ປກສ ແຂວງຈໍາປາສັກ ກັກຕົວເປົ້າໝາຍຄ້າຂາຍຢາໄອສ໌ 7 ກິໂລກຣາມ ແລະ ຢາບ້າ 20 ພັນກວ່າເມັດ

ປກສ ແຂວງຈໍາປາສັກໃຫ້ຮູ້ວ່າ: ໃນວັນທີ 9 -13 ທັນວານີ້ , ເຈົ້າໜ້າທີ່ ປກສ ແຂວງ ສາມາດກັກຕົວຜູ້ເຄື່ອນໄຫວຄ້າຂາຍຢາເສບຕິດ 4 ຄົນ,ມີຂອງກາງເປັນຢາໄອສ໌ 7 ກິໂລກຼາມ ແລະ ຢາບ້າ 20.000 ກວ່າເມັດຄື: ໃນວັນທີ 9 ເຈົ້າໜ້າທີ່ວິຊາສະເພາະປະຈຳຈຸດກວດກາໜອງອີໂອຍ ເມືອງປາກຊ່ອງ ໄດ້ກັກຕົວຜູ້ຖືກຫາ 1 ຄົນ, ຊື່ທ້າວ ແສງທອງ ອາຍຸ 42 ປີ ຢູ່ບ້ານພູຊ້າງຄຳ ນະຄອນ-ຫຼວງພະບາງ ພ້ອມຢາໄອສ໌ 7 ກິໂລກຼາມ, ລົດຈິບປາຣາໂດ ປ້າຍທະບຽນ ຄລ 6565 ກຳແພງນະຄອນ 1 ຄັນ ພ້ອມເຄື່ອງ

ຂອງກາງອື່ນໆອີກ ຈຳນວນໜື່ງ ແລະໃນຄັ້ງວັນທີ 13 ໄດ້ຈັບຕົວຜູ້ເຄື່ອນໄຫວຄ້າຂາຍຢາເສບຕິດຢູ່ເມືອງປາກຊ່ອງ ຈຳນວນ3 ຄົນ ຊື່ທ້າວ ເຮືອງມະນີ ອາຍຸ 28 ປີ, ກຳມະກອນ ຢູ່ບ້ານສະໜາມໄຊ ນະຄອນປາກເຊ , ທ້າວ ຄຳໄພ ອາຍຸ 31 ປີ ກຳມະກອນ ຢູ່ບ້ານວັດຫຼວງເກົ່າ ເມືອງຈຳປາສັກ ແລະ ທ້າວ ແກ້ວ ອາຍຸ 17ປີ ສັນຊາດລາວ ຢູ່ບ້ານນາພະບາງນ້ອຍ ເມືອງນະຄອນເພັງ ແຂວງສາລະວັນ ພ້ອມເຄື່ອງຂອງກາງຢາບ້າ 20.096 ເມັດ, ລົດຈັກ 2 ຄັນ ແລະ ເຄື່ອງຂອງກາງອື່ນໆອີກຈໍານວນໜຶ່ງ.