ກຽມເບີກຈ່າຍເງິນເດືອນ-ເງິນອຸດໜູນ-ເງິນນະໂຍບາຍໃຫ້ພະນັກງານທະຫານ, ຕຳຫຼວດຜ່ານລະບົບ ATM

ວັນທີ 23 ທັນວາ 2021 ທີ່ກະຊວງການເງິນ,ໄດ້ຈັດກອງປະຊຸມປຶກສາຫາລືຄົ້ນຄວ້າກ່ຽວກັບການເບີກຈ່າຍເງິນເດືອນ, ເງິນອຸດໜູນ ແລະ ເງິນນະໂຍບາຍຕ່າງໆໃຫ້ແກ່ພະນັກງານທະຫານ, ຕຳຫຼວດຜ່ານລະບົບ ATM ຂອງທະນາຄານພັດທະນາລາວ, ໂດຍການເຂົ້າຮ່ວມເປັນປະທານຂອງທ່ານ ປອ ພູທະນູເພັດ ໄຊສົມບັດ ຮອງລັດ ຖະມົນຕີກະຊວງການງິນ, ມີຜູ້ຕາງໜ້າຈາກກະຊວງປ້ອງກັນຄວາມສະຫງົບ, ກະຊວງປ້ອງກັນປະເທດ, ທະນາຄານພັດທະນາລາວ, ກົມງົບປະມານແຫ່ງລັດ, ຄັງເງິນແຫ່ງຊາດ, ພ້ອມດ້ວຍພາກສ່ວນທີກ່ຽວຂ້ອງເຂົ້້າຮ່ວມ.

ກອງປະຊຸມໃນຄັ້ງນີ້, ໄດ້ຮັບຟັງການນໍາສະເໜີຄວາມພ້ອມຂອງທະນາຄານພັດທະນາລາວ ແລະ ປຶກສາຫາລືຂໍ້ສະດວກ, ຂໍ້ຫຍຸ້ງຍາກ ແລະ ຄວາມເປັນໄປໄດ້ໃນການເບີກຈ່າຍເງິນເດືອນ, ເງິນອຸດໜູນ ແລະ ເງິນນະໂຍ ບາຍຕ່າງໆໃຫ້ແກ່ພະນັກງານ, ທະຫານ, ຕໍາຫຼວດຜ່ານລະບົບ ATM. ພ້ອມດຽວກັນນີ້, ຍັງໄດ້ສະເໜີຄວາມພ້ອມຂອງທະນາຄານພັດທະນາລາວ ໃນການໃຫ້ບໍລິການ, ຮູບແບບ ແລະ ນະໂຍບາຍຕ່າງໆໃຫ້ແກ່ພະນັກງານ-ລັດຖະ ກອນຂອງບັນດາກະຊວງຕ່າງໆ ແລະ ໃນກອງປະຊຸມຕາງໜ້າກະຊວງປ້ອງກັນປະເທດ, ຕາງໜ້າກະຊວງປ້ອງກັນຄວາມສະຫງົບ, ບັນດາທ່ານທີ່ເຂົ້າຮ່ວມໄດ້ຄົ້ນຄວ້າ ແລະ ປະກອບຄຳຄິດເຫັນຢ່າງກົງໄປກົງມາ, ເພື່ອໃຫ້ຄວາມສະ ດວກສະບາຍຂຶ້ນກວ່າເກົ່າ.

ໂອກາດນີ້,ທ່ານ ປອ ພູທະນູເພັດ ໄຊສົມບັດ ໄດ້ສະແດງຄວາມຂອບໃຈຕໍ່ກັບການປະກອບຄໍາເຫັນຢ່າງກົງໄກກົງມາໂດຍອີງໃສ່ເງື່ອນໄຂປັດຈຸບັນ, ກົມງົບປະມານແຫ່ງ, ຄັງເງິນແຫ່ງຊາດໄດ້ປະສານສົມທົບ ແລະ ສືບຕໍ່ການຫັນເປັນທັນສະໄໝການເບີກຈ່າຍເງິນເດືອນ, ເງິນອຸດໜູນຕາມແຜນຍຸດທະການປະຕິຮູບຂອງຂະແໜງການເງິນ, ສຳລັບການຄົ້ນຄວ້າກະກຽມກ່ຽວກັບການເບີກຈ່າຍເງິນເດືອນ, ເງິນອຸດໜູນ ແລະ ເງິນນະໂຍບາຍຕ່າງໆໃຫ້ແກ່ພະນັກງານທະຫານ, ຕຳຫຼວດຜ່ານລະບົບ ATM ຂອງທະນາຄານພັດທະນາລາວ, ສະເໜີການເບີກຈ່າຍເງິນເດືອນເອົາພະນັກງານທີ່ປະຈໍາການຄົງທີ່ນັບແຕ່ 1-2 ປີຂຶ້ນໄປ ແລະ ສະເໜີເອົາກົມກອງທີ່ບໍ່ໄດ້ເຄື່ອນຍ້າຍບ່ອນປະຈໍາການປົກກະຕິບັນດາກົມອອມຂ້າງກະຊວງນໍາອີກດ້ວຍ.

ສຳລັບກະຊວງປ້ອງກັນຄວາມສະຫງົບ, ສະເໜີທົດລອງຢູ່ທົດລອງຢູ່ 3 ພາກສ່ວນຄື: 02 ວິທະຍາຄານ ແລະ 01 ໂຮງໜໍ, ພ້ອມນັ້ນຍັງໄດ້ສະເໜີກະຊວງປ້ອງກັນຄວາມສະຫງົບຄົ້ນຄວ້າເອົາພະນັກງານບັນດາກົມກອງອ້ອມຂ້າງຕື່ມອີກ, ໂດຍສະເພາະພະນັກງານບໍານານ ໃນໄລຍະຜ່ານມາການເບີກຈ່າຍເງິນເດືອນພົບຄວາມຫຍຸ້ງຍາກ ແລະ ບັນຫາອື່ນໆ.