ເສັ້ນທາງລົດໄຟລາວ-ຈີນ ໄດ້ກາຍເປັນສູນກາງຄົມມະນາຄົມການຂົນສົ່ງຂອງພາກພື້ນອາຊຽນໄປແລ້ວ
ໂດຍ: ລູກເມືອງພວນ
ນັບແຕ່ລາວມີເສັ້ນທາງລົດໄຟມານີ້, ປາກົດວ່າມີນັກລົງທຶນຕ່າງຊາດ ໄດ້ຕັ້ງບັນຫາ ຫຼື ມີທິດທີ່ຈະມາລົງທຶນຢູ່ລາວຫຼາຍຂຶ້ນ ເພາະ ນັກລົງທຶນເຫຼົ່ານັ້ນໄດ້ຊິຫຼິງເຫັນເງື່ອນໄຂການຂົນສົ່ງສິນຄ້າອອກສູ່ຕະຫຼາດອາຊີ, ເອີຣົບ ໂດຍຜ່ານເສັ້ນທາງລົດໄຟລາວ-ຈີນ ນັ້ນແມ່ນສະດວກສະບາຍ, ວ່ອງໄວ ປະຢັດເວລາ ແລະ ລາຄາການຂົນສົ່ງກໍຖືກກວ່າຫຼາຍເທົ່າ ເມື່ອທຽບໃສ່ການຂົນສົ່ງທາງລົດໂອໂຕ, ທາງເຮືອ ແລະ ທາງເຮືອບິນ.
ຂະນະນີ້ໄດ້ມີເກົາຫຼີໃຕ້ ໄດ້ຕັ້ງບັນຫາຈະມາລົງທຶນທຳການຜະລິດສິນຄ້າກະສິກຳຢູ່ລາວ, ໄທ ຈະເຮັດໃຫ້ຖະໜົນທຸກສາຍໃນໄທ ອ່ວາຍໜ້າມາສູ່ວຽງຈັນ ເພື່ອເອົາສິນຄ້າອອກໄປຕ່າງປະເທດໂດຍຜ່ານເສັ້ນທາງລົດໄຟລາວ-ຈີນຈະວ່ອງໄວ, ປະຢັດເວລາ ແລະ ຄ່າຂົນສົ່ງສິນຄ້າຈະຖືກກວ່າ. ສ່ວນກຳປູເຈຍກໍໄດ້ຕັ້ງຍັນຫາວ່າ ຈະຂົນສົ່ງຜະລິດຕະພັນຕັດຫຍິບ ຊຶ່ງເປັນສິນຄ້າສົ່ງອອກຕົ້ນຕໍຂອງກຳປູເຈຍ ໄປຕ່າງປະເທດ ກໍຈະມາຜ່ານເສັ້ນທາງລົດໄຟລາວ-ຈີນເຊັ່ນດຽວກັນ. ສະນັ້ນລາວເຮົາກໍຈະໄດ້ປຽບໃນການເກັບຄ່າທາງຜ່ານ ກັບບັນດາປະເທດທີ່ມາຜ່ານເສັນທາງລົດໄຟລາວ-ຈີນ. ສ່ວນຫວຽດນາມ ຍັງບໍ່ເປັນອັນທີ່ຈະແຈ້ງເທື່ອວ່າ ຈະມາຜ່ານລາວຫຼືບໍ່ ເພາະຫວຽດນາມກໍມີທາງລົດໄຟໄປທາງພາກເໜືອຂອງປະເທດອອກສູ່ຈີນແລ້ວ. ນອກຈາກນີ້ ມາເລເຊຍ, ສິງກະໂປ ກໍກຳລັງພິຈາລະນາວ່າ ຈະມາຜ່ານເສັ້ນທາງລົດໄຟລາວ-ຈີນ ເຊັ່ນດຽວກັນ.
ເຖິງຢ່າງໃດກໍດີຄິດວ່າ ບັນດາປະເທດໃນອາຊຽນ ຈະຕ້ອງໄດ້ຫັນໜ້າມາສູ່ເສັ້ນທາງລົດໄຟລາວ-ຈີນຫຼາຍຂຶ້ນ ເພື່ອສົ່ງອອກສິນຄ້າໄປຕ່າງປະເທດ. ເສັ້ນທາງລົດໄຟລາວ-ຈີນ ຈະກາຍເປັນເສັ້ນທາງຫຼັກ ຫຼື ເປັນເສັ້ນເລືອດໃຫ່ຍໃນການຂົນສົ່ງສິນຄ້າ, ການທ່ອງທ່ຽວຂອງຊາວພາກພື້ນອາຊີເວົ້າລວມ, ເວົ້າສະເພາະແມ່ນກຸ່ມພາກພື້ນອາຊຽນຢ່າງຫຼີກລ່ຽງບໍ່ໄດ້.
