ກອງທັບເຮືອອາເມລິກາປະສົບຜົນສຳເລັດ ໃນການທົດສອບລະບົບອາວຸດເລເຊີ
ອາວຸດເລເຊີມະຫາປະໄລທີ່ເຮົາເຫັນໃນຮູບເງົາກຳລັງຈະອອກສູ່ໂລກຄວາມເປັນຈິງ ເມື່ອການທົດສອບລະບົບອາວຸດເລເຊີຂອງກອງທັບເຮືອອາເມລິກາປະສົບຜົນສຳເລັດໃນການທຳລາຍເປົ້າໝາຍກາງທະເລ.
ໂດຍການທົດສອບຄັ້ງນີ້ເກີດຂຶ້ນໃນບໍລິເວນອ່າວເອເດນ ທາງຕອນໃຕ້ຂອງປະເທດເຢເມນ ເຊິ່ງລະບົບອາວຸດເລເຊີ Laser Weapons System Demonstrator (LWSD) ທີ່ຕິດຕັ້ງຢູ່ເທິງເຮືອພິຂາດ USS Portland ສາມາດທຳການຍິງທຳລາຍເປົ້າໝາຍຈຳລອງທີ່ລອຍຢູ່ກາງທະເລໄດ້.
ນີ້ບໍ່ແມ່ນຄັ້ງທຳອິດທີ່ LWSD ສາມາດທຳລາຍເປົ້າໝາຍທີ່ຕ້ອງການໄດ້ແນ່ນອນ ໂດຍກ່ອນໜ້ານີ້ໃນປີ 2020 ກໍໄດ້ປະສົບຜົນສຳເລັດໃນການຍິງທຳລາຍເຮືອບິນບໍ່ມີຄົນຂັບ ໂດຍການທົດສອບຄັ້ງນັ້ນມີຂຶ້ນໃນມະຫາສະໝຸດປາຊີຟິກ.
ໂດຍ LWSD ນີ້ເປັນລະບົບອາວຸດເລເຊີທີ່ໃຊ້ເຕັກໂນໂລຊີ Solid State Laser-Technology ເຊິ່ງໃຊ້ຕົວກາງກະຕຸ້ນສ້າງແສງເລເຊີທີ່ເປັນຂອງແຂງ.
ເຊິ່ງໃນການທົດສອບລະບົບອາວຸດເລເຊີໃນຄັ້ງນີ້ຍັງໄດ້ມີການທົດສອບ High Energy Laser with Integrated Optical-dazzler and Surveillance ຫລື ລະບົບ HELIOS ເຊິ່ງເປັນລະບົບອາວຸດເລເຊີອາເນກປະສົງ ທີ່ສາມາດຍິງທຳລາຍເປົ້າໝາຍ, ຮົບກວນລະບົບນຳວິຖີ ແລະ ກວດຈັບຂອງຂ້າເສິກ ຫລື ໃຊ້ໃນການສື່ສານ ແລະ ກວດຈັບໄລຍະໄກ.
ປັດຈຸບັນກອງທັບເຮືອອາເມລິກາໃນທະເລອາຣະເບຍນັ້ນຕົກເປັນເປົ້າໂຈມຕີຂອງກຸ່ມກໍ່ການຮ້າຍທີ່ໃຊ້ເຮືອຂະໜາດນ້ອຍຕິດລະເບີດ ເຊິ່ງບັງຄັບຈາກໄລຍະໄກເຂົ້າໂຈມຕີພ້ອມກັນຫລາລຳຈາກຫລາຍທິດທາງ ແລະ ເມື່ອສາມາດເຂົ້າໄປໃກ້ເຮືອຮົບເປົ້າໝາຍໄດ້ກໍຈະກົດລີໂມດເພື່ອທຳການລະເບີດໂຈມຕີ ເຮັດໃຫ້ລະບົບອາວຸດເລເຊີນີ້ຖືກພິຈາລະນາເປັນຕົວເລືອກທີ່ດີໃນການໃຊ້ປ້ອງກັນໄພໃຫ້ກອງທັບເຮືອໃນອະນາຄົດ.
ທັງນີ້, ບໍ່ພຽງແຕ່ກອງທັບເຮືອ, ກອງທັບບົກ ແລະ ກອງທັບອາກາດອາເມລິກາ ກໍມີແຜນພັດທະນາອາວຸດເລເຊີເຊັ່ນກັນ ແລະ ຈາກຜົນການທົດສອບທີ່ອອກມາດີ ໂດຍສະເພາະຄ່າໃຊ້ຈ່າຍໃນການຍິງຕໍ່ຄັ້ງທີ່ຖືກກວ່າລູກປືນຫລາຍ ເຮັດໃຫ້ມີທ່າອ່ຽງວ່າລະບົບອາວຸດເລເຊີຈະຖືກນຳມາໃຊ້ຫລາຍຂຶ້ນ ແລະ ແນ່ນອນວ່າບໍ່ພຽງແຕ່ກອງທັບອາເມລິກາ ເພາະກອງທັບຫລາຍປະເທດກຳລັງສົນໃຈ ແລະ ພັດທະນາລະບົບອາວຸດເລເຊີເຊັ່ນດຽວກັນ.
ສຳລັບອາວຸດເລເຊີນັ້ນມີຂໍ້ໄດ້ປຽບເມື່ອທຽບໃສ່ອາວຸດປັດຈຸບັນຫລາຍດ້ານ ທັງຄວາມໄວ ແລະ ແມ້ນຢຳໃນການຍິງເປົ້າໝາຍ ເພາະສຳແລງຈະພຸ້ງເຂົ້າຫາເປົ້າໝາຍດ້ວຍຄວາມໄວແສງດ້ວຍຄວາມແມ້ນຢຳ, ຕົວລຳແສງເລເຊີເອງເປັນຕົວຊີ້ເປົ້າໄປໃນຕົວ. ການຍິງທີ່ບໍ່ຕ້ອງໃຊ້ລູກປືນເຮັດໃຫ້ຕົ້ນທຶນການຍິງຕໍ່າກວ່າຫລາຍ (ແຕ່ມີຕົ້ນທຶນພະລັງງານເຊິ່ງຍັງຖືກກວ່າຫລາຍ) ແຕ່ອາວຸດເລເຊີມີຂໍ້ຈຳກັດ ແລະ ຄວາມທ້າທາຍທີ່ຕ້ອງເອົາຊະນະອີກເຊັ່ນ: ແຫລ່ງພະລັງງານທີ່ພຽງພໍ ແລະ ຕໍ່ເນື່ອງ, ການນຳໃຊ້ໃນສະພາບອາກາດທີ່ມີໝອກຫລາຍ ຫລື ທ່າມກາງສາຍຝົນນັ້ນປະສິດທິພາບຫລຸດລົງຫລາຍ.
ອ້າງອີງ:
https://interestingengineering.com/us-navy-destroyed-floating-target-with-high-energy-laser-weapon-in-mideast
https://www.businessinsider.in/international/news/a-us-navy-warship-blasted-a-floating-target-with-a-laser-in-the-middle-east/articleshow/88304006.cms
https://www.lockheedmartin.com/en-us/news/features/2021/more-than-a-laser-helios-is-an-integrated-weapon-system.html
https://en.wikipedia.org/wiki/Solid-state_laser
