ຂ່າວຮ້າຍລີເວີພູລ, ປະທານຈັດ ແອຟຣີກາ ຄັບ ຢືນຢັນແຂ່ງຕໍ່ຕາມແຜນ ເຖິງຈະມີໂອໄມຄຣອນກໍຕາມ

ລີເວີພູລ ອາດພົບກັບຂ່າວຮ້າຍ ເມື່ອປະທານບານເຕະທະວີບແອຟຣິກາ ຢືນຢັນບໍ່ເລື່ອນການແຂ່ງຂັນ ເຖິງຈະມີ ໂຄວິດ-19 ສາຍພັນ ໂອໄມຄຣອນ ລະບາດກໍຕາມ.

ວັນທີ 22 ທັນວານີ້ ປາທຣິສ ມອດເຊເປ ປະທານສະຫະພັນບານເຕະແອຟຣິກາ (CAF) ອອກມາກ່າວຫລ້າສຸດວ່າ ແອຟຣິກາ ຄັບ ອອຟ ເນຊັນ 2021 ທີ່ປະເທດແຄມເມີຣູນ ຈະເດີນຫນ້າແຂ່ງຂັນຕໍ່ໄປຕາມກຳນົດໃນລະຫວ່າງວັນທີ 9 ມັງກອນ ຫາ 6 ກຸມພາ 2022.

ກ່ອນຫນ້ານີ້ ມີລາຍງານວ່າ CAF ອາດພິຈາລະນາເລື່ອນ ຫລື ຍົກເລີກການແຂ່ງຂັນ ເນື່ອງຈາກເກີດການແພ່ລະບາດຂອງ ໂອໄມຄຣອນ ເຊື້ອໂຄວິດ-19 ສາຍພັນໃຫມ່ ເຊິ່ງມີຕົ້ນກຳເນີດໃນທະວີບແອຟຣິກກາ ໂດຍກ່ອນຫນ້ານີ້ກໍເລື່ອນການແຂ່ງຂັນຈາກເກ່ົາໃນໄລຍະເດືອນມິຖຸນາ – ກໍລະກົດ ມາແລ້ວ.

ແນວໃດກໍຕາມ ປາທຣິສ ມອດເຕເປ ໄດ້ໃຫ້ສຳພາດໃນລະຫວ່າງເດີນທາງມາຢ້ຽມຊົມຄວາມພ້ອມຂອງ ສະຫນາມ ໂອເລມເບ ຫນຶ່ງໃນສັງວຽນທີ່ໃຊ້ຮອງຮັບການແຂ່ງຂັນຂອງເຈົ້າພາບວ່າ ‘‘ ຂ້ອຍຈະມາແຄມເມີຣູນ ໃນວັນທີ 7 ມັງກອນ ເພື່ອເປັນສັກຂີພະຍານຂອງການແຂ່ງຂັນທີ່ຍິ່ງໃຫຍ່ນີ້ ທ່ານສາມາດເຫັນໄດ້ເຖິງຄວາມມຸ້ງຫມັ້ນຕັ້ງໃຈອັນຍິ່ງໃຫຍ່ຂອງເຈົ້າພາບໃນການສ້າງຄວາມຫມັ້ນໃຈວ່າ ລາຍການນີ້ຈະເດີນຫນ້າໄປໄດ້ດ້ວຍດີ ’’.

‘‘ ເຮົາພວມຈະເປັນເຈົ້າພາບຮ່ວມກັບຊາວແຄມເມີຣູນ ໃນລາຍການທີ່ພິເສດແບບນີ້ ມັນຈະເປັນ ແອຟຣິກາ ຄັບ ອອຟ ເນຊັນ ທີ່ປະສົບຄວາມສຳເລັດຫລາຍທີ່ສຸດ ເຮົາພ້ອມທີ່ຈະສະແດງໃຫ້ໂລກເຫັນເຖິງສິ່ງທີ່ດີທີ່ສຸດຂອງບານເຕະແອຟຣິກາ ແລະ ການຕ້ອນຮັບແບບແອຟຣິກັນ ທົວນາເມັນນີ້ ມີຄວາມສຳຄັນສຳລັບຊາວແອຟຣິກາ ຂ້ອຍຮູ້ສຶກພາກພູມໃຈ ແລະ ຕື່ນເຕັ້ນຫລາຍກັບວຽກທີ່ເຮັດ ’’.

ຫາກການແຂ່ງຂັນດຳເນີນຕໍ່ໄປຕາມລາຍການທີ່ວາງໄວ້ຈະຖືວ່າເປັນຂ່າວຮ້າຍຂອງ ລີເວີພູລ ທີມດັງໃນການແຂ່ງຂັນພຣີເມຍລີກ ອັງກິດ ທີ່ຈະຕ້ອງເສຍ 3 ນັກເຕະໂຕຫລັກມາຮັບໃຊ້ທີມຊາດໃນລາຍການນີ້ ປະກອບດ້ວຍ ໂມຮາເຫມັດ ຊາລາ (ອີຢິບ), ຊາດີໂອ ມາເນ (ເຊເນກັລ) ແລະ ນາບີເກອິຕາ (ກີນີ) ໂດຍສະເພາະ 2 ຄັນທຳອິດທີ່ມີສ່ວນກັບການໄດ້ປະຕູໃນລະດູການນີ້ລວມກັນທຸກລາຍການເຖິງ 43 ປະຕູ (ຊາລາ 22 ປະຕູ 11 ແອສຊິສ / ມາເນ 9 ປະຕູ 1 ແອສຊິສ).