ສຳຫລວດອາການ ຖ້າຕິດໂຄວິດໂອມິຄຣອນ ມີອາການຫຍັງແດ່ ? ເປັນຕາຢ້ານສໍ່າໃດ ?

ການແຜ່ລະບາດຢ່າງວ່ອງໄວຂອງໂຄວິດສາຍພັນໂອມິຄຣອນ ເຊິ່ງກາຍເປັນສາຍພັນຫລັກທີ່ກຳລັງລະບາດໃນອາເມລິກາຕອນນີ້ ແລະ ລະບາດຮຸນແຮງແລ້ວໃນບາງປະເທດເຊັ່ນ: ອັງກິດ ສົ່ງຜົນໃຫ້ປະຊາຊົນຈຳນວນຫລາຍເລີ່ມຕັ້ງຄຳຖາມເຖິງຂໍ້ມູນກ່ຽວກັບໂຄວິດສາຍພັນໃໝ່ນີ້ ໂດຍສະເພາະອາການຈາກການຕິດເຊື້ອ ແລະ ໂອກາດທີ່ຈະເກີດອາການຮຸນແຮງ.

ເຊິ່ງຂໍ້ສົງໄສຕ່າງໆ ທີ່ມີຕໍ່ໂອມິຄຣອນນັ້ນເພີ່ມຫລາຍຂຶ້ນ ໂດຍສະເພາະໃນໄລຍະເວລາທີ່ປະຊາຊົນທົ່ວໂລກກຽມຈະເດີນທາງຊ່ວງມື້ພັກຍາວສະຫລອງເທດສະການປີໃໝ່ ເຊິ່ງຜູ້ຊ່ຽວຊານທົ່ວໂລກກຳລັງພະຍາຍາມເລັ່ງສ້າງຄວາມເຂົ້າໃຈຜົນກະທົບຂອງໂຄວິດສາຍພັນນີ້ທີ່ມີຕໍ່ປະຊາຊົນ ທັງໃນກຸ່ມທີ່ສັກວັກຊີນແລ້ວ ແລະ ຍັງບໍ່ສັກວັກຊີນ ລວມທັງຜູ້ທີ່ເຄີຍຕິດໂຄວິດສາຍພັນອື່ນກ່ອນໜ້າ.

ອາການຈາກໂອມິຄຣອນມີຫຍັງແດ່ ?

• ຈາກຂໍ້ມູນເບື້ອງຕົ້ນພົບວ່າ ປະຊາຊົນສ່ວນຫລາຍ ໂດຍສະເພາະຜູ້ທີ່ໄດ້ຮັບການສັກວັກຊີນປ້ອງກັນໂຄວິດແລ້ວ ຖ້າໄດ້ຮັບເຊື້ອໂຄວິດຈະມີອາການຂ້ອນຂ້າງເບົາ ຄືກັບໄຂ້ຫວັດທຳມະດາ.
• ໂດຍທີ່ປຶກສາຂອງສູນຄວບຄຸມ ແລະ ປ້ອງກັນພະຍາດ ຫລື CDC ຂອງອາເມລິກາ ເປີດເຜີຍວ່າ: ອາການຫລັກໆຂອງຜູ້ທີ່ໄດ້ຮັບເຊື້ອໂຄວິດໂອມິຄຣອນໄດ້ແກ່: ໄອ, ອ່ອນເພຍ ເມື່ອຍງ່າຍ, ຕັນດັງ ນ້ຳມູກໄຫລ.
• ແຕ່ຂໍ້ມູນອາການເຫລົ່ານີ້ຍັງເປັນພຽງລາຍງານຂັ້ນຕົ້ນ ແລະ ບໍ່ແມ່ນການສຶກສາວິໄຈທາງວິທະຍາສາດ ເຊິ່ງມີການຕັ້ງຂໍ້ສັງເກດຈາກຜູ້ຊ່ຽວຊານວ່າ: ອາດຈະສະທ້ອນອາການຂອງຜູ້ຕິດເຊື້ອພຽງບາງກຸ່ມເຊັ່ນ: ກຸ່ມອາຍຸນ້ອຍ ແລະ ສຸຂະພາບດີ ຫລື ກຸ່ມຜູ້ສັກວັກຊີນແລ້ວເທົ່ານັ້ນ.

