ສາຍພັນໃໝ່ ໂອມິຄຣອນ ສາມາດແພ່ເຊື້ອ 2-3 ເທົ່າໄວກ່ວາສາຍພັນແດນຕາ ແລະ ຄາດວ່າການຕິດເຊື້ອຄືນໃໝ່ອາດຈະສູງເຖິງ 5 ເທົ່າ
ທ່ານ ດຣ ຣັດຕະນະໄຊ ເພັດສຸວັນ ຫົວໜ້າກົມຄວາມຄຸມພະຍາດຕິດຕໍ່, ກະຊວງສາທາລະນະສຸກ ລາຍໃນວັນທີ 28 ທັນວາ 2021 ນີ້ວ່າ: ປັດຈຸບັນ, ເຊື້ອໂຄວິດ-19 ສາຍພັນໃໝ່ ໂອມິຄຣອນ (omicron) ໄດ້ແພ່ລະບາດໃນຫລາຍປະເທດທົ່ວໂລກ ເຊິ່ງຂໍ້ມູນໃໝ່ທີ່ນັກວິທະຍາສາດໄດ້ທ້ອນໂຮມມາຈາກຫລາຍມຸມທົ່ວໂລກ ບອກວ່າມັນສາມາດແພ່ເຊື້ອ 2-3 ເທົ່າໄວກວ່າສາຍພັນແດນຕາ ໂດຍໃນເຂດທີ່ມີການລະບາດສາຍພັນດັ່ງກ່າວພວມຈະທົດແທນສາຍພັນກ່ອນໜ້າທີ່ດ້ວຍຄຸນລັກສະນະພິເສດຂອງເຊື້ອທີ່ສາມາດເຂົ້າສູ່ຮ່າງກາຍໄດ້ໄວ ແລະ ສາມາດແພ່ເຊື້ອໄດ້ໄວກວ່າຫລາຍເທົ່າເມື່ອເຂົ້າໃນຈຸລັງ. ມີຂໍ້ມູນພົບເຫັນວ່າ ໂອມິຄຣອນ ສາມາດເພີ່ມທະວີຄູນເປັນ 2 ເທົ່າທຸກໆ 2-4 ວັນ ຊຶ່ງສັ້ນກວ່າສາຍພັນແດນຕາ.
ການສຶກສາທີ່ປະເທດອັງກິດຍັງພົບວ່າ: ໂອມິຄຣອນ ແພ່ໃນຄົວເຮືອນສູງເຖິງ 3.2 ເທົ່າເມື່ອທຽບໃສ່ສາຍພັນແດນຕາ ແລະ ຍັງຄາດຄະເນວ່າອັດຕາການຕິດເຊື້ອຄືນໃໝ່ກັບ ໂອມິຄຣອນ ອາດຈະສູງເຖິງ 5 ເທົ່າ ເມື່ອທຽບໃສ່ສາຍພັນອື່ນໆ. ສຳລັບການປ້ອງກັນດ້ວຍວັກຊີນນັ້ນ,ນັກວິທະຍາສາດຍັງພົບວ່າ:ຖ້າຄົນເຮົາໄດ້ສັກວັກຊີນຄົບຍັງສາມາດມີພູມປ້ອງກັນຕ້ານຕໍ່ສາຍພັນດັ່ງກ່າວ ແລະ ສຳຄັນທີ່ສຸດ ເຂັມກະຕຸ້ນຍິ່ງຈະເພີ່ມອັດຕາການປ້ອງກັນສູງຂຶ້ນຕື່ມ.
ເຖິງວ່າ ສາຍພັນ ໂອມິຄຣອນ ຈະບໍ່ເຮັດໃຫ້ຜູ້ຕິດເຊື້ອກ້າວໄປສູ່ຂັ້ນຮຸນແຮງ ຫລື ວິກິດກໍຕາມ, ແຕ່ກໍສ້າງຄວາມວິຕົກກັງວົນ ເພາະຖ້າຈໍານວນຜູ້ຕິດເຊື້ອຫລາຍເກີນໄປ ກໍຈະສົ່ງຜົນກະທົບຕໍ່ລະບົບສາທາລະນະສຸກໄດ້ເຊັ່ນດຽກັນ. ສູນຄວບຄຸມ ແລະ ປ້ອງກັນພະຍາດໂຄວິດ-19 ຂອງສະຫະລັດອາເມລິກາ ກ່າວວ່າ ຜູ້ທີ່ບໍ່ໄດ້ສັກວັກຊີນ ມີໂອກາດຕິດເຊື້ອພະຍາດໂຄວິດ-19 ຫລາຍກວ່າ ຄົນທີ່ສັກວັກຊີນເຖິງ 5 ເທົ່າ ແລະ ມີໂອກາດເສຍຊີວິດຫລາຍກວ່າ 14 ເທົ່າ.
