ຊ່ວງຄຣິສມາສ-ປີໃໝ່ ປະເທດໃນເອີຣົບ ອອກມາດຕະການສະກັດໂຄວິດເຂັ້ມງວດ ຫວັງຢຸດໂອມິຄຣອນລຸກລາມ
ທ່າມກາງການລະບາດຢ່າງວ່ອງໄວຂອງເຊື້ອໂຄວິດສາຍພັນໂອມິຄຣອນ ໂດຍສະເພາະໃນອັງກິດ ແລະ ເດນມາກ ຫລາຍປະເທດໃນເອີຣົບທະຍອຍອອກມາດຕະການເຂັ້ມງວດ ເພື່ອສະກັດກັ້ນການແຜ່ລະບາດໃນຊ່ວງເທດສະການຄຣິສມາສຕໍ່ເນື່ອງໄປຈົນຮອດປີໃໝ່. ໄປເບິ່ງກັນວ່າແຕ່ລະປະເທດມີມາດຕະການຫຍັງອອກມາແດ່:
ເນເທີແລນ: ເປັນປະເທດທຳອິດໃນສະຫະພາບເອີຣົບ (EU) ທີ່ກັບເຂົ້າສູ່ການລັອກດາວຢ່າງເຂັ້ມງວດອີກ ຫລັງພົບການລະບາດຢ່າງວ່ອງໄວຂອງເຊື້ອໂຄວິດສາຍພັນໂອມິຄຣອນ ໂດຍບາຣ໌, ຮ້ານອາຫານ, ຮ້ານຄ້າບໍ່ຈຳເປັນ, ໂຮງຮູບເງົາ ແລະ ສູນອອກກຳລັງກາຍ ຈະປິດໃຫ້ບໍລິການທັງໝົດ ເລີ່ມມີຜົນແຕ່ວັນທີ 19 ທັນວາ ໄປຈົນເຖິງວັນທີ 14 ມັງກອນ.
ສ່ວນການແຂ່ງຂັນກິລາອາຊີບຍັງຈັດຕໍ່ໄປໄດ້, ແຕ່ບໍ່ອະນຸຍາດໃຫ້ປະຊາຊົນເຂົ້າຊົມໃນສະໜາມ. ຂະນະທີ່ເຮືອນອະນຸຍາດໃຫ້ເຊີນແຂກມາເຮືອນໃນຊ່ວງຄຣິສມາສໄດ້ບໍ່ເກີນ 4 ຄົນ ແລະ ຫລຸດເຫລືອບໍ່ເກີນ 2 ຄົນ ຫລັງກາຍມື້ພັກເທດສະການ.
ທ່ານ ມາຣ໌ກ ຣຸດເຕີ ນາຍົກລັດຖະມົນຕີເນເທີແລນ ກ່າວວ່າ: ມາດຕະການເຫລົ່ານີ້ເປັນສິ່ງທີ່ຫລີກລ່ຽງບໍ່ໄດ້ ເມື່ອຜະເຊີນການລະບາດໄວກວ່າຄາດການໄວ້ຂອງເຊື້ອສາຍພັນໂອມິຄຣອນ.
ເຢຍລະມັນ: ລັດຖະບານປະກາດຫ້າມພົນລະເມືອງທີ່ເດີນທາງຈາກອັງກິດທັງໝົດ ຍົກເວັ້ນພຽງພົນລະເມືອງສັນຊາດເຢຍລະມັນ, ຜູ້ຢູ່ອາໄສ ແລະ ຜູ້ໂດຍສານທີ່ປ່ຽນເຮືອບິນ ໂດຍເລີ່ມມີຜົນບັງຄັບໃຊ້ແຕ່ທ່ຽງຄືນວັນທີ 19 ທັນວາເປັນຕົ້ນໄປ.
ສ່ວນພົນລະເມືອງຈາກອັງກິດທີ່ສາມາດເດີນທາງເຂົ້າເຢຍລະມັນໄດ້ ບໍ່ວ່າຈະສັກວັກຊີນແລ້ວ ຫລື ບໍ່ນັ້ນ ຈະຕ້ອງມີຜົນກວດ PCR ເປັນລົບ ແລະ ຈະຕ້ອງກັກຕົວເປັນເວລາ 14 ວັນ.
ຝຣັ່ງ: ນັບແຕ່ວັນທີ 18 ທັນວາ ຝຣັ່ງຫ້າມພົນລະເມືອງຈາກອັງກິດເດີນທາງເຂົ້າປະເທດ ລວມທັງຫ້າມພົນລະເມືອງເດີນທາງໄປອັງກິດ ຖ້າບໍ່ມີເຫດຈຳເປັນ.
