ຜູ້ອຳນວຍການອົງການອະນາໄມໂລກເຕືອນ “ສຶນາມິໂຄວິດ” ຖ້າໂອມິຄຣອນ-ເດວຕາລະບາດພ້ອມກັນ ຢ້ານລະບົບສາທາລະນະສຸກແບກຮັບບໍ່ໄຫວ

ຜູ້ອຳນວຍການອົງການອະນາໄມໂລກ ກັງວົນຜູ້ຕິດເຊື້ອໂຄວິດເພີ່ມສູງເປັນສຶນາມິ ຖ້າໂຄວິດສາຍພັນເດວຕາ ແລະ ໂອມິຄຣອນລະບາດພ້ອມກັນ ຢ້ານເຮັດໃຫ້ລະບົບສາທາລະນະສຸກລົ້ມສະຫລາຍ, ເນັ້ນສາຍພັນໂອມິຄຣອນຍັງເປັນຄວາມສ່ຽງສູງ.

ວັນທີ 30 ທັນວາ 2021, ເວັບໄຊ AI Jazeera ລາຍງານອ້າງການຖະແຫລງຂ່າວຂອງທ່ານ ທີໂດຣສ ອັດຮານອມ ກີບຣີເຍຊຸສ ຜູ້ອຳນວຍການໃຫຍ່ອົງການອະນາໄມໂລກ ທີ່ອອກມາສະແດງຄວາມກັງວົນເຖິງທ່າອ່ຽງທີ່ຫລາຍພື້ນທີ່ທົ່ວໂລກຈະເກີດການລະບາດຂອງໄວຣັສໂຄວິດ-19 ພ້ອມກັນ 2 ສາຍພັນ ໄດ້ແກ່ ສາຍພັນໂອມິຄຣອນ ແລະ ສາຍພັນເດວຕາວ່າ: ສະຖານະການດັ່ງກ່າວອາດເຮັດໃຫ້ເກີດມີຜູ້ຕິດເຊື້ອໃໝ່ເພີ່ມຂຶ້ນຄືສຶນາມິ.

ຜູ້ອຳນວຍການໃຫຍ່ອົງການອະນາໄມໂລກຍັງລະບຸອີກວ່າ: ຖ້າສະຖານະການເປັນແບບນີ້ ມີຄວາມສ່ຽງວ່າ: ລະບົບສາທາລະນະສຸກຈະຕ້ອງຮັບພາລະຢ່າງໜັກຈົນມີຄວາມສ່ຽງທີ່ລະບົບຈະລົ້ມສະຫລາຍໄດ້, ສອດຄ່ອງກັບຂໍ້ມູນຈາກອົງການອະນາໄມໂລກຊີ້ວ່າ: ມີຜູ້ຕິດເຊື້ອເພີ່ມສູງໃນພື້ນທີ່ທີ່ພົບໄວຣັສໂຄວິດສາຍພັນໂອມິຄຣອນລະບາດ ໂດຍໃນເອີຣົບພົບຜູ້ຕິດເຊື້ອໂຄວິດເກີນເຄິ່ງໜຶ່ງຂອງຜູ້ຕິດເຊື້ອທົ່ວໂລກ ຕາມມາແມ່ນທະວີບອາເມລິກາ ແລະ ອາຟຣິກາກ

ເຖິງວ່າກ່ອນໜ້ານີ້ຈະມີການວິໄຈຫລາຍອັນຊີ້ວ່າ: ໄວຣັສໂຄວິດສາຍພັນໂອມິຄຣອນ ອາດມີຄວາມຮຸນແຮງນ້ອຍກວ່າໄວຣັສສາຍພັນກ່ອນໜ້າ ແລະ ໃນຫລາຍພື້ນທີ່ເລີ່ມພົບອັດຕາສ່ວນຜູ້ຕິດເຊື້ອເຂົ້າໂຮງໝໍບໍ່ຫລາຍຄືການລະບາດຮອບກ່ອນໆ. ເຖິງຢ່າງໃດກໍຕາມ, ອົງການອະນາໄມໂລກເນັ້ນວ່າ: ຈາກຫລັກຖານທາງວິທະຍາສາດທີ່ມີຢູ່ຍັງໄວເກີນໄປທີ່ຈະສະຫລຸບແບບນັ້ນ. ພ້ອມຢືນຢັນວ່າ: ຖ້າປະເມີນຄວາມສ່ຽງທັງໝົດຕອນນີ້ ໄວຣັສໂຄວິດສາຍພັນໂອມິຄຣອນຍັງຖືວ່າມີຄວາມສ່ຽງສູງ.

ທ່ານ ໄມເຄິລ ໄຣອັນ ຫົວໜ້າຝ່າຍສຸກເສີນ ອົງການອະນາໄມໂລກ ປະເມີນວ່າ: ການຢຸດຢັ້ງການລະບາດຂອງໂຄວິດ-19 ທັງໃນແງ່ການເຮັດໃຫ້ຈຳນວນຜູ້ຕິດເຊື້ອໜ້ອຍທີ່ສຸດ ລວມທັງການສະກັດບໍ່ໃຫ້ສາຍພັນຕ່າງໆລະບາດຫລາຍໄປກວ່ານີ້ ຄືສິ່ງສຳຄັນທີ່ຕອງເຮັດໃນມໍ່ໆນີ້ ເຊິ່ງອົງການອະນາໄມໂລກຍັງບໍ່ຢາກເບິ່ງພາບໃນແງ່ດີໄປຈົນກວ່າຈະເຫັນວ່າ: ວັກຊີນມີປະສິດທິພາບຕໍ່ຕ້ານໄວຣັສໂຄວິດໄດ້ດີ ໂດຍສະເພາະໃນກຸ່ມຜູ້ສູງອາຍຸ ແລະ ໃນກຸ່ມເບາະບາງ.

ອ້າງອີງ:

https://www.aljazeera.com/…/who-chief-warns-omicron…