ລັດວິສາຫະກິດ ຖືຮຸ້ນລາວ ມອບພັນທະອາກອນປີ 2021ຈໍານວນ 38,54 ຕື້ກວ່າກີບ
ວັນທີ 23 ທັນວາ 2021 ຢູ່ທີ່ກົມສ່ວຍສາອາກອນ ກະຊວງການເງິນ ລັດວິສາຫະກິດ ຖືຮຸ້ນລາວ (ລຮລ) ມອບພັນທະອາກອນປະຈໍາປີ 2021 ຈໍານວນ 38,54 ຕື້ກວ່າກີບ
ຕາງໜ້າມອບຂອງທ່ານ ມານະສິນ ວົງໄຊ ຜູ້ອໍານວຍການລັດວິສາຫະກິດຖືຮຸ້ນລາວ ແລະ ກ່າວຮັບໂດຍ ທ່ານ ທໍາມະລົດ ຣາຊະພົນ ຮັກສາການຫົວໜ້າກົມສ່ວຍສາອາກອນ, ມີທ່ານ ສົມພິດ ແກ້ວວິຈິດ ຫົວໜ້າກົມທຸລະກິດພະລັງງານ, ກະຊວງພະລັງງານ ແລະ ບໍ່ແຮ່, ທັງເປັນຮອງປະທານສະພາບໍລິຫານ ລຮລ, ພ້ອມດ້ວຍຄະນະອຳນວຍການ,ຄະນະກົມສ່ວຍສາອາກອນ, ພ້ອມດ້ວຍພະນັກງານເຂົ້າຮ່ວມ.
ໃນການປະຕິບັດພັນທະມອບອາກອນເຂົ້າງົບປະມານລັດຕາມລະບຽບກົດໝາຍ, ປີ 2021 ລຮລ ໄດ້ມອບອາກອນລາຍໄດ້ລ່ວງໜ້າໃນໄລຍະ 6 ເດືອນຕົ້ນປີ 2021 ຈໍານວນ 1 ຕື້ກີບ ແລະ 6 ເດືອນທ້າຍປີຈໍານວນ 37,54 ຕື້ກ່ວາກີບ.
ໃນປີ 2021 ລຮລ ສາມາດປະຕິບັດພັນທະຕາມສັນຍາຈ່າຍຊຳລະຕົ້ນທຶນເງິນກູ້ຢືມ ແລະ ດອກເບັ້ຍໃຫ້ກະຊວງການເງິນ ໄດ້ທັງໝົດ 42,41 ລ້ານໂດລາສະຫະລັດ, ສຳລັບປີ 2022 ລຮລ ຈະມີລາຍຮັບຈາກການດໍາເນີນທຸລະກິດເພີ່ມຂຶ້ນຫຼາຍກ່ວາເກົ່າ ແລະ ຄາດຈະມອບພັນທະອາກອນເຂົ້າງົບປະມານລັດໄດ້ຫຼາຍຂຶ້ນພ້ອມທັງຈ່າຍຊຳລະໜີ້ເງິນກູ້ຢືມໃຫ້ກະຊວງການເງິນໄດ້ຄົບຖ້ວນຕາມສັນຍາ.
ລຮລ ໄດ້ຮັບການສ້າງຕັ້ງຂຶ້ນໃນວັນທີ 23 ກຸມພາ 2005, ຊຶ່ງເປັນຫົວໜ່ວຍທຸລະກິດໜຶ່ງຂອງລັດທີ່ຂຶ້ນກັບກະຊວງພະລັງງານ ແລະ ບໍ່ ແຮ່ ໂດຍມີກະຊວງການເງິນເປັນເຈົ້າຂອງທຶນ 100% ປັດຈຸບັນ ລຮລ ໄດ້ຮັບມອບໝາຍຈາກລັດຖະບານໃຫ້ເຂົ້າຮ່ວມຖືຮຸ້ນໃນ 4 ໂຄງການ (ໂຄງການໄຟຟ້ານ້ຳເທີນ 2 ຖືຮຸ້ນ 25%), ໂຄງການໄຟຟ້າຄວາມ ຮ້ອນຫົງສາ ຖືຮຸ້ນພາກໂຮງໄຟຟ້າ 20% ແລະ ພາກບໍ່ແຮ່ 25%), ໂຄງການໄຟຟ້າເຊປຽນ-ເຊນໍ້ານ້ອຍ ຖືຮຸ້ນ 24%) ,ໂຄງການໄຟຟ້ານໍ້າງຽບ 1 ຖືຮຸ້ນ 25%).
ນອກນັ້ນ, ລຮລ ຍັງໄດ້ຮັບມອບໝາຍໃຫ້ດຳເນີນທຸລະກິດຈຳໜ່າຍຂີ້ເທົ່າລອຍ ແລະ ຢິບຊຳໃນໂຄງການໄຟຟ້າຄວາມຮ້ອນຫົງສາຕື່ມອີກ.
