ອັງກິດຕິດໂຄວິດສູງເຖິງ 100.000 ຄົນ ສາມວັນຕິດຕໍ່ກັນ ລອນດອນໜັກສຸດ ເຕືອນປະຊາຊົນ 1 ໃນ 10 ຄົນ ອາດຕິດເຊື້ອ
ອັງກິດພົບຜູ້ຕິດເຊື້ອໂຄວິດ-19 ໃໝ່ສູງເຖິງ 1 ແສນຄົນຕິດຕໍ່ກັນເປັນວັນທີ 3. ຂະນະມີການຄາດຄະເນວ່າຊາວລອນດອນ 1 ໃນ 10 ຄົນ ອາດຕິດເຊື້ອ.
ວັນທີ 25 ທັນວາ 2021, ສຳນັກຂ່າວຕ່າງປະເທດລາຍງານວ່າ: ອັງກິດລາຍງານຕົວເລກຜູ້ຕິດເຊື້ອໂຄວິດ-19 ທຳລາຍສະຖິຕິອີກໃນວັນທີ 24 ທັນວາ ດ້ວຍຈຳນວນຜູ້ຕິດເຊື້ອໃໝ່ທີ່ພົບໃນຮອບ 24 ຊົ່ວໂມງ 122.186 ຄົນ ຖືເປັນການພົບຜູ້ຕິດເຊື້ອເພີ່ມເກີນ 120.000 ຄົນເປັນຄັ້ງທຳອິດນັບແຕ່ໂຄວິດ-19 ເລີ່ມລະບາດ ແລະ ມີຜູ້ຕິດເຊື້ອແຕ່ລະວັນຫລາຍກວ່າ 100.000 ຄົນເປັນວັນທີ 3 ຕິດຕໍ່ກັນ.
ສ່ວນຈຳນວນຜູ້ເສຍຊີວິດຈາກໂຄວິດ-19 ໃນວັນທີ 24 ທັນວາ ມີ 137 ຄົນ ສົ່ງຜົນໃຫ້ຍອດລວມຜູ້ເສຍຊີວິດຈາກໂຄວິດທັງໝົດມີ 147.857 ຄົນ. ຂະນະດຽວກັນ ເມື່ອແຍກສະເພາະຜູ້ຕິດເຊື້ອໄວຣັສສາຍພັນໂອມິຄຣອນພົບວ່າ ມີຜູ້ຕິດເຊື້ອເພີ່ມຂຶ້ນ 23.719 ຄົນ ເຊິ່ງເປັນການເພີ່ມຂຶ້ນແຕ່ລະວັນຫລາຍທີ່ສຸດນັບແຕ່ພົບສາຍພັນດັ່ງກ່າວໃນປະເທດ ສົ່ງຜົນໃຫ້ຍອດລວມຜູ້ຕິດເຊື້ອໂອມິຄຣອນໃນອັງກິດມີ 114.625 ຄົນ.
ສະຖານະການການແພ່ລະບາດຂອງໂຄວິດ-19 ໃນອັງກິດຍັງຮ້າຍແຮງຕໍ່ເນື່ອງ ໂດຍສະເພາະໃນນະຄອນຫລວງລອນດອນທີ່ພົບຜູ້ຕິດເຊື້ອເພີ່ມຂຶ້ນຕໍ່ເນື່ອງ ຫລັງຈາກການເກີດການລະບາດຂອງໄວຣັສສາຍພັນໂອມິຄຣອນ ເຊິ່ງເປັນການເນັ້ນເຖິງຄວາມສາມາດໃນການແພ່ລະບາດຢ່າງວ່ອງໄວຂອງໄວຣັສສາຍພັນໃໝ່.
ຈາກການເຮັດແບບຈຳລອງສະຖານະການວິເຄາະອັດຕາການຕິດເຊື້ອຂອງປະຊາກອນສະເພາະຢູ່ນະຄອນຫລວງລອນດອນຂອງສຳນັກງານສະຖິຕິແຫ່ງຊາດອັງກິດ (ONS) ພົບວ່າ: ອັດຕາການຕິດເຊື້ອໃນເມືອງຫລວງ ເມື່ອວັນທີ 16 ທັນວາ ມີອັດຕາສ່ວນການຕິດເຊື້ອປະມານ 1 ໃນ 35 ຄົນ ແລະ ໂຕເລກດັ່ງກ່າວໄດ້ເພີ່ມສູງຂຶ້ນມາເປັນ 1 ຕໍ່ 20 ຄົນ ໃນວັນທີ 19 ທັນວາ.
ເຖິງຢ່າງໃດກໍຕາມ, ສຳນັກງານສະຖິຕິແຫ່ງຊາດຄາດວ່າ: ມີທ່າອ່ຽງທີ່ຊາວລອນດອນຈະມີອັດຕາການຕິດເຊື້ອເພີ່ມຂຶ້ນເປັນ 1 ໃນ 10 ຄົນ ພາຍໃນວັນທີ 26 ທັນວານີ້ ເຊິ່ງໄດ້ສ້າງຄວາມກັງວົນວ່າອາດສົ່ງຜົນກະທົບຕໍ່ລະບົບສາທາລະນະສຸກ ເຖິງວ່າຈະມີຜົນການສຶກສາຈາກຫລາຍແຫລ່ງບົ່ງຊີ້ວ່າ: ຄວາມສ່ຽງໃນການເຂົ້າໂຮງໝໍຈາກການຕິດເຊື້ອໄວຣັສໂອມິຄຣອນມີນ້ອຍກວ່າໄວຣັສສາຍພັນເດວຕາກໍຕາມ.
ອ້າງອີງ:
https://www.reuters.com/…/one-10-londoners-likely…/
https://www.business-standard.com/…/uk-logs-record-122…
https://edition.cnn.com/…/h_34f32176b0d07fd93fc6ca693ca…
https://www.bloomberg.com/…/n-y-eases-some-work-rules-u…
