ຈີນສັ່ງລັອກດາວເມືອງຊີອານ ໃຫ້ 13 ລ້ານຄົນຢູ່ແຕ່ໃນເຮືອນ ຍ້ອນພົບຜູ້ຕິດເຊື້ອຂຶ້ນຫລັກຮ້ອຍ
ຈີນໃຊ້ວິທີປິດເມືອງເພື່ອຢຸດໄວຣັສ ຫ້າມອອກຈາກເຮືອນຖ້າບໍ່ຈຳເປັນ ຫລັງມີລາຍງານຜູ້ຕິດເຊື້ອເພີ່ມ 143 ຄົນໃນ 2 ອາທິດ.
ວັນທີ 22 ທັນວາ 2021, ເວັບໄຊ Channel News Asia ລາຍງານວ່າ: ໜ່ວຍງານທ້ອງຖິ່ນຂອງເມືອງຊີອານ ທາງຕອນເໜືອຂອງຈີນ ປະກາດລັອກດາວຢ່າງເຂັ້ມງວດ ໂດຍອອກຄຳສັ່ງໃຫ້ປະຊາຊົນ 13 ລ້ານຄົນຫ້າມອອກຈາກເຮືອນໂດຍບໍ່ຈຳເປັນ.
ເຫດການນີ້ເກີດຂຶ້ນຫລັງຈາກວັນທີ 22 ທັນວາ ມີລາຍງານຜູ້ຕິດເຊື້ອໂຄວິດ-19 ເພີ່ມຂຶ້ນມາ 52 ຄົນ ເຮັດໃຫ້ຍອດລວມນັບແຕ່ວັນທີ 9 ທັນວາ ສະສົມເປັນ 143 ຄົນ ແລະ ຈະດຳເນີນການກວດເຊື້ອທົ່ວເມືອງ 13 ລ້ານຄົນຕາມທີ່ປະກາດອອກມາກ່ອນໜ້ານີ້.
ນັບແຕ່ທ່ຽງຄືນຂອງວັນທີ 23 ທັນວາເປັນຕົ້ນໄປ ທຸກຄອບຄົວຈະສາມາດສົ່ງສະມາຊິກໃນຄອບຄົວ 1 ຄົນ ອອກມາເຮັດທຸລະໄດ້ບໍ່ເກີນ 1 ຄັ້ງ ພາຍໃນໄລຍະເວລາ 2 ວັນ ເພື່ອຊື້ສິນຄ້າທີ່ຈຳເປັນ ໂດຍກິດຈະການຫ້າງຮ້ານຕ່າງໆຖືກສັ່ງປິດທັງໝົດ ຍົກເວັ້ນຊຸບເປີມາເກັດ, ຮ້ານຂາຍຍ່ອຍ ແລະ ສະຖານພະຍາບານເທົ່ານັ້ນ.
ນອກຈາກນັ້ນ ຍັງມີການຈຳກັດບໍລິການຂອງລະບົບຂົນສົ່ງສາທາລະນະ ແລະ ສັ່ງປິດໂຮງຮຽນ. ການອອກຈາກເຮືອນໃນກໍລະນີອື່ນໆ ຈຳເປັນຕ້ອງໄດ້ຮັບອະນຸມັດຈາກທາງການກ່ອນ.
ການລັອກດາວເມືອງຂະໜາດໃຫຍ່ທົ່ວເມືອງ ສະແດງໃຫ້ເຫັນວ່າຈີນຍັງໃຊ້ນະໂຍບາຍຈັດການໂຄວິດ-19 ຢ່າງເຂັ້ມງວດ ໂດຍສະເພາະໃນໄລຍະນີ້ເຊິ່ງເປັນໄລຍະທີ່ເຊື້ອສາຍພັນໂອມິຄຣອນກຳລັງລະບາດໃນຫລາຍປະເທດ ແລະ ເປັນໄລຍະທີ່ເຫລືອເວລາອີກບໍ່ເຖິງ 1 ເດືອນເຄິ່ງ ກ່ອນຈະຈັດງານໃຫຍ່ ຄືໂອລິມປິກລະດູໜາວທີ່ປັກກິ່ງ.
ອ້າງອີງ:
https://www.channelnewsasia.com/…/covid19-china-xian…
