ອິນເດຍກຽມຮັບມືໂອມິຄຣອນ ອະນຸມັດສຸກເສີນຢາຕ້ານໂຄວິດ-19 ໂມລນູພິຣາເວຍ ຄວບວັກຊີນ 2 ຍີ່ຫໍ້

December 28, 2021 - 10:31 PM

ອິນເດຍກຽມຮັບມືໂອມິຄຣອນ ອະນຸມັດສຸກເສີນຢາຕ້ານໂຄວິດ-19 ໂມລນູພິຣາເວຍ ຄວບວັກຊີນ 2 ຍີ່ຫໍ້ - kitchen vibe - ອິນເດຍກຽມຮັບມືໂອມິຄຣອນ ອະນຸມັດສຸກເສີນຢາຕ້ານໂຄວິດ-19 ໂມລນູພິຣາເວຍ ຄວບວັກຊີນ 2 ຍີ່ຫໍ້

ອິນເດຍໄຟຂຽວຢາຕ້ານໄວຣັສ “ໂມລນູພິຣາເວຍ” ພ້ອມວັກຊີນປ້ອງກັນໂຄວິດອີກ 2 ຊະນິດ ກຽມຮັບມືສະກັດໂອມິຄຣອນລະບາດ.

ວັນທີ 28 ທັນວາ 2021, ສຳນັກຂ່າວຣອຍເຕີລາຍງານວ່າ: ອິນເດຍໄດ້ຮັບຮອງການນຳໃຊ້ເປັນກໍລະນີສຸກເສີນໃຫ້ຢາຕ້ານໂຄວິດ-19 ໂມລນູພິຣາເວຍ ຂອງບໍລິສັດ Merck ແລ້ວ ທ່າມກາງການແພ່ລະບາດຂອງໄວຣັສສາຍພັນໂອມິຄຣອນ ເຊິ່ງສົ່ງຜົນໃຫ້ພົບຜູ້ຕິດເຊື້ອເພີ່ມຈຳນວນຂຶ້ນຕໍ່ເນື່ອງ.

ອິນເດຍກຽມຮັບມືໂອມິຄຣອນ ອະນຸມັດສຸກເສີນຢາຕ້ານໂຄວິດ-19 ໂມລນູພິຣາເວຍ ຄວບວັກຊີນ 2 ຍີ່ຫໍ້ - Visit Laos Visit SALANA BOUTIQUE HOTEL - ອິນເດຍກຽມຮັບມືໂອມິຄຣອນ ອະນຸມັດສຸກເສີນຢາຕ້ານໂຄວິດ-19 ໂມລນູພິຣາເວຍ ຄວບວັກຊີນ 2 ຍີ່ຫໍ້

ນອກຈາກນີ້, ກະຊວງສາທາລະນະສຸກອິນເດຍຍັງຮັບຮອງການນຳໃຊ້ວັກຊີນໂຄໂວແວກທີ່ຜະລິດໂດຍສະຖາບັນເຊຣຳອິນເດຍ (SII) ແລະ ວັກຊີນຄໍບີແວກຂອງບໍລິສັດໄບໂອໂລຈິຄໍ ອີ ເພີ່ມອີກຈາກວັກຊີນທີ່ມີໃຊ້ຢູ່ປັດຈຸບັນໃນປະເທດ. ພ້ອມລະບຸວ່າ: ຈະອະນຸຍາດໃຫ້ສັກບູສເຕີໂດສໃຫ້ປະຊາຊົນໃນລັດທີ່ພົບຜູ້ຕິດເຊື້ອສາຍພັນໂອມິຄຣອນເພີ່ມຂຶ້ນຫລາຍ.

ທ່ານ ມານຊຸກ ລັກມານ ມັນດາວິຍາ ລັດຖະມົນຕີວ່າການກະຊວງສາທາລະນະສຸກຂອງອິນເດຍ ກ່າວວ່າ: ການຮັບຮອງການນຳໃຊ້ຄັ້ງນີ້ ຈະສົ່ງຜົນໃຫ້ຢາໂມລນູພິຣາເວຍທີ່ຜະລິດໂດຍບໍລິສັດ 13 ແຫ່ງໃນອິນເດຍ ສາມາດນຳມາໃຊ້ເພື່ອປິ່ນປົວຜູ້ຕິດເຊື້ອໂຄວິດທີ່ຢູ່ໃນໄວຜູ້ໃຫຍ່ໃນປະເທດໄດ້ ໂດຍຈະຢູ່ພາຍໃຕ້ການຄວບຄຸມ.

