ໄຟໄໝ້ໂຮງງານຢາງປລາສຕິກ ຢູ່ບ້ານໂຊກນ້ອຍ ເກີດຈາກໄຟໄໝ້ປ່າຫຍ້າມູນຄ່າເສຍຫາຍ 3 ແສນໂດລາ
ເຈົ້າໜ້າທີ່ພະແນກຕໍາຫລວດສະກັດກັ້ນ ແລະ ຕ້ານອັກຄີໄພນະຄອນຫລວງວຽງຈັນ ລາຍງານວ່າ: ພາຍ ຫລັງໄດ້ຮັບແຈ້ງຈາກປະຊາຊົນໃນເວລາ 14:00 ໂມງ ວັນທີ 27 ທັນວາ 2021 ວ່າເກີດເຫດໄຟໄໝ້ໂຮງງານລີໄຊເຄິນຢາງປລາສຕິກ ຢູ່ບ້ານ ໂຊກນ້ອຍ ເມືອງໄຊເສດຖາ ນະຄອນຫລວງວຽງຈັນ ຈຶ່ງໄດ້ຮີບຮ້ອນນໍາລົດດັບເພີງ 3 ຄັນ ແລະ ກຳລັງພົນ. ຂະນະໄປຈຸດເກີດເຫດ ກໍພົບເຫັນໄຟພວມລຸກໄໝ້ຢ່າງແຮງ. ແນວໃດກໍດີ ພວກເຮົາໄດ້ໃຊ້ເວລາ 5 ຊົ່ວໂມງຈຶ່ງສາມາດມອດໄຟໄດ້.
ຜ່ານການສອບສວນຮູ້ວ່າ: ໂຮງງານດັ່ງກ່າວແມ່ນໂຮງງານຂອງທ້າວ ຂີ່ຊີນຊານ ອາຍຸ 58 ປີ, ສັນຊາດຈີນ ນັກທຸລະກິດ ເຊິ່ງປັດຈຸບັນຢູ່ບ້ານໄຜ່ລ້ອມ ເມືອງໄຊທານີ ນະຄອນຫລວງວຽງຈັນເຊິ່ງເປັນໂຮງງານລີໄຊເຄິນຢາງປລາສຕິກ ຂອງບໍລິສັດ ລ້ານທຽນ ມີເນື້ອທີ່ 2 ແຮັກຕາ.
ຫລັງເກີດເຫດ ພົບກອງປລາສຕິກ 1 ກອງ ຂະໜາດ 40×40 ແມັດ ຖືກໄໝ້ໝົດ ລວມມູນຄ່າເສຍຫາຍ 300.000 ໂດລາ. ຂະນະທີ່ສາເຫດເກີດອັກຄີໄພຍ້ອນໄຟໄໝ້ປ່າຫຍ້າຢູ່ທາງໂຮງງານ ແລ້ວລຸກລາມເຂົ້າໃສ່ໂຮງງານ.
