ໂຄງການກໍ່ສ້າງເຮືອນໃຫ້ປະຊາຊົນຜູ້ໄດ້ຮັບຜົນກະທົບຈາກ ຈາກເຫດການສັນເຂື່ອນໄຟຟ້າເຊປຽນ-ເຊນໍ້ານ້ອຍແຕກ ປະຕິບັດໄດ້ 78%,
ທ່ານ ເລັດ ໄຊຍະພອນ ເຈົ້າແຂວງອັດຕະປື ລາຍງານເນື່ອງໃນໂອກາດການຢ້ຽມຢາມ ທ່ານ ທອງລຸນ ສີສຸລິດ ປະທານປະເທດ ແຫ່ງ ສປປ ລາວ ວັນທີ 15 ທັນວາ 2021 ນີ້ໃຫ້ຮູ້ວ່າ: ສະພາບການແກ້ໄຂຜົນກະທົບ ແລະການ ຟື້ນຟູຫລັງໄພພິບັດ ຈາກເຫດການສັນເຂື່ອນໄຟຟ້າເຊປຽນ-ເຊນໍ້ານ້ອຍແຕກ ໃນປີ2018 ຜ່ານມາທີ່ເມືອງສະໜາມໄຊ, ໂດຍສະເພາະໂຄງການ ກໍ່ສ້າງເຮືອນຢູ່ຖາວອນຈໍານວນ 700 ຫລັງມູນຄ່າ 24 ລ້ານກວ່າໂດລາສະຫະລັດ, ດ້ວຍທຶນຊົດເຊີຍບໍລິ ສັດຜູ້ພັດທະນາໂຄງການເຂື່ອນໄຟ ຟ້າເຊປຽນ-ເຊນໍ້ານ້ອຍ.
ມາຮອດປັດຈຸບັນ ສາມາດລົງມືກໍສ້າງໄດ້ທັງໝົດ 700 ຫລັງ, ທຽບໃສ່ແຜນລວມ 700 ຫຼັງປະຕິບັດໄດ້ 78%, ຕາມສັນຍາແມ່ນໃຫ້ສໍາເລັດ 100% ໃນທ້າຍປີ 2021 ນີ້, ໄດ້ສໍາເລັດ ແລະມອບ ໃຫ້ປະຊາຊົນເຂົ້າຢູ່ແລ້ວ 268 ຫລັງ.
1. ບ້ານ ຫີນລາດ 67 ຫລັງ
2. ບ້ານດອນບົກໃໝ່ແສງຈັນ 24 ຫລັງ
3. ບ້ານດົງບາກ 177 ຫລັງ
ໂຄງການ ກໍ່ສ້າງເຮືອນ 45 ຫລັງ ດ້ວຍທຶນຊ່ວຍເຫລືອຈາກລັດຖະ ບານໄທ ມູນຄ່າ 6 ຕື້ກວ່າກີບ ສໍາເລັດ 100% ໄດ້ມອບໃຫ້ປະຊາຊົນເຂົ້າຢູ່ໝົດແລ້ວ,
ໂຄງການ ກໍ່ ສ້າງເຮືອນ 66 ຫລັງ ດ້ວຍທຶນຊ່ວຍເຫຼືອຈາກລັດຖະບານຍີ່ປຸ່ນມູນຄ່າ 9 ຕື້ກວ່າກີບ ສໍາເລັດ 100% ແລະ ໄດ້ມອບໃຫ້ປະຊາຊົນເຂົ້າຢູ່ແລ້ວ.
ວຽກຟື້ນຟູການຈັດສັນອາຊີບໃຫ້ແກ່ປະຊາຊົນ ໂດຍສະເພາະ ຟື້ນຟູດິນນາເດີມຂອງປະຊາຊົນ ໃນເນື້ອທີ່ 2.263 ເຮັກຕາ, ປີນີ້ປະຊາ ຊົນປູກເຂົ້າຕົວຈິງມີ 1.267 ເຮັກຕາ, 1.049 ຄອບຄົວ, ເຮັດນາຢອດ 700 ເຮັກຕາ, ນາປັກດຳ 567 ເຮັກຕາ, ເກັບກູ້ຜົນຜະ ລິດລວມໄດ້ 3.471 ໂຕນ, ໄດ້ຟື້ນຟູການກໍ່ສ້າງລະບົບຊົນລະປະທານ 4 ແຫ່ງ ມູນຄ່າ 59 ຕື້ກວ່າກີບ, ບ້ວງທຶນຂອງບໍລິສັດ SK ປະຕິບັດສໍາເລັດປະ ມານ 90%, ສາມາດສະໜອງນໍ້າໃຫ້ແກ່ການຜະ ລິດໃນລະດູແລ້ງປີນີ້ 910 ເຮັກຕາ ແລະ ວຽກງານອື່ນໆ ກໍ່ໄດ້ຮັບການຈັດຕັ້ງປະຕິບັດຢ່າງມີຜົນສໍາເລັດ.
ທ່ານ ທອງລຸນ ສີສຸລິດ ໄດ້ເນັ້ນໃຫ້ອົງການປົກຄອງແຂວງ, ອົງການປົກຄອງເມືອງ ສືບຕໍ່ເອົາໃຈໃສ່ປະຕິບັດບັນດາໜ້າວຽກ ທີ່ຍັງຄ້າງ ໂດຍການປະສານຢ່າງກົມກຽວກັນ ລະ ຫວ່າງແຂວງ ແລະ ເມືອງ ເພື່ອເຮັດໃຫ້ທຸກວຽກ ງານຂອງການຟື້ນຟູໄພພິບັດ ໄດ້ດໍາເນີນໄປຢ່າງມີສໍາເລັດ, ພ້ອມທັງໄດ້ເນັ້ນໃຫ້ພໍ່ແມ່ປະຊາຊົນ ເປັນເຈົ້າການພັດທະນາຊີວິດການເປັນຢູ່ດ້ວຍການອອກແຮງງານ ເພີ່ມພູນຜະລິດຜົນປູກຝັງ-ລ້ຽງສັດ ພັດທະນາຊີວິດຄອບຄົວໃຫ້ມີຢູມີກິນ ຫລຸດພົ້ນຈາກຄວາມທຸກຍາກເທື່ອລະກ້າວ.
ໃນໂອກາດດັ່ງກ່າວ, ທ່ານ ທອງລຸນ ສີສຸລິດ ໄດ້ມອບເຂົ້າສານໃຫ້ປະຊາຊົນທີ່ປະສົບໄພພິບັດ ຢູ່ເມືອງສະໜາມໄຊ ຈຳນວນ 30 ໂຕນ.
