ສ ເກົາຫລີ ມອບຫລຽນໄຊການທູດໃຫ້ລັດຖະມົນຕີກະຊວງສາທາລະນະສຸກ
ວັນທີ 27 ທັນວາ 2021 ທີ່ນະຄອຫລວງວຽງຈັນ, ລັດຖະບານແຫ່ງສາທາລະນະລັດເກົາຫລີ ໄດ້ມອບຫລຽນໄຊການທູດ (Diplomatic Service Medal) ໃຫ້ທ່ານ ດຣ ບຸນແຝງ ພູມມະໄລສິດ ລັດຖະມົນຕີ ກະຊວງສາທາລະນະສຸກ ແຫ່ງ ສປປ ລາວ ເພື່ອສະແດງຄວາມຮູ້ບຸນຄຸນ ຕໍ່ຜົນງານອັນຍິ່ງໃຫຍ່ທີ່ໄດ້ປະ ກອບສ່ວນເພີ່ມທະວີສາຍພົວພັນມິດຕະພາບລະຫວ່າງ ສປປ ລາວ ແລະ ສ ເກົາຫລີ ໃນຂະແໜງການຊ່ວຍເຫລືອທາງການເພື່ອການພັດທະນາຕະຫລອດມາ ແລະ ນີ້ເປັນຄັ້ງທຳອິດທີ່ລັດຖະບານສ ເກົາຫລີມອບຫລຽນໄຊການທູດ ໃນຂະແໜງການຊ່ວຍເຫລືອເພື່ອການພັດທະນາ ໃຫ້ແກ່ຕ່າງປະເທດ.
ທ່ານ ອິມມູຮົງ ເອກອັກຄະລັດຖະທູດ ສ ເກົາຫລີ ປະຈຳ ສປປ ລາວ. ກ່າວວ່າ: ເຖິງວ່າພະຍາດໂຄວິດ-19 ຍັງສືບຕໍ່ແພ່ລະບາດ ຢູ່ສປປ ລາວ, ແຕ່ພາຍໃຕ້ການຊີ້ນຳຢ່າງໃກ້ຊິດ ແລະ ການຮ່ວມມືທີ່ດີຂອງລັດຖະມົນຕີກະຊວງສາທາລະນະສຸກ ໄດ້ເຮັດໃຫ້ການພົວພັນຮ່ວມມືລະຫວ່າງກະຊວງສາທາລະນະສຸກ ສ ປປ ລາວ ແລະ ອົງການຈັດຕັ້ງກ່ຽວຂ້ອງຂອງ ສ.ເກົາຫລີ ບັນລຸຜົນສຳເລັດຫລາຍດ້ານ ແລະ ຫວັງວ່າ ການຮ່ວມມືດັ່ງກ່າວ ຈະສືບຕໍ່ໄດ້ຮັບການເສີມຂະຫຍາຍຕໍ່ໄປອີກ.
ການມອບຫລຽນຄັ້ງນີ້, ລັດຖະບານແຫ່ງສາທາລະນະລັດເກົາຫລີ ໄດ້ຕີລາຄາສູງຕໍ່ຜົນງານອັນຍິ່ງໃຫຍ່ຂອງທ່ານ ດຣ ບຸນແຝງ ພູມມະໄລສິດ ທີ່ໄດ້ຊີ້ນຳການຮ່ວມມືລະຫວ່າງ ກະຊວງສາທາລະນະສຸກ ສປປ ລາວ ກັບອົງການສາທາລະນະສຸກສາກົນເກົາຫລີ (KOFIH) ແລະ ອົງການຮ່ວມມືສາກົນແຫ່ງ ສາທາລະ ນະລັດເກົາຫລີ (KOICA) ເພື່ອຂຶ້ນແຜນ ແລະ ຈັດຕັ້ງປະຕິບັດບັນດາໂຄງການຊ່ວຍເຫລືອດ້ານສາທາລະ ນະສຸກຂອງ ສ ເກົາຫລີ ແກ່ ສປປ ລາວ ສຳເລັດຢ່າງຈົບງາມ ເຊິ່ງໄດ້ປະກອບສ່ວນອັນສຳຄັນເສີມຂະ ຫຍາຍການຮ່ວມມື ມິດຕະພາບລະຫວ່າງສອງປະເທດ.
ປັດຈຸບັນ, ສ.ເກົາຫລີ ໄດ້ກຳນົດ ສປປ ລາວ ເປັນປະເທດຄູ່ຮ່ວມມືທີ່ສຳຄັນດ້ານ ODA ແລ້ວ ໂດຍເນັ້ນໃສ່ຊ່ວຍເຫລືອດ້ານການບໍລິຫານນ້ຳ, ສາທາລະນະສຸກ, ການພັດທະນາການສຶກສາ ແລະ ການພັດ ທະນາຊົນນະບົດແກ່ສປປ ລາວ. ເດັ່ນກວ່າໝູ່ແມ່ນໂຄງການພັດທະນາຂະແໜງສາທາລະນະສຸກ ທີ່ໄດ້ຈັດຕັ້ງປະຕິບັດສຳເລັດເປັນຮູບປະທຳແລ້ວບາງໂຄງການ ແລະ ຍັງມີໂຄງການຊ່ວຍເຫລືອເງິນກູ້ດອກເບ້ຍຕໍ່າ ຜ່ານກອງທຶນ EDCF ເພື່ອກໍ່ສ້າງໂຮງໝໍຂະໜາດໃຫຍ່ທີ່ພວມຈັດຕັ້ງປະຕິບັດໃນປັດຈຸບັນ. ຄຽງຄູ່ກັນນັ້ນ, ສ ເກົາຫລີ ຍັງໄດ້ຊ່ວຍເຫລືອລ້າໃນໂຄງການປັບປຸງສຸຂະພາບແມ່ ແລະ ເດັກ, ສະໜອງອຸປະກອນການແພດ ສຳລັບກວດຫາເຊື້ອໂຄວິດ-19, ຊ່ວຍສ້າງນະໂຍບາຍປະກັນສຸຂະພາບ ແລະ ການຝືກອົບຮົມແພດໝໍ ແລະ ພະຍາບານ ເພື່ອຍົກລະດັບຄວາມສາມາດການບໍລິການປີ່ນປົວແກ່ ສປປ ລາວ ອີກດ້ວຍ. ມາຮອດປັດຈຸບັນ ມີແພດໝໍ ແລະ ພະຍາບານລາວ 160 ກວ່າຄົນ ໄດ້ໄປຝຶກອົບຮົມ ຢູ່ ສ ເກົາຫລີ ໂດຍຜ່ານໂຄງການລີຈົງວຸກເຟ້ໂລຊີບ.
