ໄພພິບັດຈາກທຳມະຊາດນັບມື້ຮຸນແຮງໃກ້ຕົວຄົນລາວເຮົາ

ໂດຍ:​ ທິດກໍ່າ

ໃນວັນທີ 24 ທັນວາ 2021 ເວລາ 20:47 ໂມງ ໄດ້ເກີດມີແຜ່ນດິນໄຫວຢູ່ເມືອງຍອດອູ ແຂວງຜົ້ງສາລີ 2 ຄັ້ງ ດ້ວຍຄວາມແຮງສັ່ນສະເທືອນ 5,7 ແລະ 4,6 ຣິກເຕີ ແລະ ກ່ອນໜ້ານັ້ນ 4 ວັນ ຄືໃນວັນທີ 20 ທັນວາ 2021 ເວລາ 5:35 ໂມງ ຢູ່ເມືອງໄຊສະຖານ ແຂວງໄຊຍະບູລີ ກໍໄດ້ມີເຫດການແຜ່ນດິນໄຫວເຖິງ 7 ຄັ້ງ ເຊິ່ງມີຄວາມແຮງສັ່ນສະເທືອນຮຸນແຮງກວ່າທຸກໆຄັ້ງທີ່ຜ່ານໆມາ. ຈາກແຜ່ນດິນໄຫວຄັ້ງນີ້ໄດ້ສ້າງຄວາມເສຍຫາຍທາງດ້ານວັດຖຸຊັບສິນ, ເຮືອນຊານບ້ານຊ່ອງຂອງປະຊາຊົນ ແລະ ຖະໜົນຫົນທາງເພພັງຫລາຍສົມຄວນ.

ນີ້ຖືວ່າເປັນເຫດການ ຫລື ສັນຍານເຕືອນໃຫ້ພວກເຮົາຮູ້ວ່າ ໄພພິບັດທາງທຳມະຊາດ ໂດຍສະເພາະແມ່ນແຜ່ນດິນໄຫວຢູ່ໃນປະເທດລາວຂອງພວກເຮົານັບມື້ຮຸນແຮງ ແລະ ຫຍັບເຂົ້າມາໃກ້ຕົວລາວເຮົາ ໂດຍສະເພາະຢູ່ເມືອງໄຊສະຖານ ແຂວງໄຊຍະບູລີ ມັກມີໃຫ້ເຫັນເກືອບທຸກປີ. ນອກນັ້ນ ຢູ່ແຂວງຜົ້ງສາລີ, ແຂວງຫົວພັນ ໃນບາງປີກໍມີໃຫ້ເຫັນ ເຊິ່ງໃນຍຸກກ່ອນຮ້ອຍປີພັນປີແມ່ນບໍ່ເຄີຍມີໃຫ້ເຫັນ ສຳລັບຢູ່ປະເທດລາວເຮົາ.

ຫາກຕັ້ງໂຈດກັນວ່າ ດ້ວຍສາເຫດໃດຈຶ່ງມີປາກົດການແຜ່ນດິນໄຫວຢູ່ບ້ານເຮົາໃນຍຸກນີ້. ຈາກສາເຫດອັນຕົ້ນຕໍແມ່ນອາດເປັນຍ້ອນການປ່ຽນແປງໝູນວຽນຂອງທຳມະຊາດ ແລະ ຂອງໂລກໃນແຕ່ລະປີ ຫລື ມາເຖິງຍຸກນີ້ ມີການສ້າງສາພັດທະນາຫລາຍກວ່າສະໄໝກ່ອນ ຄົນເຮົາໄດ້ທຳລາຍທຳມະຊາດໃນຈຸດທີ່ບອບບາງຂອງພື້ນໂລກດ້ວຍປັດໄຈ ແລະ ເງື່ອນໄຂຕ່າງໆ ນັບທັງເຕັກນິກວິທະຍາສາດໃນຍຸກນີ້ກໍນັບມື້ກ້າວໜ້າທັນສະໄໝໄປເລື້ອຍໆ.

ຈາກປັດໄຈ ແລະ ເງື່ອນໄຂດັ່ງກ່າວ ຈຶ່ງກໍ່ໃຫ້ເກີດມີແຜ່ນດິນໄຫວ ເຊິ່ງເປັນໄພທຳມະຊາດຊະນິດໜຶ່ງທີ່ມີຜົນກະທົບຕໍ່ມວນມະນຸດໃນທົ່ວໂລກ ທັງເປັນສິ່ງທ້າທາຍຕໍ່ຊີວິດການເປັນຢູ່ຄົນເຮົາທີ່ອາໄສຢູ່ໃນໂລກໜ່ວຍນີ້.

ເຖິງຢ່າງໃດກໍດີ, ສຳລັບປະເທດລາວຂອງພວກເຮົາ ສະພາບແຜ່ນດິນໄຫວເປັນໄພພິບັດເລື່ອງໃໝ່ທີ່ຫາກໍເກີດຂຶ້ນໃນຫລາຍສິບປີຜ່ານມາ, ແຕ່ພວກເຮົາກໍບໍ່ຄວນປະໝາດ ຍ້ອນວ່າຖ້າພວກເຮົາຫາກພ້ອມກັນຕິດຕາມໃນແຕ່ລະປີ ຫລື ແຕ່ລະໄລຍະມັນມີລັກສະນະຮຸນແຮງຂຶ້ນເລື້ອຍໆ.

ສະນັ້ນ ເພື່ອຫລີກເວັ້ນໄພພິບັດນີ້ ພວກເຮົາຕ້ອງໄດ້ຕິດຕາມຂໍ້ມູນຂ່າວສານຢ່າງໃກ້ຊິດຈາກຂະແໜງການທີ່ກ່ຽວຂ້ອງ. ນອກນັ້ນ ສິ່ງປຸກສ້າງພັດທະນາຕ່າງໆໃນຈຸດທີ່ມັກເກີດຕ້ອງທົນທານ ທັງຮັບປະກັນຕໍ່ການກະທົບເສຍຫາຍເປ່ເພ ຍ້ອນວ່າໄພພິບັດດ້ານນີ້ໄດ້ຫຍັບເຂົ້າມາໃກ້ພວກເຮົາແລ້ວ.