ອາເມລິກາ ພົບເດັກຕິດໂຄວິດ-19 ເຂົ້າໂຮງໝໍ ເພີ່ມຂຶ້ນຕໍ່ເນື່ອງ ໂດຍສະເພາະເດັກນ້ອຍ ທີ່ອາຍຸບໍ່ເຖິງເກນສັກວັກຊີນ
ອາເມລິກາ ເປັນຫ່ວງຈຳນວນເດັກນ້ອຍຕິດເຊື້ອໂຄວິດ-19 ແລະ ຕ້ອງເຂົ້າປິ່ນປົວໃນໂຮງໝໍເພີ່ມຂຶ້ນຕໍ່ເນື່ອງ. ຂະນະທີ່ໂອມິຄຣອນຍັງລະບາດໜັກທົ່ວປະເທດ ເຄິ່ງໜຶ່ງຂອງຜູ້ຕິດເຊື້ອເປັນເດັກນ້ອຍທີ່ມີອາຍຸບໍ່ເຖິງ 5 ປີ ເຊິ່ງຍັງບໍ່ເຖິງເກນສັກວັກຊີນ.
ວັນທີ 28 ທັນວາ 2021, ສຳນັກຂ່າວຊີເອັນເອັນລາຍງານວ່າ: ອາເມລິກາພົບເດັກຕິດເຊື້ອໂຄວິດ-19 ເຂົ້າປິ່ນປົວຢູ່ໂຮງໝໍເພີ່ມຈຳນວນຂຶ້ນຢ່າງໜ້າເປັນຫ່ວງ ໂດຍໃນອາທິດຜ່ານມາພຽງອາທິດດຽວມີເດັກນ້ອຍທົ່ວປະເທດຕ້ອງເຂົ້າປິ່ນປົວໃນໂຮງໝໍຈາກການຕິດເຊື້ອໂຄວິດ-19 ສູງເຖິງ 35%.
ດຣ. ໂຣເບີຕາ ເດເບຍຊີ ຫົວໜ້າພະແນກຕິດເຊື້ອຂອງໂຮງໝໍເດັກແຫ່ງຊາດ (Chidren’s National Hospital) ໃນນະຄອນຫລວງວໍຊິງຕັນ ເປີດເຜີຍຕໍ່ຊີເອັນເອັນ ໃນວັນທີ 27 ທັນວາວ່າ: ເດັກນ້ອຍທີ່ເຂົ້າຮັບການກວດຫາເຊື້ອໂຄວິດ-19 ໃນໂຮງໝໍຖືກກວດພົບວ່າຕິດເຊື້ອເກືອບເຄິ່ງໜຶ່ງ ເຊິ່ງສະແດງໃຫ້ເຫັນວ່າ ໄວຣັສສາຍພັນໂອມິຄຣອນສາມາດແພ່ກະຈາຍໃນຊຸມຊົນໄດ້ໄວສໍ່າໃດ.
“ເຮົາໄດ້ເຫັນການເພີ່ມຂຶ້ນຢ່າງຊັດເຈນ ທັງໃນແງ່ຂອງປະລິມານ, ຈຳນວນຜູ້ທີ່ມີຜົນການກວດຫາເຊື້ອເປັນບວກ ແລະ ເປີເຊັນຂອງຜູ້ທີ່ມີຜົນກວດເປັນບວກ ໃນຈຳນວນຜູ້ທີ່ເຂົ້າມາກວດຫາເຊື້ອໂຄວິດ-19 ທັງໝົດ ມີເກືອບເຄິ່ງໜຶ່ງ ຫລື 48% ທີ່ມີຜົນການກວດເປັນບວກ ຖືວ່າເພີ່ມຂຶ້ນຫລາຍເມື່ອທຽບໃສ່ການລະບາດຮອບກ່ອນໜ້ານີ້ ເຊິ່ງພວກເຮົາພົບຜູ້ຕິດເຊື້ອຢູ່ປະມານວັນລະ 80 ຄົນ, ແຕ່ຕອນນີ້ບາງວັນມີຜູ້ຕິດເຊື້ອທີ່ຖືກກວດພົບສູງເກືອບ 200 ຄົນ ສະແດງໃຫ້ເຫັນວ່າ ໄວຣັສສາຍພັນໃໝ່ນີ້ສາມາດຕິດຕໍ່ໄດ້ງ່າຍຫລາຍ” ດຣ. ເດເບຍຊີ ກ່າວໃນຂະນະໃຫ້ສຳພາດທາງໂທລະພາບ.
