ຫ້ອງກວດໂຄວິດຢູ່ຊິດນີຜິດພາດໜັກ ແຈ້ງປະຊາຊົນເກືອບ 500 ຄົນ ບໍ່ຕິດເຊື້ອທັງທີ່ຜົນເປັນບວກ
ສຳນັກຂ່າວຕ່າງປະເທດລາຍງານເຫດຜິດພາດຄັ້ງໃຫຍ່ທີ່ເກີດຂຶ້ນຈາກຫ້ອງປະຕິບັດການກວດເຊື້ອໂຄວິດແຫ່ງໜຶ່ງໃນນະຄອນຊິດນີ ລັດນິວເຊົາເວລ ຂອງອົດສະຕຣາລີ ຫລັງພົບວ່າມີປະຊາຊົນເກືອບ 500 ຄົນໄດ້ຮັບແຈ້ງວ່າບໍ່ຕິດເຊື້ອໂຄວິດ ທັງທີ່ຄວາມຈິງມີຜົນກວດເຊື້ອເປັນບວກ.
ໂດຍຫ້ອງປະຕິບັດການດັ່ງກ່າວ ເຊິ່ງມີຊື່ວ່າ: SydPath ໄດ້ອອກຖະແຫລງການຂໍໂທດຕໍ່ສິ່ງທີ່ເກີດຂຶ້ນ ແລະ ຍອມຮັບວ່າ: ເກີດຄວາມຜິດພາດໃນການສົ່ງຂໍ້ຄວາມແຈ້ງຜົນກວດເຊື້ອໄປໃຫ້ປະຊາຊົນ 950 ກວ່າຄົນ ໂດຍລະບຸວ່າພວກເຂົາມີຜົນກວດເປັນລົບ ທັງທີ່ຜົນກວດເຫລົ່ານັ້ນຍັງບໍ່ມີຄວາມຊັດເຈນ.
ຂະນະທີ່ຜົນກວດແທ້ຈິງທີ່ໄດ້ຮັບການຢືນຢັນແລ້ວພົບວ່າ: ມີປະຊາຊົນໃນກຸ່ມນີ້ 486 ຄົນ ທີ່ມີຜົນກວດເປັນບວກ.
ສຳນັກຂ່າວ BBC ລາຍງານວ່າ: ໃນຕອນທຳອິດທາງຫ້ອງປະຕິບັດການໄດ້ເປີດເຜີຍວ່າ: ມີການແຈ້ງປະຊາຊົນໄປປະມານ 400 ຄົນເມື່ອຊ່ວງຄຣິດສມາດຜ່ານມາ ວ່າພວກເຂົາບໍ່ຕິດເຊື້ອໂຄວິດ ກ່ອນຈະພົບວ່າເກີດຄວາມຜິດພາດໃນມື້ຕໍ່ມາ ແລະ ຄວາມຜິດພາດນັ້ນໄດ້ຂະຫຍາຍວົງກວ້າງຂຶ້ນ ຫລັງຈາກ SydPath ຍອມຮັບວ່າຍັງມີປະຊາຊົນອີກຫລາຍຮ້ອຍຄົນໄດ້ຮັບຂໍ້ຄວາມແຈ້ງຜົນກວດເຊື້ອເປັນລົບ.
ເຊິ່ງຫລ້າສຸດ ທາງຫ້ອງປະຕິບັດການໄດ້ສົ່ງຂໍ້ຄວາມແຈ້ງຜົນກວດທີ່ແທ້ຈິງໄປໃຫ້ປະຊາຊົນທຸກຄົນແລ້ວໃນຄືນວັນທີ 27 ທັນວາ ພ້ອມທັງຂໍອະໄພຕໍ່ຄວາມຜິດພາດທີ່ເກີດຂຶ້ນ.
ກໍລະນີຄວາມຜິດພາດຄັ້ງນີ້ເກີດຂຶ້ນຫລັງຈາກ SydPath ໄດ້ປ່ຽນຈາກການໃຊ້ລະບົບອັດຕະໂນມັດໃນການແຈ້ງຜົນກວດເຊື້ອ ມາເປັນລະບົບແມນນໍທີ່ໃຫ້ເຈົ້າໜ້າທີ່ດຳເນີນການແຈ້ງຜົນ ເນື່ອງຈາກປະລິມານຜູ້ເຂົ້າຮັບການກວດເຊື້ອໂຄວິດພາຍໃນລັດນິວເຊົາເວລທີ່ເພີ່ມຈຳນວນຂຶ້ນຫລາຍ.
“ຂໍອະໄພທີ່ໃນລະຫວ່າງຂະບວນການແບບແມນນໍນີ້ເກີດຂໍ້ຜິດພາດໃນການປະມວນຜົນຂໍ້ມູນຕາມປົກກະຕິ ເຊິ່ງນຳໄປສູ່ການປ່ອຍຜົນກວດເຊື້ອທີ່ບໍ່ຖືກຕ້ອງ ພວກເຮົາໄດ້ປ່ຽນກັບເປັນລະບົບອັດຕະໂນມັດແລ້ວ ເພື່ອໃຫ້ແນ່ໃຈວ່າຂໍ້ຜິດພາດແບບນີ້ຈະບໍ່ເກີດຂຶ້ນອີກ”
ຖະແຫລງການຂອງ SydPath ລະບຸ. ພ້ອມເຜີຍວ່າ: ຈະດຳເນີນການກວດເຊື້ອໃຫ້ໜ້ອຍລົງ ເພື່ອຮັກສາຄຸນນະພາບໃນການກວດເຊື້ອ.
ສຳລັບປະລິມານການກວດເຊື້ອໂຄວິດໃນລັດນິວເຊົາເວລນັ້ນເພີ່ມສູງຂຶ້ນປະມານ 145.000 ຄັ້ງຕໍ່ວັນ ທ່າມກາງການແພ່ລະບາດຂອງເຊື້ອໂຄວິດສາຍພັນໂອມິຄຣອນ ທີ່ສົ່ງຜົນໃຫ້ຈຳນວນຜູ້ຕິດເຊື້ອໃໝ່ເພີ່ມສູງເຖິງວັນລະ 11.000 ກວ່າຄົນ ໂດຍລັດນິວເຊົາເວລມີຜູ້ຕິດເຊື້ອເພີ່ມຂຶ້ນວັນລະ 6.000 ກວ່າຄົນ.
ຂະນະທີ່ຄລີນິກຫລາຍແຫ່ງຕ້ອງປິດ ຫລື ປະຕິເສດຮັບການກວດເຊື້ອ ເນື່ອງຈາກມີອັດຕາກວດເຊື້ອເຕັມຄວາມບັນຈຸ ແລະ ພົບວ່າມີປະຊາຊົນບໍ່ໜ້ອຍແຈ້ງຮ້ອງຮຽນເລື່ອງການລໍຖ້າຜົນກວດເຊື້ອທີ່ຍາວນານ ເຊິ່ງບາງຄົນບອກວ່າຕ້ອງລໍຖ້າເຖິງ 6 ວັນ.
ອ້າງອີງ:
https://www.9news.com.au/…/e2c1c80d-b667-4f40-b412…
https://www.bbc.com/news/world-australia-59752091