“ສິ່ງທີ່ເຮົາຍັງບໍ່ເຫັນຄືຂໍ້ມູນທີ່ເປັນຮູບປະທຳກ່ຽວກັບເຊື້ອໂອມິຄຣອນທີ່ສົ່ງຜົນຕໍ່ຜູ້ທີ່ຍັງບໍ່ໄດ້ຮັບການສັກວັກຊີນ” ດຣ. ວິວລຽມ ຊາບເນີ ຜູ້ຊ່ຽວຊານດ້ານພະຍາດຕິດເຊື້ອຈາກສູນການແພດມະຫາວິທະຍາໄລແວນເດິບິລ ໃນເມືອງແນດວິວ ລັດເທນເນສຊີ ກ່າວ.

• ເຊິ່ງສິ່ງທີ່ຊັດເຈນຢ່າງໜຶ່ງ ຄືຜູ້ທີ່ສັກວັກຊີນ ຫລື ໄດ້ຮັບວັກຊີນເຂັມກະຕຸ້ນແລ້ວມີທ່າອ່ຽງທີ່ອາການຈາກການຕິດເຊື້ອໂອມິຄຣອນຈະເບົາລົງ.
• ຂະນະທີ່ອາການຈາກໂອມິຄຣອນຂ້ອນຂ້າງແຕກຕ່າງຈາກໂຄວິດສາຍພັນອື່ນໆກ່ອນໜ້າເຊັ່ນ: ການສູນເສຍການຮັບຮູ້ລົດຊາດ ແລະ ກິ່ນ ນັ້ນບໍ່ຄ່ອຍພົບ.
• ຂໍ້ມູນວິໄຈຈາກມະຫາວິທະຍາໄລຮົງກົງທີ່ຍັງບໍ່ຜ່ານການກວດສອບໂດຍຜູ້ຊ່ຽວຊານ ຊີ້ວ່າ: ໂອມິຄຣອນນັ້ນສົ່ງຜົນກະທົບຕໍ່ປອດໜ້ອຍກວ່າສາຍພັນອື່ນ ແຕ່ສາມາດເພີ່ມຈຳນວນໄວຣັສໄດ້ວ່ອງໄວກວ່າໃນລະບົບທາງເດີນຫາຍໃຈ.
• ເຊິ່ງສິ່ງທີ່ເກີດຂຶ້ນ ຄືໂອມິຄຣອນນັ້ນອາດກໍ່ໃຫ້ເກີດອາການຄືກັບຫລອດລົມອັກເສບຫລາຍກວ່າປອດອັກເສບ.

“ຕາມປົກກະຕິແລ້ວ ຄົນເຈັບທີ່ເປັນພະຍາດຫລອດລົມອັກເສບກະທັນຫັນມັກຈະຫາຍໃຈບໍ່ອອກ ພວກເຂົາມັກຈະໄອ ແລະ ມີຂີ້ກະເທີ່ອອກມາ, ສ່ວນຄົນເຈັບພະຍາດປອດອັກເສບ ໂດຍທົ່ວໄປແລ້ວມັກຈະຫາຍໃຈບໍ່ອອກ ແລະ ຮູ້ສຶກເມື່ອຍຫລາຍກວ່າພະຍາດຫລອດລົມອັກເສບ” ດຣ. ຮິວ ແຄສເຊຍ ຜູ້ອຳນວຍການຝ່າຍເບິ່ງແຍງຄົນເຈັບວິກິດຂອງໂຮງໝໍ Sandra Atlas Bass Heat ໃນເກາະລອງໄອສ໌ແລນ ລັດນິວຢອກ ກ່າວ.

