ຫລວງນ້ຳທາ ໂຈະການຂົນສົ່ງສິນຄ້າທົ່ວໄປຜ່ານດ່ານສາກົນບໍ່ເຕັນ-ບໍ່ຫານ ຊົ່ວຄາວ

ພາຍຫລັງມີລົດບັນທຸກເຂົ້າມາດ່ານສາກົນບໍ່ເຕັນ 350 ຄົນ/ມື້, ຂະນະທີ່ດ່ານຝ່າຍຈີນອະນຸຍາດໃຫ້ເຂົ້າໄປ 150ຄັນ/ມື້ເທົ່ານັ້ນສົ່ງຜົນໃຫ້ມີລົດບັນທຸກຂົນສົ່ງສິນຄ້າຄ້າງຢູ່ດ່ານສາກົນບໍ່ເຕັນ ແລະ ຕາມເສັ້ນທາງເປັນຈໍານວນຫລາຍ ທັງເຮັດໃຫ້ເສັ້ນທາງແຕ່ເຂດນາເຕີຍ ຫາ ດ່ານສາກົນບໍ່ເຕັນແອອັດ ບໍ່ສາມາດສັນຈອນໄປມາໄດ້ ແລະ ເພື່ອແກ້ໄຂສະພາບແອອັດດັ່ງກ່າວ, ວັນທີ 17 ທັນວາ 2021, ຫ້ອງວ່າການແຂວງຫລວງນໍ້າທາ ໄດ້ອອກແຈ້ງສະບັບເລກທີ 799/ຫວຂ ວ່າດ້ວຍການແກ້ໄຂສະພາບລົດຕິດຢູ່ດ່ານສາກົນບໍ່ເຕັນ ໂດຍສັ່ງໂຈະຊົ່ວຄາວການສັນຈອນຂອງລົດບັນທຸກທີ່ມີຈຸດປະສົງຈະຂົນສົ່ງສິນຄ້າຜ່ານດ່ານສາກົນບໍ່ເຕັນ-ບໍ່ຫານ (ສໍາລັບສິນຄ້າທົ່ວໄປເລີ່ມໂຈະແຕ່ວັນອອກແຈ້ງການເປັນຕົ້ນໄປ, ສ່ວນສິນຄ້າປະເພດກະສິກໍາແມ່ນເລີ່ມແຕ່ວັນທີ 19 ທັນວາ ຈົນເຖິງ ວັນທີ 26 ທັນວາ 2021) ເປັນຜົນມາຈາກໃນໄລຍະການແພ່ລະບາດຂອງພະຍາດໂຄວິດ-19 ຢູ່ບັນດາແຂວງຂອງ ສປປ ລາວ ເຮັດໃຫ້ ສປ ຈີນ ເພີ່ມຄວາມເຂັ້ມງວດອະນຸຍາດໃຫ້ຄົນ ແລະ ລົດບັນທຸກສິນຄ້າເຂົ້າປະເທດ.

ດັ່ງນັ້ນ, ຂໍໃຫ້ຂະແຫນງການກ່ຽວຂ້ອງ, ຜູ້ປະກອບການໃນແຂວງຂອງຕົນຊາບ ແລະ ໃຫ້ການຮ່ວມມືໃນການແກ້ໄຂບັນຫາດັ່ງກ່າວດ້ວຍ, ຖ້າຫາກມີຫຍັງປ່ຽນແປງຈະແຈ້ງ ໃຫ້ຊາບແຕ່ລະໄລຍະຕື່ມອີກ.