຳອາວຸໂສຂອງອາບູໄຊຍາບ ລັກພາຕົວກຳມະກອນຕັດໄມ້ ແລະ ສັງຫານພວກເຂົາທັງ 7 ຄົນໃນຄັ້ງນີ້ດ້ວຍສາເຫດຈາກຂໍ້ພິພາດທາງດ້ານທຸລະກິດ ບໍ່ແມ່ນເປົ້າໝາຍເພື່ອຮຽກຄ່າໄຖ່ຄືເຄີຍປະຕິບັດເປັນປະຈຳ. ຕຳຫລວດກ່າວວ່າ: ການກະທຳຄັ້ງນີ້ເປັນການແກ້ແຄ້ນຂອງທ້າວ ອິນດາມາ ທີ່ອາດຈະກ່າວຫາວ່າ: ກຳມະກອນຕັດໄມ້ເຫລົ່ານີ້ໄປທຳລາຍສວນຢາງຂອງເຂົາ ເນື່ອງຈາກກຸ່ມຄົນຮ້າຍບໍ່ໄດ້ຮຽກຮ້ອງຄ່າໄຖ່, ແຕ່ສັງຫານຕົວປະກັນດ້ວຍການຕັດຄໍໂດຍທັນທີ.
