11 ເດືອນຂອງປີ 2021 ແຂວງຈໍາປາສັກ ເກັບລາຍຮັບງົບປະມານທ້ອງຖິ່ນໄດ້ 372,54 ຕື້ກີບ
ທ່ານ ນາງ ບຸດສະດີ ຄໍາມະນີວົງ ຫົວໜ້າຄັງເງິນປະຈໍາແຂວງຈໍາປາສັກ ໃຫ້ສໍາພາດເມື່ອບໍ່ດົນມານີ້ ວ່າ: ການຈັດຕັ້ງປະຕິບັດວຽກງານວິຊາສະເພາະຂອງຄັງເງິນແຫ່ງຊາດ, ໄດ້ເອົາໃຈໃສ່ໂຄສະນາເຜີຍແຜ່ນະໂຍບາຍ, ກົດໝາຍ ແລະ ນິຕິກໍາລຸ່ມກົດໝາຍກ່ຽວກັບວຽກງານຄັງເງິນໃຫ້ບຸກຄົນ,ນິຕິບຸກຄົນ ແລະ ການຈັດຕັ້ງ, ນໍາພາ-ຊີ້ນໍາ, ຊຸກຍູ້, ຕິດຕາມ, ກວດກາ ດ້ານກົງຈັກ, ການຈັດຕັ້ງປະຕິບັດວຽກງານວິຊາສະເພາະ ແລະ ການເຄື່ອນໄຫວຂອງບັນດາຂະແໜງການອ້ອມຂ້າງຄັງເງິນປະຈໍາແຂວງ, ກວດກາເອກະສານລາຍຈ່າຍກ່ອນການເບີກຈ່າຍ ແລະ ຊໍາລະສະສາງລາຍຈ່າຍງົບປະມານ, ສ້າງແຜນ, ຄຸ້ມຄອງ, ຕິດຕາມ, ຈັດສັນ, ແບ່ງປັນ ແລະ ສະຫຼຸບລາຍງານລາຍຮັບ-ລາຍຈ່າຍງົບປະມານ.
ຄຽງຄູ່ກັນນີ້,ຍັງເອົາໃຈໃສ່ໃນການຄຸ້ມຄອງມະຫາພາກກ່ຽວກັບວຽກງານຄັງເງິນປະຈໍາແຂວງລວມສູນຕາມສາຍຕັ້ງໃນຂອບເຂດທົ່ວແຂວງ, ຖືເອົາການການເບີກຈ່າຍເງິນເດືອນ-ອຸດໜູນເປັນບຸລິມະສິດ, ພ້ອມທັງເອົາໃຈໃສ່ຄຸ້ມຄອງ-ບໍລິຫານລາຍຮັບ-ລາຍຈ່າຍງົບປະມານແຫ່ງລັດໃຫ້ຖືກຕ້ອງ, ຄົບຖ້ວນ ແລະ ທັນກໍານົດເວລາ. ພ້ອມດຽວກັນນີ້, ໄດ້ແຕ່ງຕັ້ງຄະນະກຳມະການພາຍໃນຄັງເງິນປະຈໍາແຂວງກວດກາເງິນສົດ, ໄດ້ລົງເຄື່ອນໄຫວ, ຕິດຕາມ, ຊຸກຍູ້ວຽກງານວິຊາສະເພາະຢູ່ 9 ເມືອງ, 1 ນະຄອນ ໂດຍສະເພາະແມ່ນກວດກາການເຄື່ອນໄຫວເງິນສົດ, ການຮັກສາເງິນສົດໃນຄັງເຫັນວ່າບັນດາເມືອງ ໄດ້ປະຕິບັດຕາມນິຕິກຳກ່ຽວກັບການຄຸ້ມຄອງເງິນສົດຢູ່ຄັງເງິນປະຈໍາແຂວງທີ່ກະຊວງການເງິນກໍານົດອອກ.
ສ່ວນການປະຕິບັດຕົວເລກລາຍຮັບ-ລາຍຈ່າຍງົບປະມານທ້ອງຖິ່ນນັບແຕ່ຕົ້ນປີມາຮອດເດືອນ 11 ປີ 2021, ດ້ານລາຍຮັບງົບປະມານທ້ອງຖິ່ນປະຕິບັດໄດ້ທັງໝົດ 372,54 ຕື້ກີບເທົ່າກັບ 49,97%. ໃນນັ້ນ, ລາຍຮັບອາກອນໄດ້ 355,30 ຕື້ກີບເທົ່າກັບ 49,65%. ລາຍຮັບຊັບສິນ 16,18 ຕື້ກີບເທົ່າກັບ 46,30%, ລາຍຮັບວິສະ ຫະກິດ 0,63 ຕື້ກີບເທົ່າກັບ 84,20%.
ດ້ານລາຍຈ່າຍງົບປະມານທ້ອງຖິ່ນປະຕິບັດທັງໝົດ 519,03 ຕື້ກີບເທົ່າກັບ 73,39%. ໃນນັ້ນ, ລາຍຈ່າຍເງິນເດືອນ, ເງິນອຸດໜູນປະຕິບັດໄດ້ 449,40 ຕື້ກີບເທົ່າກັບ 85,67%, ເງິນບໍລິຫານ-ດັດສົມປະຕິບັດໄດ້ 45,99 ຕື້ກີບເທົ່າກັບ 53,23%, ເງິນແຮ ແລະ ລົງທຶນປະຕິບັດໄດ້ 26,54 ຕຶ້ກີບເທົ່າກັບ 43,84%, ສ່ວນການຂາດດູນທັງໝົດ 146,49 ຕື້ກີບ, ຢືມລ່ວງໜ້າຈາກສູນກາງຈໍານວນ 123,42 ຕື້ກີບ, ຮັບດຸ່ນດ່ຽງຈາກສູນກາງຈໍານວນ 29,22 ຕື້ກີບ.
ທ່ານ ນາງ ບຸດສະດີ ຄໍາມະນີວົງ ຫົວໜ້າຄັງເງິນປະຈໍາແຂວງຈໍາປາສັກ ໃຫ້ຮູ້ອີກວ່າ: ການເບີກຈ່າຍເງິນເດືອນ-ອຸດໜູນ ແລະ ເງິນນະໂຍບາຍພະນັກງານລັດຖະກອນໄດ້ເບີກຈ່າຍທົ່ວແຂວງຈຳປາສັກ,ສາມາດເບີກຜ່ານລະບົບທະນາຄານ (ATM), ໃຫ້ລັດຖະກອນໃນທົ່ວແຂວງທັງໝົດ 13.241 ຄົນ,ກວມ 90% (ບໍ່ລວມທະຫານ ແລະ ຕໍາຫຼວດ), ມາຮອດປັດຈຸບັນໄດ້ປະຕິບັດການເບີກຈ່າຍເດືອນ-ເງິນອຸດໜູນເດືອນ 11 ໄດ້ສໍາເລັດ 33 ພະ ແນກການ, ຍັງ 2 ຂະແໜງການ. ສ່ວນເມືອງທີ່ເບີກຈ່າຍເງິນເດືອນ-ເງິນອຸດໜູນສໍາເລັດ 100% ມີເມືອງບາຈຽງຈະເລີນສຸກ ແລະ ນະຄອນປາກເຊ.