ທັງນີ້, ຢາໂມລນູພິຣາເວຍ ເປັນຢາຮັບປະທານຕ້ານໄວຣັສໂຄວິດ-19 ທີ່ພັດທະນາໂດຍບໍລິສັດ Merck ຮ່ວມກັບບໍລິສັດ Ridgeback Biotherapeutics) ໂດຍມີຜົນການທົດລອງທາງຄລີນິກພົບວ່າ: ຊ່ວຍຫລຸດຄວາມສ່ຽງໃນການເຂົ້າຮັບການປິ່ນປົວໃນໂຮງໝໍ ຫລື ການເສຍຊີວິດລົງປະມານ 30% ເມື່ອທົດລອງໃຫ້ຢາແກ່ຜູ້ທີ່ບໍ່ໄດ້ຮັບການສັກວັກຊີນ ແລະ ມີຄວາມສ່ຽງສູງວ່າຈະມີອາການຮຸນແຮງ ຫລື ເສຍຊີວິດ.

ລັດຖະມົນຕີສາທາລະນະສຸກອິນເດຍ ລະບຸໃນທະວິດເຕີວ່າ: ນອກຈາກຢາໂມລນູພິຣາເວຍແລ້ວ, ວັກຊີນປ້ອງກັນໂຄວິດ-19 ອີກສອງຊະນິດ ໄດ້ແກ່ ໂຄໂວແວກທີ່ຜະລິດໂດຍສະຖາບັນເຊຣຳອິນເດຍ (SII) ແລະ ວັກຊີນຄໍບີແວກຂອງບໍລິສັດໄບໂອໂລຈິຄໍ ອີ ກໍໄດ້ຮັບການຮັບຮອງເປັນກໍລະນີສຸກເສີີນໃນອິນເດຍແລ້ວເຊັ່ນກັນ.

ການໃຫ້ການຮັບຮອງການນຳໃຊ້ວັກຊີນດັ່ງກ່າວມີຂຶ້ນ ທ່າມກາງຄຳແນະນຳຂອງຜູ້ຊ່ຽວຊານດ້ານການແພດທີ່ອອກມາກະຕຸ້ນໃຫ້ລັດຖະບານເພີ່ມຄວາມພະຍາຍາມໃນການປຸກລະດົມໃຫ້ປະຊາຊົນອອກມາສັກວັກຊີນ, ຂະນະທີ່ບາງລັດໃນອິນເດຍເລີ່ມມີການປະກາດເຄີຟິວ ລວມທັງການປະກາດໃຊ້ມາດຕະການຕ່າງໆ ເພື່ອສະກັດການລະບາດຂອງໂຄວິດ-19 ບໍ່ໃຫ້ຊ້ຳຮອຍສະຖານະການທີ່ເກີດຂຶ້ນໃນຊ່ວງລະດູຮ້ອນຜ່ານມາ ເຊິ່ງສົ່ງຜົນໃຫ້ມີຜູ້ເສຍຊີວິດຫລາຍໝື່ນຄົນໃນຕອນນັ້ນ.

ຣອຍເຕີລະບຸວ່າ: ປັດຈຸບັນອິນເດຍໄດ້ສັກວັກຊີນປ້ອງກັນໂຄວິດ-19 ໃຫ້ປະຊາຊົນແລ້ວປະມານ 1,43 ພັນລ້ານໂດສ ຄິດເປັນປະມານ 62% ຂອງປະຊາຊົນທີ່ມີສິດໄດ້ຮັບວັກຊີນ ໂດຍວັກຊີນຫລັກທີ່ໃຊ້ຄືວັກຊີນແອສຕຣ້າເຊນເນກ້າທີ່ຜະລິດໂດຍສະຖາບັນເຊຣຳອິນເດຍ ແລະ ວັກຊີນໂຄວາຊິນ ຂອງບໍລິສັດພາຣັດ ໄບໂອເທັກ. ຂະນະທີ່ລັດຖະບານມີແຜນຈະເລີ່ມສັກວັກຊີນໃຫ້ຜູ້ທີ່ມີອາຍຸ 15-18 ປີ ນັບແຕ່ວັນທີ 3 ມັງກອນເປັນຕົ້ນໄປ.

ອ້າງອີງ:

https://www.reuters.com/…/india-committee-recommends…/