ສ່ວນຜູ້ທີ່ເດີນທາງຈາກອັງກິດເຂົ້າປະເທດດ້ວຍເຫດຜົນອັນຄວນ ຈະຕ້ອງຂຽນຂໍ້ມູນທີ່ຢູ່ອາໄສໃນຝຣັ່ງ.
ນອກຈາກນີ້, ຝຣັ່ງຍັງກຳນົດໃຫ້ຜູ້ທີ່ເດີນທາງຈາກອັງກິດສະແດງຜົນກວດ PCR ທີ່ກວດກ່ອນອອກເດີນທາງເປັນເວລາ 24 ຊົ່ວໂມງ ຈາກທີ່ເຄີຍກຳນົດໄວ້ 48 ຊົ່ວໂມງ ແລະ ເມື່ອເຂົ້າມາແລ້ວຈະຕ້ອງກວດອີກໃນຝຣັ່ງ ພ້ອມກັກຕົວໃນສະຖານທີ່ທີ່ເລືອກເອງເປັນເວລາ 48 ຊົ່ວໂມງໃນລະຫວ່າງລໍຖ້າຜົນ.
ເຖິງຢ່າງໃດກໍຕາມ, ພົນລະເມືອງສັນຊາດຝຣັ່ງ, ຄູ່ສົມຣົດ ແລະ ລູກ ຈະໄດ້ຮັບການຍົກເວັ້ນຈາກກົດເກນໃໝ່ນີ້. ນອກຈາກນີ້ ນະຄອນຫລວງປາຣີສໄດ້ປະກາດຍົກເລີກການຈັດງານສະຫລອງປີໃໝ່ຢູ່ໝອງເຊລິເຊໃນວັນທີ 31 ທັນວານຳອີກ.
ສະວິດເຊີແລນ: ທາງການຈະອະນຸຍາດສະເພາະຜູ້ທີ່ຮັບວັກຊີນແລ້ວ ຫລື ຜູ້ທີ່ຫາຍຈາກໂຄວິດເດີນທາງເຂົ້າສະຖານທີ່ສາທາລະນະໃນຮົ່ມໄດ້ເຊັ່ນ: ຮ້ານອາຫານ, ບາຣ໌, ສະໜາມກິລາ ແລະ ສະຖານທີ່ທາງວັດທະນະທຳ ໂດຍເລີ່ມມີຜົນແຕ່ວັນທີ 20 ທັນວາ.
ນອກຈາກນີ້, ຍັງກຳນົດໃຫ້ປະຊາຊົນທຸກຄົນສະແດງຜົນກວດເຊື້ອເປັນລົບກ່ອນເຂົ້າສະຖານທີ່ທີ່ບໍ່ສາມາດໃສ່ຜ້າປິດປາກ-ດັງໄດ້ ແລະ ບໍ່ສາມາດຈັດບ່ອນນັ່ງໄດ້ ໂດຍຂໍ້ກຳນົດນີ້ຍົກເວັ້ນໃຫ້ສະເພາະຜູ້ທີ່ຮັບວັກຊີນແລ້ວ ຫລື ສັກເຂັມກະຕຸ້ນພາຍໃນ 4 ເດືອນຜ່ານມາ ຫລື ຜູ້ທີ່ມີອາຍຸຕໍ່າກວ່າ 16 ປີ.
ເດນມາກ: ເຊິ່ງມີອັດຕາການລະບາດຂອງໂຄວິດຕໍ່ຈຳນວນປະຊາກອນສູງທີ່ສຸດໃນເອີຣົບ ປະກາດວ່າຈະປິດໂຮງຮູບເງົາ, ໂຮງລະຄອນ ແລະ ຄອນເສີດຮໍ ລວມທັງຈຳກັດເວລາເປີດໃຫ້ບໍລິການຂອງຮ້ານອາຫານນຳອີກ.
ອ້າງອີງ:
- https://www.ft.com/content/7264aae6-f228-4015-87ef-838c701b99bb
- https://news.sky.com/story/covid-19-british-tourists-to-be-banned-from-france-amid-rise-in-omicron-cases-12497105
- https://www.france24.com/en/france/20211218-paris-cancels-new-year-s-eve-firework-display-over-omicron-fears
- https://www.reuters.com/business/healthcare-pharmaceuticals/netherlands-set-announce-strict-christmas-lockdown-media-2021-12-18
