10 ມັງກອນ 2022 ທົດລອງເປີດຮຽນຄືນໃນສະຖານການສຶກສາຢູ່ເຂດທີ່ມີການລະບາດພະບາດໂຄວິດ-19

ວັນທີ 17 ທັນວາ 2021 ນີ້, ກະຊວງສຶກສາທິການ ແລະ ກິລາ ໄດ້ແຈ້ງການເຖິງຫົວໜ້າຫ້ອງການ, ຫົວໜ້າກົມ, ຜູ້ອໍານວຍການສະຖາບັນ ແລະ ສູນ, ອະທິການບໍດີມະຫານວິທະຍາໄລ 4 ແຫ່ງ, ຫົວໜ້າພະແນກສຶກສາທິການ ແລະ ກິລາ ແຂວງ/ນະຄອນຫລວງ, ປະທານສະມາຄົມການສຶກສາພາກເອກະຊົນ, ຜູ້ບໍລິຫານສະຖານການສຶກສາ ແລະ ກິລາ ທຸກຂັ້ນທັງພາກລັດ ແລະ ເອກະຊົນ ລວມທັງຜູ້ປະກອບການສະຖານການສຶກສາພາກເອກະຊົນ ເລື່ອງການປະເມີນສະຖານການສຶກສາທີ່ຈະເປີດຮຽນຄືນຢູ່ເຂດທີ່ມີການລະບາດພະຍາດໂຄວິດ-19.

ແຈ້ງການລະບຸແຈ້ງວ່າ:ການຜັນຂະຫຍາຍມາດຕະການ ແລະ ຂໍ້ແນະນໍາປະຕ້ອງເປັນເອກະພາບໃນທົ່ວປະ ເທດ ແລະ ຮັບປະກັນການພິຈາລະນາເປີດສະຖານການສຶກສາໃຫ້ປອດໄພ ໂດຍຄະນະສະເພາະກິດກະຊວງສຶກສາທິການ ແລະ ກິລາ ເນັ້ນໃຫ້ຜູ້ບໍລິຫານການສຶກສາ ແລະ ກິລາທຸກຂັ້ນ, ພະນັກງານ ແລະ ຄູ-ອາຈານ ຈັດຕັ້ງຜັນຂະຫຍາຍ, ເຜີຍແຜ່ເຊື່ອມຊຶມມາດຕະການ ແລະ ຂໍ້ແນະນໍາການເປີດຮຽນໃນສະຖານການສຶກສາທີ່ປອດໄພໃນຂອບເຂດຄວາມຮັບຜິດຊອບຂອງຕົນ ເພຶ່ອກຽມຄວາມພ້ອມຮອບດ້ານເປີດຮຽນແບບເຊິ່ງໜ້າທີ່ປອດໄພຢ່າງທົ່ວເຖິງ; ໃຫ້ກົມວິຊາການກໍານົດແຜນເພຶ່ອເປັນທິດທາງທົດລອງເປີດຮຽນແບບເຊິ່ງໜ້າຕາມຄວາມຮັບ ຜິດຊອບລວມທັງການກໍານົດຊັ້ນຮຽນ, ເວລາການເປີດຮຽນຄືນ, ປະເມີນຂີດຄວາມສາມາດຂອງສະຖານການສຶກສາ, ການຊ່ວຍເຫລືອສະຖານການສຶກສາ, ສະໜອງອຸປະກອນປ້ອງກັນພະຍາດໂຄວິດ-19 ແລະ ສິ່ງຈໍາເປັນ ແລະ ແຜນຮອງຮັບຈັດການຮຽນ-ການສອນແບບປະສົມປະສານໃນກໍລະນີໃຫ້ນັກຮຽນ-ນັກສຶກສາທີ່ບໍ່ສາ ມາດຮຽນແບບເຊິ່ງໜ້າໄດ້; ສ່ວນພະແນກສຶກສາທິການ ແລະ ກິລາ ແຂວງ/ນະຄອນຫລວງໃຫ້ປະສານສົມທົບກັບຄະນະສະເພາະກິດຂັ້ນແຂວງ/ນະຄອນຫລວງເພຶ່ອແຕ່ງຕັ້ງຄະນະປະເມີນສະຖານການສຶກສາຕາມການແບ່ງຂັ້ນຄຸ້ມຄອງການສຶກສາ ແລະ ກິລາ ຫລື ຕາມສະພາບທີ່ຕັ້ງຂອງສະຖານການສຶກສາ;

ໃນແຈ້ງການ ໄດ້ກໍານົດໃຫ້ທົດລອງເປີດຮຽນຄືນໃນສະຖານການສຶກສາຢູ່ເຂດທີ່ຍັງມີການລະບາດໂຄວິດ-19 ໃນຊຸມຊົນ ແຕ່ວັນທີ 10 ມັງກອນ 2022 ເປັນຕົ້ນໄປ. ແນວໃດກໍດີພາຍຫລັງສະຖານການສຶກສາເປີດຮຽນທົດລອງແລ້ວ ໃຫ້ລົງຕິດຕາມສຳລັບເຂດທີ່ຍັງມີຕົວເລກຜູ້ຕິດເຊື້ອຫາຍ 2 ເທື່ອຕໍ່ອາທິດ ແລະ ສຳລັບເຂດທີ່ມີຕົວເລກຜູ້ຕິດເຊື້ອໜ້ອຍ 1 ເທື່ອຕໍ່ອາທິດ.