ຕົ້ນປີ 2022 ສປປ ລາວ ມີຄວາມພ້ອມສູງໃນການຕ້ອນຮັບນັກທ່ອງທ່ຽວຕ່າງປະເທດ
ທ່ານ ອຸ່ນທວງ ຂາວພັນ ຮອງລັດຖະມົນຕີກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ໃຫ້ສຳພາດຕໍ່ວິທະຍຸກະຈາຍສຽງແຫ່ງຊາດວ່າ: ວັນທີ 1 ມັງກອນ 2022 ສປປ ລາວ ຈະເປີດຮັບນັກທ່ອງທ່ຽວສາກົນໃຫ້ເຂົ້າມາທ່ອງທ່ຽວເຂດສີຂຽວທີ່ກໍານົດໄວ້ ໂດຍຈະທົດລອງເປີດພຽງ 3 ແຂວງຄື: ນະຄອນຫລວງວຽງຈັນ, ຫລວງພະບາງ ແລະ ເມືອງວັງວຽງ ແຂວງວຽງຈັນ ຖ້າຫາກປະສົບຜົນສໍາເລັດກໍຈະຂະຫຍາຍເພີ່ມໄປຫລາຍແຂວງຂຶ້ນ.
ເຊິ່ງມາຮອດປັດຈຸບັນ ທຸກຂະແໜງການໄດ້ມີຄວາມພ້ອມສູງ ໂດຍສະເພາະການກວດຄົນເຂົ້າ-ອອກເມືອງ ຂອງເຈົ້າໜ້າທີ່ຂະແໜງການຕ່າງໆ ເຊັ່ນກະຊວງການຕ່າງປະເທດມີຄວາມພ້ອມການອອກວິຊາ, ກະຊວງສາທາລະນະສຸກມີຄວາມພ້ອມໃນການກວດ ແລະຮັກສາສຸຂະພາບຂອງນັກທ່ອງທ່ຽວ ແລະຂະແໜງການທີ່ກ່ຽວຂ້ອງອື່ນໆ ກໍມີຄວາມພ້ອມເຊັ່ນກັນ, ເຊິ່ງວັນທີ 30 ທັນວາ 2021 ໄດ້ມີການຝຶກຊ້ອມການຕ້ອນຮັບນັກທ່ອງທ່ຽວຢູ່ສະໜາມບິນສາກົນວັດໄຕ, ພ້ອມນັ້ນ ແຕ່ລະແຂວງກໍໄດ້ຝຶກອົບຮົມພະນັກງານດ້ານບໍລິການທີ່ກ່ຽວຂ້ອງໃຫ້ໄດ້ຕາມເງື່ອນໄຂທີ່ລັດຖະບານວາງອອກ, ໂດຍຈະທົດລອງເປີດ 3 ແຂວງກ່ອນ ຄື: ນະຄອນຫລວງວຽງຈັນ, ຫລວງພະບາງ ແລະເມືອງວັງວຽງ ແຂວງວຽງຈັນ, ຍ້ອນວ່າ 3 ແຂວງນີ້ ໄດ້ຮັບຄວາມນິຍົມຈາກນັກທ່ອງທ່ຽວຫລາຍ ໂດຍໃຫ້ນັກທ່ອງທ່ຽວມາທ່ຽວເປັນຄະນະ ແລະປະຕິບັດຕາມລາຍການທີ່ກໍານົດໄວ້ເທົ່ານັ້ນ,
ສຳລັບເຂດທ່ອງທ່ຽວສີຂຽວ ແມ່ນເຂດທ່ອງທ່ຽວທີ່ປອດຈາກພະຍາດໂຄວິດ-19 ຫລື ມີລະບາດນ້ອຍ ເປັນເຂດທີ່ມີການທ່ອງທ່ຽວຂະຫຍາຍຕົວສູງຂອງປະເທດເຮົາ.
