ຢ່າໃຫ້ຂໍ້ມູນຄາດເຄື່ອນເປັນຕົວແບ່ງແຍກສາຍສຳພັນອັນດີ

ໂດຍ: ທິດກໍ່າ
ນັບແຕ່ເສັ້ນທາງລົດໄຟຄວາມໄວສູງ ລາວ-ຈີນ ໄດ້ກໍ່ສ້າງສຳເລັດ ແລະ ໄດ້ເປີດບໍລິການຮັບໃຊ້ມວນຊົນມາແຕ່ວັນທີ 3 ທັນວາ 2021 ກໍໄດ້ມີກະແສຂ່າວທີ່ຫລາກຫລາຍໄປທົ່ວພາກພື້ນ ແລະ ທົ່ວໂລກ ກ່ຽວກັບການເປີດເສັ້ນທາງສາຍໃໝ່ ຄືເສັ້ນທາງລົດໄຟຄວາມໄວສູງ ລາວ-ຈີນ. ໃນກະແສຂ່າວທີ່ກ່າວມານີ້ ສ່ວນຫລາຍກໍແມ່ນຜ່ານສື່ອອນລາຍ ບໍ່ວ່າຈະເປັນເຟສບຸກ, ຢູທູບ ແລະ ຜ່ານວິທະຍຸ-ໂທລະພາບທີ່ເຫັນວ່າສອດຄ່ອງວ່ອງໄວຂອງແຕ່ລະແຫລ່ງສື່ມວນຊົນທີ່ຢູ່ພາຍໃນ ແລະ ຕ່າງປະເທດນັ້ນໆ.

ແຕ່ແນວໃດກໍຕາມ, ຜ່ານການຕິດຕາມສະພາບຂ່າວຄາວທີ່ຫລາກຫລາຍສີສັນກວ່າໝູ່ນັ້ນ ກໍແມ່ນສື່ຈາກປະເທດເພື່ອນບ້ານ ໂດຍສະເພາະແມ່ນປະເທດໄທ ທີ່ມີຊາຍແດນຕິດຈອດກັນຫລາຍຮ້ອຍກິໂລແມັດ ນັບທັງພາສາປາກເວົ້າ, ຮີດຄອງປະເພນີທີ່ຄ້າຍຄືກັນທີ່ສຸດ.

ດ້ວຍສາເຫດດັ່ງກ່າວ ການອອກຂ່າວວິເຄາະວິຈານ ບໍ່ວ່າໃນລັກສະນະໃດ, ກໍລະນີໃດໃນເຊີງທາງບວກ ຫລື ທາງລົບກໍສາມາດຮັບຮູ້ ແລະ ເຂົ້າໃຈກັນໄດ້ຢ່າງຊັດເຈນ ເຊິ່ງແຕກຕ່າງຢ່າງຂາດຂັ້ນກັບພາສາຫວຽດນາມ, ກຳປູເຈຍ ຫລືວ່າ ພາສາຈີນທີ່ຕ້ອງໄດ້ຜ່ານການແປ ນອກຈາກຜູ້ທີ່ບໍ່ທັນຮູ້ພາສາຂອງປະເທດດັ່ງກ່າວ.

ແນວໃດກໍດີ, ເມື່ອກ່າວເຖິງວົງການສື່ຂອງໄທ ນັບແຕ່ມື້ເປີດເສັ້ນທາງລົດໄຟຄວາມໄວສູງ ລາວ-ຈີນ ເປັນຕົ້ນມາ ໄດ້ເຮັດໃຫ້ກະແສສື່ຂອງໄທຟົດເຟືອນໄປທັດສະນະຄະຕິຕ່າງໆ ໃນນີ້ກໍມີທາງບວກ ແລະ ທາງລົບ, ແຕ່ສ່ວນຫລາຍແລ້ວແມ່ນມີການເຫັນດີເຫັນພ້ອມຊົມເຊີຍທີ່ລາວມີລົດໄຟຄວາມໄວສູງ ເພາະຈະໄດ້ຮັບຜົນປະໂຫຍດຮ່ວມກັນໃນຖານະກຸ່ມປະເທດອາຊຽນ ແລະ ພາກພື້ນ.

ໃນຄວາມເປັນຈິງແລ້ວ, ການທີ່ລາວ ແລະ ຈີນ ໄດ້ຮ່ວມກັນສ້າງເສັ້ນທາງລົດໄຟຄວາມໄວສູງ ລາວ-ຈີນ ຄັ້ງນີ້ ແມ່ນຍຸດທະສາດຂອງສອງປະເທດທີ່ເປັນເພື່ອນຮ່ວມຊະຕາກຳອັນດຽວກັນຄື: ຍຸດທະສາດຫັນປະເທດລາວທີ່ບໍ່ມີຊາຍແດນຕິດກັບທະເລເປັນປະເທດເຊື່ອມຈອດ ທັງນອນຢູ່ໃນໂຄງການໜຶ່ງແຖບໜຶ່ງເສັ້ນທາງທີ່ມີເປົ້າໝາຍເຊື່ອມຈອດໄປທົ່ວພາກພື້ນ ແລະ ໃນໂລກ. ບໍ່ວ່າໃນສະພາບປັດຈຸບັນ ກໍຄືໃນອະນາຄົດ ຖ້າເສັ້ນທາງສາຍນີ້ສຳເລັດໄປຕາມເປົ້າໝາຍ ກໍຈະມີຜົນປະໂຫຍດສູງສຸດທາງດ້ານການຂົນສົ່ງ, ການຄ້າ, ການລົງທຶນ, ການທ່ອງທ່ຽວ ແລະ ອື່ນໆ. ສ່ວນການກ່າວຫາວ່າລັດຖະບານລາວຕິດໜີ້ຈີນ ແລະ ບໍ່ມີປັນຍາໄຊ້ໜີ້ຈີນນັ້ນກໍບໍ່ແມ່ນຄວາມຈິງ ຜູ້ຕິດໜີ້ແມ່ນບໍລິສັດຮ່ວມທຶນພັດທະນາທາງລົດໄຟ ລາວ-ຈີນ ພາຍໃຕ້ການອຸ້ມຊູຍູ້ໜູນເບິ່ງແຍງຂອງລັດຖະບານສອງປະເທດ.

ສະນັ້ນ, ຈຶ່ງຂໍຮຽກຮ້ອງມາຍັງວົງການສື່ມີຈັນຍາບັນໃນການວິເຄາະເຈາະເລິກຢ່າງພາວະວິໄສ ເພື່ອຄວາມສາມັກຄີໃນຖານະເປັນປະເທດບ້ານໃກ້ເຮືອນຄຽງ. ກົງກັນຂ້າມ ຖ້າຍັງດື້ດ້ານຂົ່ມເພິ່ນຍໍໂຕ ວິເຄາະ ແລະ ເປັນປໍລະປັກ, ອະຄະຕິຕໍ່ ສປປ ລາວ ນັ້ນ ຈະເຮັດໃຫ້ຄວາມສຳພັນ ລາວ-ໄທ ເສົ້າໝອງ ແລະ ເກີດເສິກນ້ຳລາຍຕໍ່ກັນໂດຍບໍ່ມີມື້ສິ້ນສຸດ. ດ້ວຍຄວາມປາຖະໜາດີຈາກປະຊາຊົນລາວ ແລະ ວົງການສື່ມວນຊົນລາວ.