ປີ 2021 ກະຊວງແຮງງານ ແລະ ສະຫວັດດີການສັງຄົມ ຈັດຫາວຽກເຮັດງານທໍາ ຢູ່ຕະຫລາດແຮງງານພາຍໃນ ແລະ ຕ່າງປະເທດ ໄດ້ 20.244 ຄົນ
ໃນກອງປະຊຸມວິຊາການແຮງງານ ແລະ ສະຫວັດດີການສັງຄົມ (ຮສສ) ທົ່ວປະເທດປະຈຳປີ 2021 ທີ່ຈັດຂຶ້ນໃນວັນທີ 28 ທັນວາ 2021 (ຜ່ານລະບົບທາງໄກ) ທີ່ຫ້ອງຮັບແຂກກະຊວງ ຮສສ ພາຍໃຕ້ການເປັນປະທານຂອງ ທ່ານນາງ ໃບຄຳ ຂັດທິຍະ ລັດຖະມົນຕີກະຊວງ ຮສສ ພ້ອມຂະແໜງການກ່ຽວຂ້ອງເຂົ້າຮ່ວມ.
ທ່ານ ວິໄລພົງ ສີສົມຫວັງ ຫົວໜ້າກົມແຜນການ ແລະ ການຮ່ວມມືສາກົນ ກະຊວງ ຮສສ ໄດ້ສະ ຫລຸບການຈັດຕັ້ງປະຕິບັດວຽກແຮງງານ ແລະ ສະຫວັດດີການສັງຄົມ ປະຈຳປີ 2021 ໂດຍຊີ້ໃຫ້ເຫັນວ່າ: ປີ 2021 ນີ້ ກະຊວງໄດ້ຕັ້ງໜ້າຊຸກຍູ້ສົ່ງເສີມບັນດາຫົວໜ່ວຍແຮງງານພັດທະນາສີມືແຮງງານ ຕາມສາຂາອາຊີບຕ່າງໆ ໄດ້ 21.025 ຄົນ, ຍິງ 9.387 ຄົນ ລື່ນແຜນການປີ 62,81%, ໃນນີ້ ຂະແໜງກະສິກໍາ 6.550 ຄົນ, ອຸດສາຫະກໍາ 10.590 ຄົນ ແລະ ບໍລິການ 3.885 ຄົນ, ທົດສອບສີມືແຮງງານຕາມມາດຕະຖານສີມືແຮງງານແຫ່ງຊາດ 32 ສາຂາອາຊີບ ແລະ ສາຂາອາຊີບຕ່າງໆໄດ້ 63,51% ຂອງແຜນການປີ. ພ້ອມນັ້ນ ຍັງໄດ້ສົ່ງເສີມການຈັດຫາວຽກເຮັດງານທໍາຢູ່ຕະຫລາດແຮງງານພາຍໃນ ແລະ ຕ່າງປະເທດ ໄດ້ 20.244 ຄົນ, ຍິງ 5.346 ຄົນ ບັນລຸ 72,30% ຂອງແຜນການປີ, ໃນນີ້ ຈັດຫາວຽກເຮັດງານທໍາຢູ່ພາຍໃນ ໄດ້ 19.996 ຄົນ, ເກັບກຳຂໍ້ມູນແຮງງານທີ່ກັບຈາກຕ່າງປະເທດທີ່ວ່າງງານ ແລະ ຜູ້ວ່າງງານພາຍໃນທັງໝົດ 496.000 ຄົນ, ໃນນີ້ ວ່າງງານພາຍໃນ 439.082 ຄົນ.
ສໍາລັບປີ 2022 ທີ່ຈະມາເຖິງນີ້ ຈະສູ້ຊົົນ ພັດທະນາສີມືແຮງງານ ຜູ້ທີ່ຈະເຂົ້າສູ່ຕໍາແໜ່ງງານໃໝ່ ຕິດພັນກັບວາລະແຫ່ງຊາດ ໃຫ້ໄດ້ 8.000 ຄົນ; ທົດສອບມາດຕະຖານສີມືແຮງງານ ໃຫ້ໄດ້ 740 ຄົນ; ສ້າງຄູພັດທະນາສີມືແຮງງານພາກທິດສະດີ, ຄູພາກປະຕິບັດຕົວຈິງ, ຄູທົດສອບສີມືແຮງງານໃຫ້ໄດ້ 106 ຄົນ; ພ້ອມທັງ ສົ່ງເສີມການຈັດຫາວຽກເຮັດງານທໍາເຂົ້າສູ່ຕະຫລາດແຮງງານພາຍໃນ ແລະ ຕ່າງປະເທດ ຕິດພັນກັບວາລະແຫ່ງຊາດ ໃຫ້ໄດ້ 54.500 ຄົນ; ລົງເລິກແກ້ໄຂບັນຫາວ່າງງານ ຈາກ 21,8% ລົງມາເປັນ 19,4%; ຂະຫຍາຍການຄຸ້ມຄອງຫົວໜ່ວຍວິສາຫະກິດເພີ່ມໃໝ່ ຕິດພັນກັບວາລະແຫ່ງຊາດ ໃຫ້ໄດ້ 350 ຫົວໜ່ວຍ; ຂຶ້ນທະບຽນຜູ້ປະກັນຕົນໃໝ່ ໃຫ້ໄດ້ 31.500 ຄົນ, ປະຕິບັດນະໂຍບາຍຕໍ່ຜູ້ທີ່ມີຜົນງານ ແລະ ຄຸນງາມຄວາມດີໃນພາລະກິດປະຕິວັດຊາດປະຊາທິປະໄຕໃຫ້ 4.316 ທ່ານເປັນເງິນ 83.384 ລ້ານ, ໃນນີ້ 5 ເປົ້າໝາຍບູລິມະສິດ 4.116 ທ່ານເປັນເງິນ 73.212 ລ້ານກີບ ແລະ ເປົ້າໝາຍທົ່ວໄປ 200 ທ່ານ ເປັນເງິນ 6.000 ລ້ານກີບ; ປັບປຸງຄຸນນະພາບຊີວິດຂອງຄົນພິການໃຫ້ໄດ້ 400 ຄົນ ແລະ ປັບປຸງຄຸນນະ ພາບຊີວິດຂອງຄົນພິການທີ່ອາຍຸສູງໃຫ້ໄດ້ 160 ຄົນ; ສ້າງກອງທຶນຄຸ້ມຄອງໄພພິບັດ ໃຫ້ໄດ້ 16 ແຫ່ງໃນນີ້ ຂັ້ນແຂວງ 3 ແຂວງ ແລະ ຂັ້ນເມືອງ 13 ເມືອງ; ສ້າງນັກສັງຄົມດ້ານຈິດຕະສັງຄົມສະເພາະດ້ານໃຫ້ໄດ້ 59 ຄົນ; ຊ່ວຍເຫຼືອຜູ້ອອກຢາເສບຕິດໂດຍການປະກອບທຶນໃຫ້ສ້າງອາຊີບ-ສ້າງລາຍຮັບ ແລະ ສ້າງໂອກາດມີວຽກເຮັດງານທຳ 1.800 ຄົນ.
