ສານສູງອັງກິດຕັດສິນ ເຈົ້ານະຄອນດູໄບຕ້ອງຈ່າຍຄ່າຢ່າຮ້າງພັນລະຍາ 550 ລ້ານປອນ
ສານສູງອັງກິດຕັດສິນເຈົ້າຜູ້ຄອງນະຄອນດູໄບຕ້ອງຈ່າຍຄ່າຢ່າຮ້າງເປັນຈຳນວນ 550 ລ້ານປອນ. ຖືເປັນຄ່າຢຸດຕິຄະດີທີ່ສຸດໃນປະຫວັດສາດກົດໝາຍອັງກິດ.
ວັນທີ 22 ທັນວາ 2021, ສຳນັກຂ່າວບີບີຊີລາຍງານວ່າ: ສານສູງອັງກິດຕັດສິນໃຫ້ທ່ານ ຊີກມູຮຳເມັດ ບິນ ຣາຊິດ ອັລ ມັກຕຸມ ເຈົ້າຜູ້ຄອງນະຄອນດູໄບອັນລ້ຳລວຍ ຜູ້ເປັນນາຍົກລັດຖະມົນຕີຂອງສະຫະລັດອາຣັບເອມິເຣດ ຕ້ອງຈ່າຍຊັບສິນເປັນຈຳນວນ 251,5 ລ້ານປອນ ໃຫ້ເຈົ້າຍິງຮາຍາ ບິນ ອັລ ຮຸສເຊນ ພັນລະຍາຜູ້ອາຍຸນ້ອຍທີ່ສຸດໃນບັນດາພັນລະຍາ 6 ຄົນ ຜູ້ເປັນທິດາກະສັດຮຸສເຊນແຫ່ງຈໍເດນ.
ເງິນຈຳນວນດັ່ງກ່າວຈະເປັນຄ່າໃຊ້ຈ່າຍໃນຄອບຄົວເພື່ອເບິ່ງແຍງທີ່ຢູ່ອາໄສ 2 ແຫ່ງຂອງເຈົ້າຍິງໃນອັງກິດ ໄດ້ແກ່ ບ່ອນອາໄສຫລັກໃນເຊີເຣ ແລະ ອະສັງຫາລິມະຊັບຫລັງງາມອີກໜຶ່ງຫລັງ ເຊິ່ງຢູ່ຂ້າງພະຣາຊະວັງເຄນຊິງຕັນ ແລະ ເປັນຄ່າໃຊ້ຈ່າຍສຳລັບລະບົບຮັກສາຄວາມປອດໄພ, ຄ່າໃຊ້ຈ່າຍປະຈຳເດືອນ, ຄ່າທ່ອງທ່ຽວໃນມື້ພັກຜ່ອນ, ເງິນຕອບແທນພະຍາບານ ແລະ ເອື້ອຍລ້ຽງເດັກ ຕະຫລອດຈົນຄ່າຍານພາຫະນະຫຸ້ມເກາະເວລາເຈົ້າຍິງ ແລະ ລູກຊາຍອາຍຸ 9 ປີ ແລະ ລູກສາວອາຍຸ 14 ປີໄປໃສມາໃສ ລວມທັງຄ່າລ້ຽງມ້າ ແລະ ສັດລ້ຽງອື່ນໆ.
ຍັງມີເງິນອີກຈຳນວນໜຶ່ງແຍກອອກມາອີກເປັນຈຳນວນ 5,6 ລ້ານປອນຕໍ່ປີ ໃຫ້ລູກແຕ່ລະຄົນລວມ 2 ຄົນ ໂດຍຕ້ອງແຍກເງິນໄວ້ເພື່ອເປັນຫລັກປະກັນ 290 ລ້ານປອນ.
ຄະດີຢ່ານີ້ເປັນຄະດີທີ່ມີການດຳເນີນມາຢ່າງຍາວນານ ເລີ່ມແຕ່ເຈົ້າຍິງຮາຍາໄດ້ຫລົບໜີອອກຈາກດູໄບໄປອັງກິດພ້ອມລູກທັງສອງ ເມື່ອປີ 2019 ໂດຍກ່າວວ່າ: ຢ້ານວ່າຈະມີອັນຕະລາຍເຖິງຊີວິດ ແລະ ພົບວ່າ ຊີກມູຮຳເມັດ ເຄີຍລັກພາຕົວລູກສາວຂອງຕົນ 2 ຄົນທີ່ເກີດຈາກພັນລະຍາຄົນອື່ນ ແລະ ບັງຄັບໃຫ້ຢູ່ໃນເມືອງດູໄບ.
ຫລັງຍ້າຍມາຢູ່ອັງກິດ ເຈົ້າຍິງຮາຍາ ຍັງໄດ້ຮັບຄຳຂູ່ຢ່າງຕໍ່ເນື່ອງເຊັ່ນ: “ຕາມໄປໄດ້ທຸກບ່ອນ” ເຮັດໃຫ້ຫລັງຈາກນັ້ນໄດ້ມີຄຳສັ່ງໃຫ້ມີການຮັກສາຄວາມປອດໄພຢ່າງໜາແໜ້ນຈາກຄວາມກັງວົນວ່າຕົນ ແລະ ລູກທັງສອງຈະຖືກລັກພາຕົວກັບໄປດູໄບ.
ເມື່ອທ້າຍປີຜ່ານມາ ສານສູງອັງກິດເຄີຍຕັດສິນວ່າ: ຊີກມູຮຳເມັດ ໄດ້ຢູ່ເບື້ອງຫລັງການທີ່ເຈົ້າຍິງຮາຍາ ຖືກສອດແນມທາງໂທລະສັບ. ນອກຈາກນີ້ ຍັງສອດແນມໄປເຖິງລາດຊະອົງຄະລັກ ແລະ ທີມກົດໝາຍຂອງເຈົ້າຍິງ ໂດຍໃຊ້ສະປາຍແວທີ່ຊື່ເປກາຊັສທີ່ຈະເຂົ້າໄປຝັງຕົວໃນໂທລະສັບມືຖືຂອງເຈົ້າຍິງ ໂດຍທີ່ບໍ່ມີຮ່ອງຮອຍໃຫ້ຮູ້ວ່າກຳລັງຖືກສອດແນມ.
ອ້າງອີງ:
https://www.bbc.com/news/world-middle-east-59739563