• ເຖິງຢ່າງໃດກໍຕາມ, ແພດ ແລະ ຜູ້ຊ່ຽວຊານຊີ້ວ່າ: ຍັງເປັນໄປບໍ່ໄດ້ສຳລັບປະຊາຊົນທີ່ຈະອາໄສການບົ່ງມະຕິອາການດ້ວຍຕົນເອງຖ້າຕິດໂອມິຄຣອນ ແລະ ຄວນເຂົ້າພົບແພດຖ້າມີອາການຄືໄຂ້ຫວັດ ເນື່ອງຈາກປັດຈຸບັນຍັງມີການລະບາດຂອງໂຄວິດສາຍພັນເດວຕາ ອີກທັງຍັງມີກໍລະນີຂອງພະຍາດໄຂ້ຫວັດໃຫຍ່ທີ່ເພີ່ມຂຶ້ນໃນໄລຍະນີ້ນຳ.

ໄລຍະຟັກເຊື້ອຂອງໂອມິຄຣອນດົນສໍ່າໃດ ?

• ຈາກຂໍ້ມູນເບື້ອງຕົ້ນ ພົບວ່າໄລຍະເວລາສຳລັບຜູ້ຕິດເຊື້ອໂອມິຄຣອນ 1 ຄົນຈະເກີດອາການປ່ວຍອາດຈະສັ້ນກວ່າການຕິດໂຄວິດສາຍພັນອື່ນ ໂດຍຫລຸດຈາກປະມານ 1 ອາທິດເຫລືອພຽງ 3 ວັນ ຫລື ໜ້ອຍກວ່ານັ້ນ.
• ເຊິ່ງໄລຍະຟັກເຊື້ອທີ່ຂ້ອນຂ້າງສັ້ນນັ້ນ ໃນທາງວິທະຍາສາດຖືວ່າສົມເຫດສົມຜົນ ເມື່ອເບິ່ງຈາກອັດຕາການແຜ່ລະບາດຂອງໂອມິຄຣອນທີ່ວ່ອງໄວກວ່າສາຍພັນກ່ອນໜ້າ ແຕ່ຍັງຈຳເປັນຕ້ອງມີການສຶກສາວິໄຈເພີ່ມອີກ.
• ຂະນະທີ່ຜູ້ຊ່ຽວຊານຊີ້ວ່າ: ມີຄວາມເປັນໄປໄດ້ທີ່ໄລຍະຟັກຕົວຂອງໂອມິຄຣອນອາດສັ້ນກວ່າ ຫລື ຍາວກວ່າ ຂຶ້ນຢູ່ກັບຕົວແປຫລາຍຢ່າງເຊັ່ນ: ອາຍຸ, ບັນຫາສຸຂະພາບ ແລະ ສະຖານະການສັກວັກຊີນ.

ຕອນໃດທີ່ຄວນກວດເຊື້ອ ?

• ຜູ້ຊ່ຽວຊານຊີ້ວ່າ: ຖ້າໂອມິຄຣອນມີໄລຍະຟັກເຊື້ອສັ້ນ ຜູ້ທີ່ມີການຕິດຕໍ່ໃກ້ຊິດກັບຜູ້ຕິດເຊື້ອຄວນເຂົ້າກັບການກວດເຊື້ອພາຍໃນ 72 ຊົ່ວໂມງ.
• ແລະ ສຳລັບປະຊາຊົນນັບລ້ານທີ່ບໍ່ເຄີຍຕິດໂຄວິດ ຖ້າຕ້ອງການຈະໃຊ້ເວລາໃນຊ່ວງສະຫລອງຄຣິສມາສ ຫລື ປີໃໝ່ຢູ່ກັບຄອບຄົວ ຫລື ໝູ່ເພື່ອນ ສິ່ງທີ່ຄວນເຮັດກ່ອນເພື່ອປ້ອງກັນການຕິດເຊື້ອໃນເບື້ອງຕົ້ນ ຄືການໃຊ້ຊຸດກວດໂຄວິດແບບວ່ອງໄວເພື່ອມີການກວດເຊື້ອ.
• ຂະນະທີ່ ດຣ. ແອນໂທນີ ເຟົາຊີ ຜູ້ຊ່ຽວຊານ ແລະ ທີ່ປຶກສາລະດັບສູງດ້ານພະຍາດຕິດເຊື້ອຂອງທຳນຽບຂາວ ແນະນຳວ່າ: ຜູ້ທີ່ບໍ່ມີຊຸດກວດ ແຕ່ໄດ້ຮັບການສັກວັກຊີນ ແລະ ວັກຊີນເຂັມກະຕຸ້ນແລ້ວນັ້ນ ຄວນຈະສະຫລອງປີໃໝ່ຮ່ວມກັບສະມາຊິກຄອບຄົວ ຫລື ຜູ້ທີ່ສັກວັກຊີນເຂັມກະຕຸ້ນແລ້ວເຊັ່ນກັນ.

