ເຢຍລະມັນ ສະໜອງທຶນ 7,25 ລ້ານເອີໂຣຊ່ວຍພັດທະນາອາຊີວະສຶກສາໃນລາວ

ເມື່ອບໍດົນມານີ້, ໄດ້ມີພິທີລົງນາມສັນຍາການສືບຕໍ່ຈັດຕັ້ງປະຕິບັດໂຄງການພັດທະນາອາຊີວະສຶກສາໃນ ສປປ ລາວ (VELA) ໄລຍະ 2 ແຕ່ປີ 2019-2023 ໂດຍການສະໜັບສະໜູນຊ່ວຍເຫລືອທຶນ ຈາກລັດຖະບານເຢຍລະມັນມູນຄ່າ 7,25 ລ້ານເອີໂຣ ລະຫວ່າງທ່ານ ໜູພັນ ອຸດສາ ຫົວໜ້າກົມອາຊີວະສຶກສາ ກະຊວງສຶກສາທິການ ແລະ ກິລາ, ທ່ານນາງ ບາບາຣາ ສວາຍເກີ (Barbara Schweiger) ຮອງອໍານວຍການອົງການ GIZ ປະຈໍາລາວ ແລະ ທ່ານນາງ ໂດໂຣເທຍ ຄອບພາດ (Dorothea Coppard) ຫົວໜ້າໂຄງການ VELA ກະຊວງການຮ່ວມມືດ້ານເສດຖະກິດ ແລະ ການພັດທະນາ (BMZ) ປະເທດເຢຍລະມັນ.

ພາຍຫລັງໄດ້ຈັດຕັ້ງປະຕິບັດໂຄງການ VELA ໄລຍະ 2 ແຕ່ປີ 2019 ເປັນຕົ້ນມາ, ໂຄງການໄດ້ສະໜູນສະໜູນວິທະຍາໄລເຕັກນິກວິຊາຊີບ 4 ແຫ່ງ ແລະ ສະຖານປະກອບການຫລາຍກວ່າ 100 ເເຫ່ງ ຢູ່ນະຄອນຫລວງວຽງຈັນ, ແຂວງຫລວງພະບາງ, ແຂວງວຽງຈັນ ແລະ ແຂວງຈໍາປາສັກ ໂດຍການພັດທະ ນາ ແລະ ນໍາສະເໜີຫລັກສູດການຮຽນ-ການສອນອາຊີວະສຶກສາແບບຄວບຄູ່ (ອສຄ) 14 ສາຂາ ແລະ ມີນັກຮຽນຫລາຍກວ່າ 1.200 ຄົນເຂົ້າຮຽນແບບຄວບຄູ່ ເຊິ່ງນັກຮຽນສ່ວນຫລາຍໄດ້ມີວຽກເຮັດງານທໍາ ພາຍຫລັງຮຽນຈົບ.

ອສຄ ແຕກຕ່າງຈາກວິທີການຮຽນ-ການສອນແບບດັ້ງເດີມ ທີ່ເນັ້ນໃສ່ການຮຽນ-ການສອນຢູ່ໃນໂຮງຮຽນເປັນຫລັກ. ລະບົບ ອສຄ ໄດ້ເຊື່ອມໂຍງການຮຽນ-ການສອນດ້ານທິດສະດີຢູ່ໃນໂຮງຮຽນໄປຄວບຄູ່ກັບການຝຶກປະຕິບັດເຮັດວຽກຕົວຈິງຫລາຍກວ່າ 50% ຢູ່ສະຖານປະກອບການຄູ່ຮ່ວມງານຕ່າງໆ ທີ່ນັກຮຽນຖືກສົ່ງໄປຮຽນຮູ້ ແລະ ປະຕິບັດຕົວຈິງ ເຊິ່ງວິທີການນີ້ຊ່ວຍໃຫ້ຜູ້ທີ່ຮຽນຈົບ ມີທັກສະທີ່ຈໍາເປັນສໍາລັບການເຮັດວຽກ ຢູ່ສະຖານປະກອບການ. ຂະນະດຽວກັນ, ສະຖານປະກອບການ ກໍມີກໍາລັງແຮງງານ ທີ່ໄດ້ຜ່ານການຝຶກທີ່ດີກວ່າ.

ທ່ານ ໜູພັນ ອຸດສາ ຫົວໜ້າກົມອາຊີວະສຶກສາ ກ່າວວ່າ: ໂຄງການ VELA ໄດ້ຊ່ວຍສ້າງຊັບພະຍາ ກອນມະນຸດທີ່ມີທັກສະຫລາຍດ້ານ ເພື່ອຕອບສະໜອງຄວາມຕ້ອງການຂອງຕະຫລາດແຮງງານໃນ ສປປ ລາວ. ນອກນີ້, ບັນດາວິທະຍາໄລ ທີ່ເປັນຄູ່ຮ່ວມໃນໂຄງການ ກໍເປັນຕົວແບບທີ່ດີໃຫ້ແກ່ໂຮງຮຽນອາຊີວະແຫ່ງຕ່າງໆໃນທົ່ວປະເທດ ແລະ ການສືບຕໍ່ສະໜັບສະໜູນທຶນຂອງລັດຖະບານເຢຍລະມັນໃນໂຄງການນີ້ ຈະຊ່ວຍພວກເຮົາ ນໍາໃຊ້ວິທີການຮຽນ-ການສອນທີ່ມີປະສິດທິພາບ ເພື່ອປັບປຸງ ແລະ ຝຶກອົບຮົມ ໃຫ້ແກ່ຄູອາຊີວະສຶກສາ ໃນຂອບເຂດໄດ້ດີຂຶ້ນ ແລະ ຍືນຍົງ.