ຈັບໄດ້ຄາເຮືອນ ພ້ອມຢາບ້າກວ່າ 2,000 ເມັດ
December 30, 2021 - 10:15 AM
ແຫລ່ງຂ່າວ ປ້ອງກັນຄວາມສະຫງົບນະຄອນຫລວງວຽງຈັນ ລາຍງານວ່າ: ວັນທີ 27 ທັນວາ 2021, ເຈົ້າໜ້າທີ່ ປກສ ເມືອງສີໂຄດຕະບອງ ນະຄອນຫຼວງວຽງຈັນ ສາມາດແກ້ໄຂເປົ້າໝາຍຢາເສບຕິດ ຢູ່ບ້ານທົ່ງປົ່ງ ໂດຍໄດ້ເຂົ້າຈັບທ້າວ ແສງອາລຸນ ອາຍຸ 32 ປີ ຄາເຮືອນ ທັງກວດຄົ້ນຫ້ອງນອນ ພົບຢາບ້າ 2.468 ເມັດ.
ຜ່ານການສອບສວນເບື້ອງຕົ້ນ, ຜູ້ກ່ຽວຮັບສາລະພາບວ່າ: ຢາບ້າ ຈໍານວນດັ່ງກ່າວ ແມ່ນຂອງຕົນແທ້ໂດຍໄດ້ຊື້ມາໄວ້ຂາຍໃຫ້ກຸ່ມໄວໜຸ່ມທີ່ມົ້ວສຸມເສບຢາ ຢູ່ພາຍໃນບ້ານທົ່ງປົ່ງ ແລະ ບ້ານໃກ້ຄຽງ.
ປັດຈຸບັນ, ເຈົ້າໜ້າທີ່ ປກສ ເມືອງສີໂຄດຕະບອງ ໄດ້ນໍາຜູ້ກ່ຽວໄປກັກຕາມມາດຕະການຄວບຄຸມການແພ່ລະບາດພະຍາດໂຄວິດ ພາຍຫຼັງຄົບກໍານົດເວລາ 14 ວັນ ກໍຈະສືບຕໍ່ດໍາເນີນຄະດີ ຕາມຂະບວນການກົດໝາຍຕໍ່ໄປ.