ເຖິງຢ່າງໃດກໍຕາມ, ດຣ. ເດເບຍຊີ ຍັງຢືນຢັນວ່າ: ຈົນຮອດຕອນນີ້ຍັງບໍ່ພົບຂໍ້ມູນຊີ້ວ່າ ໄວຣັສສາຍພັນໂອມິຄຣອນເຮັດໃຫ້ຜູ້ຕິດເຊື້ອມີອາການຮຸນແຮງຫລາຍກວ່າສາຍພັນກ່ອນໆ ໂດຍທ່ານໄດ້ອະທິບາຍວ່າ: “ພວກເຮົາຍັງບໍ່ພົບວ່າມີຜູ້ຕິດເຊື້ອທີ່ມີອາການຮຸນແຮງແຕກຕ່າງໄປຈາກເກົ່າ”.
ຂະນະດຽວກັນ, ດຣ. ແລຣີ ໂອຈິໂອເລກ ຜູ້ຊ່ຽວຊານດ້ານພະຍາດຕິດເຊື້ອຂອງໂຮງໝໍເດັກ Ann & Robert H. Lurie Children’s Hospital ໃນຊິຄາໂກ ໄດ້ອອກມາເປີດເຜີຍໃນລັກສະນະດຽວກັນວ່າ: ມີເດັກນ້ອຍຖືກກວດພົບວ່າຕິດເຊື້ອໂຄວິດ-19 ເພີ່ມຈຳນວນຂຶ້ນຫລາຍແບບບໍ່ໜ້າເຊື່ອ.
ດຣ. ໂອຈິໂອເລກ ກ່າວວ່າ: “ໃນອາທິດຜ່ານມາ ມີເດັກຕິດເຊື້ອໂຄວິດ-19 ທີ່ມາປິ່ນປົວຢູ່ໂຮງໝໍເພີ່ມຂຶ້ນເຖິງ 4 ເທົ່າຈາກລະດັບພື້ນຖານຂອງພວກເຮົາ, ແຕ່ໂຊກດີທີ່ເດັກສ່ວນຫລາຍຍັງບໍ່ມີອາການຮຸນແຮງ ຫລື ເປັນການກວດພົບເຊື້ອໂດຍບັງເອີນຈາກການຄັດກອງກ່ອນຈະມາປິ່ນປົວດ້ວຍພະຍາດອື່ນໆ ແລະ ພວກເຮົາຍັງບໍ່ເຫັນການປ່ຽນແປງຂອງຈຳນວນຜູ້ຕິດເຊື້ອເດັກທີ່ຕ້ອງເຂົ້າປິ່ນປົວໃນຫ້ອງໄອຊີຢູ”.
ດຣ. ໂອຈິໂອເກ ຍັງກ່າວວ່າ: ໃນບັນດາເດັກນ້ອຍທີ່ມາປິ່ນປົວໃນໂຮງໝໍຈາກການຕິດເຊື້ອໂຄວິດ-19 ນັ້ນ ມີເຄິ່ງໜຶ່ງທີ່ເປັນເດັກອາຍຸນ້ອຍກວ່າ 5 ປີ ເຊິ່ງເປັນກຸ່ມໄວທີ່ຍັງບໍ່ມີສິດສັກວັກຊີນປ້ອງກັນເຊື້ອໄວຣັສ ເຊິ່ງສະແດງໃຫ້ເຫັນວ່າ ວັກຊີນອາດຈະມີຜົນກະທົບຕໍ່ເດັກທີ່ມີອາຍຸຫລາຍກວ່າ 5 ປີ ເພາະເດັກທີ່ເຂົ້າມາໂຮງໝໍສ່ວນຫລາຍຍັງບໍ່ໄດ້ສັກວັກຊີນ.
ຊີເອັນເອັນລະບຸວ່າ: ຈາກຂໍ້ມູນຂອງກະຊວງສຸຂະພາບ ແລະ ບໍລິການມະນຸດ (DHHS) ແລະ ສູນຄວບຄຸມ ແລະ ປ້ອງກັນພະຍາດ (CDC) ຂອງອາເມລິກາ ພົບວ່າ: ໃນອາທິດຜ່ານມາ ມີເດັກທີ່ຕິດເຊື້ອໂຄວິດ-19 ເຂົ້າປິ່ນປົວໃນໂຮງໝໍສະເລ່ຍ 262 ຄົນຕໍ່ວັນ ເຊິ່ງເພີ່ມຂຶ້ນເຖິງ 35% ຈາກອາທິດກ່ອນໜ້ານັ້ນ.
ທັງນີ້, ນັບແຕ່ເດືອນສິງຫາ 2020 ຈົນເຖິງປັດຈຸບັນ ມີເດັກຊາວອາເມລິການັບແຕ່ໄວເກີດໃໝ່ໄປຈົນເຖິງອາຍຸ 17 ປີຕ້ອງເຂົ້າປິ່ນປົວໃນໂຮງໝໍຈາກການຕິດເຊື້ອໂຄວິດ-19 ແລ້ວປະມານ 75.000 ຄົນ.
ອ້າງອີງ:
https://edition.cnn.com/…/covid-kids-hospitals/index.html
https://edition.cnn.com/…/us-coronavirus-monday/index.html
