ຈີນເລັ່ງສີດສະເປຂ້າເຊື້ອທົ່ວເມືອງຊີອານ ຫວັງຢຸດໂຄວິດ

ໂຕເລກຜູ້ຕິດເຊື້ອທີ່ຍັງເພີ່ມບໍ່ຢຸດ ເຮັດໃຫ້ທາງການຈີນຕ້ອງລະດົມສີດຢາຂ້າເຊື້ອທົ່ວເມືອງຊີອານ.

ສຳນັກຂ່າວ Bloomberg ລາຍງານວ່າ: ທາງການເມືອງຊີອານ ທາງຕາເວັນຕົກຂອງຈີນ ເລີ່ມໃຊ້ມາດຕະການຂ້າເຊື້ອພະຍາດນັບແຕ່ຕອນຄໍ່າວັນທີ 26 ທັນວາ ຫວັງສະກັດບໍ່ໃຫ້ເຊື້ອລຸກລາມ ຫລັງຈາກຕ້ອງສັ່ງລັອກດາວຊາວເມືອງກວ່າ 13 ລ້ານຄົນໃນອາທິດຜ່ານມາ.

ເຈົ້າໜ້າທີ່ສີດພົ່ນສະເປຂ້າເຊື້ອພະຍາດທົ່ວເມືອງ ລວມທັງຂໍໃຫ້ປະຊາຊົນອັດປ່ອງຢ້ຽມ ແລະ ຫລີກລ່ຽງການສຳຜັດພື້ນຜິວສິ່ງກໍ່ສ້າງຕ່າງໆ ແລະ ຕົ້ນໄມ້ໃບຫຍ້າຕາມຖະໜົນ.

ມາດຕະການຫລ້າສຸດນີ້ເກີດຂຶ້ນຫລັງຈາກຕົວເລກຜູ້ຕິດເຊື້ອແຕ່ລະວັນຂອງເມືອງຊີອານເພີ່ມຂຶ້ນເປັນ 150 ກວ່າຄົນໃນວັນທີ 26 ແລະ 27 ທັນວາ. ຂະນະທີ່ທາງການຄາດວ່າຈະພົບຜູ້ຕິດເຊື້ອເພີ່ມຂຶ້ນອີກຈາກການລົງພື້ນທີ່ກວດຫາເຊື້ອຮອບທີ 4.

ຕົວເລກທີ່ເພີ່ມຂຶ້ນຈຳນວນຫລາຍຂະໜາດນີ້ບໍ່ຄ່ອຍເກີດຂຶ້ນໃນຈີນ ເຊິ່ງເປັນພຽງປະເທດດຽວທີ່ຍັງໃຊ້ມາດຕະການຈຳກັດໂຄວິດໃຫ້ເປັນສູນ (Zero Covid).

ເຖິງຢ່າງໃດກໍດີ, ສື່ທ້ອງຖິ່ນຂອງຈີນລາຍງານວ່າ: ທ່ານ ຈາງປໍລີ່ ທີ່ປຶກສາອາວຸໂສດ້ານການແພດຂອງລັດຖະບານຈີນເຜີຍວ່າ: ຍັງເປັນໄປໄດ້ທີ່ຈີນຈະຄວບຄຸມການແພ່ລະບາດໄດ້ພາຍໃນເດືອນມັງກອນປີໜ້າ ກ່ອນການແຂ່ງຂັນກິລາໂອລິມປິກລະດູໜາວຈະໄຂຂຶ້ນ.