ໂອມິຄຣອນເຮັດໃຫ້ເກີດພາວະ Long COVID ໄດ້ບໍ່ ?

• ເຖິງວ່າຂໍ້ມູນກ່ຽວກັບຜົນກະທົບຂອງໂອມິຄຣອນຈະຍັງບໍ່ຮູ້ແນ່ນອນ ແຕ່ຜູ້ຊ່ຽວຊານຫລາຍຄົນເບິ່ງວ່າ ຜູ້ຕິດເຊື້ອໂອມິຄຣອນອາດເກີດພາວະອາການຊ້ຳເຮື້ອຈາກການຕິດໂຄວິດ ຫລື Long COVID ໄດ້ ກະທັງໃນກໍລະນີທີ່ມີອາການບໍ່ຮຸນແຮງ.
• ໂດຍຜູ້ຕິດເຊື້ອທີ່ມີອາການຊ້ຳເຮື້ອນັ້ນອາດມີທັງອາການເມື່ອຍ, ຫົວໃຈເຕັ້ນຜິດຈັງຫວະ ແລະ ອາການອື່ນໆ ທີ່ເກີດຂຶ້ນຫລາຍເດືອນຫລັງຈາກຕິດເຊື້ອ ເຊິ່ງພາວະ Long COVID ນັ້ນພົບນັບແຕ່ເລີ່ມມີການລະບາດຂອງໂຄວິດມາຈົນເຖິງການລະບາດຂອງໂຄວິດສາຍພັນເດວຕາ ເຊິ່ງຄາດວ່າການລະບາດຂອງໂອມິຄຣອນອາດສົ່ງຜົນໃຫ້ເກີດພາວະອາການຊ້ຳເຮື້ອໄດ້ເຊັ່ນກັນ.

ໂອມິຄຣອນຄວນກັງວົນສໍ່າໃດ ?

• ຄວາມກັງວົນຈາກການລະບາດຂອງໂອມິຄຣອນ ເຫັນໄດ້ຊັດເຈນຈາກອັດຕາການແຜ່ລະບາດທີ່ວ່ອງໄວ ໂດຍໃນອາເມລິກາມີຈຳນວນຜູ້ຕິດເຊື້ອໂອມິຄຣອນເພີ່ມຂຶ້ນ 2 ເທົ່າໃນທຸກໆ 2 ວັນ ແລະ ໃນໄລຍະ 1 ອາທິດຜ່ານມາ ຈຳນວນຜູ້ຕິດເຊື້ອໂອມິຄຣອນໃນອາເມລິກາເພີ່ມຈາກ 13% ຂອງຜູ້ຕິດເຊື້ອໂຄວິດໃໝ່ທັງໝົດເປັນກວ່າ 73%.
• ຂະນະທີ່ຜູ້ຊ່ຽວຊານໃນອາເມລິກາ ພະຍາຍາມຮຽກຮ້ອງໃຫ້ປະຊາຊົນເຂົ້າຮັບການສັກວັກຊີນ ຫລື ວັກຊີນເຂັມກະຕຸ້ນເພື່ອຫລຸດຄວາມສ່ຽງຈະເກີດອາການໜັກ ຫລື ເຂົ້າໂຮງໝໍຖ້າໄດ້ຮັບເຊື້ອໂອມິຄຣອນ.
• ແຕ່ຈົນຮອດວັນທີ 21 ທັນວາ ຍັງມີຊາວອາເມລິກາທີ່ໄດ້ຮັບການສັກວັກຊີນຄົບໂດສພຽງປະມານ 61% ແລະ ໄດ້ຮັບວັກຊີນເຂັມກະຕຸ້ນບໍ່ເຖິງ 30%.

ອ້າງອີງ:

https://www.nbcnews.com/health/health-news/omicron-symptoms-covid-what-to-know-rcna9469