ຮັກງົວໃຫ້ຜູກ ຮັກລູກໃຫ້ຕີ
ມາເຖິງຍຸກປັດຈຸບັນນີ້ ການທີ່ເຮົາຮັກງົວແລ້ວໃຫ້ຜູູກ ແລະ ຮັກລູກແລ້ວໃຫ້ຕີ ໂດຍສະເພາະ ຮັກລູກໃຫ້ຕີນັ້ນຄິດວ່າບໍ່ສາມາດຕອບໂຈດໄດ້ ເນື່ອງຈາກ ການລົງໂທດ ເປັນໄພ ຫລື ເປັນອັນຕະລາຍຕໍ່ການພັດ ທະນາເດັກ ຊຶ່ງພັກ-ລັດຖະ ບານເຮົາໄດ້ລະດົມທົ່ວສັງຄົມ ສະກັດກັ້ນການກະທຳຄວາມຮຸນແຮງຕໍ່ເດັກທຸກຮູບແບບ, ແຕ່ແນວໃດກໍດີ ພວກເຮົາຈຳເປັນຕ້ອງສ້າງຄວາມເຂົ້າໃຈໃນອີກແງ່ມຸມໜຶ່ງຂອງຄຳວ່າ ຕີ ໂດຍບໍ່ໃຫ້ເໝົາລວມວ່າເປັນການລົງໂທດ.
ຮັກງົວໃຫ້ຜູກ ຮັກລູກໃຫ້ຕີ ສໍານວນສຸພາສິດລາວເຮົານີ້ ໝາຍເຖິງ ຮັກສິ່ງໃດ ຕ້ອງລະວັງສິ່ງນັ້ນໃຫ້ດີ ຢ່າປ່ອຍຕາມໃຈ ຊຶ່ງໃນຄວາມຈິງແລ້ວ, ຄົນລາວບູຮານເຮົາ ມັກໃຊ້ສັ່ງສອນຄົນໃຫ້ລະມັດລະວັງ ແລະ ເບິ່ງແຍງສິ່ງທີ່ຮັກ ໂດຍຕ້ອງໝັ່ນສັ່ງສອນໃຫ້ດີ ບໍ່ຕາມໃຈຈົນເກີນໄປ ແລະ ເມື່ອໃດຕາມໃຈເກີນໄປ ກໍອາດຈະເສຍຄົນໃນພາຍຫລັງເມື່ອນັ້ນ ບໍ່ຕ່າງຫຍັງກັບການຮັກງົວຂອງເຮົາເອງ ກໍຄວນຜູກລ່າມໄວ້ໃຫ້ໝັ້ນໃຫ້ແໜ້ນເພື່ອບໍ່ໃຫ້ຄົນອື່ນມາລັກ ຫລື ປ້ອງກັນບໍ່ໃຫ້ໜີອອກໄປ ບໍ່ໃຫ້ໄປທຳລາຍຜົນລະປູກຂອງຜູ້ອື່ນຫລື ອອກໄປຖະໜົນຫົນທາງ ຊຶ່ງຈະກໍ່ໃຫ້ເກີດອຸບັດເຫດໄດ້. ຂະນະທີ່ຄຳວ່າ ຮັກລູກໃຫ້ຕີ ນັ້ນ, ບໍ່ໄດ້ສອນ ຫລື ບອກໃຫ້ຜູ້ເປັນພໍ່ແມ່ ຜູ້ປົກຄອງທັງຫລາຍເປັນຄົນໂຫດຮ້າຍ ມັກທຳຮ້າຍລູກຫລານໂດຍການຂ້ຽນຕີ ຊຶ່ງຄວາມຈິງແລ້ວແມ່ນການສອນໃຫ້ເຮົາຮູ້ຈັກສອນລູກ ເມື່ອລູກເຮັດຜິດກໍລົງໂທດຕາມເຫັນສົມ ຄວນແດ່.
ເມື່ອລົງໄມ້ລົງມືຕີລູກແລ້ວກໍຕ້ອງດຶງຄວາມຄິດອອກມາຕັກເຕືອນລູກວ່າ ສິ່ງເຮັດນັ້ນມັນຜິດເດີ ຈຶ່ງລົງໂທດ ແລະ ເທື່ອໜ້າບໍ່ໃຫ້ເຮັດຜິດອີກ. ຂະນະດຽວກັນ ກໍຍັງກວມເອົາຄວາມໝາຍ ການບໍ່ຕາມໃຈເມື່ອລູກເຮັດຜິດ ຫລື ບໍ່ເຫັນດີເຫັນພ້ອມກັບການເຮັດຜິດຂອງລູກ ຊຶ່ງຖ້າຕາມໃຈ ເຫັນດີເຫັນງາມກັບລູກ ກໍຈະເພີ່ມນິໄສບໍ່ດີໃຫ້ລູກໄປຈົນໃຫຍ່ ແລະ ສ້າງບັນຫາໃຫ້ເດັກເອງໃນອະນາຄົດ.
ສະຫລຸບແລ້ວ ຮັກງົວຕ້ອງຜູກລ່າມດີໆ ຮັກລູກ ບໍ່ຄວນຂ້ຽນຕີດ້ວຍແສ້ດ້ວຍຫວາຍ ຫລື ວັດຖຸອຸປະ ກອນອື່ນທີ່ເຮັດໃຫ້ເລືອດຕົກຢາງອອກຄວນຕີຄວາມຄິດເຮົາເອງວ່າຄວນໃຊ້ຄວາມຮຸນແຮງບໍ່ ຄວນສະໜັບສະໜູນການເຮັດຜິດອີກຕໍ່ໄປບໍ່ ແລະ ຕີຄວາມຄິດລູກໂດຍການບອກສອນລູກວ່າ: ສິ່ງໃດຄວນ ຫລື ບໍ່ຄວນເຮັດຜິດ.
