ຈັບກຸມຄົນລັກສາຍໄຟຟ້າ ຕາມແລວທາງລົດໄຟເຂດບ້ານຊຽງລ້ອມ ນະຄອນ ຫຼວງພະບາງ

ພັນໂທ ສົມບູນ ທະນາວັນ ຮອງຫົວໜ້າກອງບັນຊາການປ້ອງກັນຄວາມສະຫງົບແຂວງຫຼວງພະບາງ ຫົວໜ້າຫ້ອງຕໍາຫຼວດ ໄດ້ຖະແຫຼງຂ່າວການຈັບກຸມຜູ້ກະທຳຜິດລັກສາຍໄຟຟ້າຕາມແລວທາງລົດໄຟເຂດບ້ານຊຽງລ້ອມ ນະຄອນ ຫຼວງພະບາງ ໃນວັນທີ 21 ທັນວານີ້ວ່າ: ວັນທີ 11 ທັນວາ 2021, ເຈົ້າໜ້າທີ່ພະແນກສືບສວນ-ສອບສວນ ຄະດີອາຍາຂັ້ນແຂວງ ໄດ້ກັກຕົວຜູ້ກະທຳຜິດທີ່ລັກຊັບ (ສາຍໄຟຟ້າ) ຕາມແລວທາງລົດໄຟ ຢູ່ສະຖານີລົດໄຟລາວ-ຈີນ ບ້ານຊຽງລ້ອມ ນະຄອນ ຫຼວງພະບາງ 9 ຄົນ ແລະ ອີກ 1 ຄົນ ຍັງຫລົບໜີ. ຜ່ານການສືບສວນ-ສອບສວນ, ພວກກ່ຽວ ໄດ້ຮັບສາລະພາບວ່າ ໄດ້ກະທຳຜິດລັກຊັບ ແທ້ ທັງໄດ້ບອກຜູ້ຊື້ຂອງກາງຕື່ມອີກ. ທັງນີ້, ເຈົ້າໜ້າທີ່ໄດ້ຢຶດຂອງກາງປະເພດເຫຼັກເສດ ແລະ ສາຍໄຟ ຟ້າເປັນທ່ອນ ແຕ່ລະທ່ອນ ຍາວປະມານ 120 ຊັງຕີແມັດ ລວມ 28 ທ່ອນ ແລະ ສາຍໄຟປອກແລ້ວອີກເກືອບ 200 ກິໂລ ເຊີ່ງປັດຈຸບັນພວມສຳນວນຄຳດີ ສົ່ງໃຫ້ອົງການໄອຍະການປະຊາຊົນແຂວງ ແລະສານປະຊາຊົນແຂວງ ສືບຕໍ່ດຳເນີນຄະດີຕາມຂັ້ນຕອນ, ສ່ວນຜູ້ກະທຳຜິດທີ່ຍັງຫລົບໜີ ຈະສືບຕໍ່ນຳຈັບກຸມໃຫ້ໄດ້.

ພັນໂທ ສົມບູນ ທະນາວັນ ໄດ້ຮຽກຮ້ອງທຸກຄົນໃນສັງຄົມ ຈົ່ງເປັນເຈົ້າການສະກັດກັ້ນປາກົດການຫຍໍ້ທໍ້ ໂດຍເປັນເຈົ້າການປະກອບສ່ວນ ຮັກສາຄວາມສະຫງົບຕາມເສັ້ນທາງລົດໄຟ ເພາະເສັ້ນທາງລົດໄຟລາວ-ຈີນຄືຊັບສົມບັດຂອງຊາດ.

ຜູ້ກະທຳຜິດທີ່ຖືກຈັບກຸມໃນຂໍ້ຫາລັກຊັບປະກອບມີທ້າວ ຈັນສະໝອນ ແກ້ວວົງສາ ອາຍຸ 23 ປີ, ທ້າວ ເຊີນ ປັນຍາສິດ ອາຍຸ 19 ປີ, ທ້າວ ບີ່ງ ອາຍຸ 22 ປີ, ທ້າວ ວັນ ອາຍຸ 35 ປີ ແລະ ທ້າວ ຫອນ ອາ ຍຸ 25 ປີ ທັງ 5 ຢູ່ບ້ານກິ່ວໝາກນາວ 2 ເມືອງຊຽງເງິນ, ນາງ ທອງຈັນ ອາຍຸ 31 ປີ ຢູ່ບ້ານຊຽງລ້ອມ ນະຄອນ ຫຼວງພະບາງ ແລະ ນາງ ແກ້ວ ອີນທະຈັກ ອາຍຸ 37 ປີ ຢູ່ບ້ານຜາວຽງ ນະຄອນ ຫຼວງພະບາງ. ສ່ວນຜູ້ຖືກຂໍ້ຫາການຊື້-ຂາຍຊັບຢ່າງຜິດກົດໝາຍ ປະກອບມີ ທ້າວ ພູຂາວ ສີພັນດອນ ອາຍຸ 60 ປີ ຢູ່ບ້ານໂຄມຂວາງ ນະຄອນ ຫຼວງພະບາງ, ນາງ ທອງຈັນ ອາຍຸ 31 ປີ ຢູ່ບ້ານຊຽງລ້ອມ ນະຄອນ ຫຼວງພະບາງ ແລະ ທ້າວ ເວີນວັນທາວ ອາຍຸ 39 ປີ ສັນຊາດຫວຽດນາມ ປັດຈຸບັນຢູ່ບ້ານນູນສະຫວາດ ນະຄອນ ຫຼວງພະບາງ. ສ່ວນຜູ້ທີ່ຫລົບໜີ ແມ່ນທ້າວ ສົມດາວ ຈັນສຸດາ ອາຍຸ 31 ປີ ຢູ່ບ້ານຜາວຽງ ນະ ຄອນ ຫຼວງພະບາງ ເຊີ່ງເຈົ້າໜ້າທີ່ພວມນຳຈັບກຸມມາດຳເນີນຄະດີຕາມລະບຽບກົດໝາຍ.