ຕາມແຫຼ່ງຂ່າວ CRI ໃຫ້ຮູ້ວ່າ ພາຍຫຼັງເປີດເສັ້ນທາງລົດໄຟລາວ-ຈີນ ເມື່ອໄລ່ມາເຖິງວັນທີ 15 ທັນວາ ນີ້ບໍ່ທັນຮອດເດືອນໄດ້ມີການຂົນສົ່ງສິນຄ້າຈາກຈີນເຂົ້າມາລາວມີມູນຄ່າຫຼາຍກວ່າ 100 ລ້ານຢວນແລ້ວ. ນີ້ຄືສັນຍານເຕືອນບອກວ່າ ໄດ້ປ່ຽນປະຫວັດສາດໜ້າໃໝ່ດ້ານຄົມມະນາຄົມ ການຂົນສົ່ງຂອງລາວ ແລະ ອາຊີຕາເວັນອອກສ່ຽງໃຕ້ ແບບພິກແຜ່ນດິນປີ້ນແຜ່ນຟ້າ ທີ່ບໍ່ເຄີຍມີມາກ່ອນ.
ຄວາມຫວັງຂອງຫຼາຍທ່ານໃນປະເທດ ແລະ ນັກທ່ອງທ່ຽວປະເທດອ້ອມຂ້າງ ສປປລາວ ຈະໄດ້ນັ່ງລົດໄຟ ໄປເຖິງເອີລົບ ເປັນສິ່ງທີ່ເປັນໄປໄດ້. ພວກເຮົາສາມາດເດີນທາງຈາກ ນະຄອນຫຼວງວຽງຈັນ ຂຶ້ນສູ່ ສປ.ຈີນ ປ່ຽນຂະບວນລົດໄຟທີ່ ດ່ານບໍ່ເຕນ-ບໍ່ຫານ ໄປຄຸນໝິງ ຕໍ່ຂະບວນລົດໄປສູ່ ນະຄອນຫຼວງປັກກິ່ງ ແລະ ໄປສູ່ນະຄອນຫຼວງ ອຸລານບາຕ້າ (ມົງໂກນ) -ອອກສູ່ ຮັດເຊຍ ມຸ່ງໜ້າໄປສູ່ ມ໋ອດສກູ -ເບີລິນ ເຢຍລະມັນ ແລະ ປາຣີ ປະເທດຝລັ່ງ .
ບັນດາປະເທດໃນອາຊຽນ ເຊັ່ນ : ໄທ-ກໍາປູເຈຍ-ມາເລເຊຍ-ສິງກະໂປ ແລະ ປະເທດໃກ້ຄຽງອື່ນໆ ກໍສາມາດມາເລີ່ມຂຶ້ນລົດໄຟທີ່ ນະຄອນຫຼວງວຽງຈັນ ເພື່ອເລີ່ມການເດີນທາງໄປທ່ອງທ່ຽວຮອບໂລກໄດ້ແລ້ວ.
ປັດຈຸບັນ ນະຄອນຫຼວງວຽງຈັນ ໄດ້ພັດທະນາພື້ນຖານໂຄງລ່າງຮອງຮັບການຂະຫຍາຍຕົວຂອງຕົວເມືອງ ແລະ ການຄົມມະນາຄົມເພື່ອການເປັນສູນກາງການຂົນສົ່ງທາງບົກຂອງພາກພື້ນອາຊຽນເປັນຮູບປະທໍາ ຊັດເຈນຂຶ້ນທຸກທີ.
ນອກຈາກນີ້, ການມີເສັ້ນທາງລົດໄຟ ຈະເຮັດໃຫ້ລາວເຮົາໄດ້ຮັບປະໂຫຍດຫຼາຍຢ່າງ ໃນການສ້າງສາພັດທະນາເສດຖະກິດ-ສັງຄົມ, ເຊັ່ນ:
1. ລາວຈະມີລາຍຮັບຈາກການເກັບຄ່າທາງຜ່ານ
2. ສິນຄ້າຂອງລາວສາມາດແຂ່ງຂັນລາຄາກັບຕ່າງປະເທດໄດ້ ເພາະຄ່າຂົນສົ່ງຖືກກວ່າ
3. ນັກລົງທຶນຈະເຂົ້າມາລົງທຶນ ຫຼື ຍ້າຍຖານການຜະລິດມາຢູ່ລາວຫຼາຍຂຶ້ນ.
4. ເປັນການກະຕຸ້ນການຜະລິດສິນຄ້າພາຍໃນປະເທດໃຫ້ເຂັ້ມແຂງກວ່າເກົ່າ
5. ນັກທ່ອງທ່ຽວຈະມາທ່ອງທ່ຽວລາວ ເພີ່ມຂຶ້ນ
6. ປະຊາຊົນລາວຈະມີວຽກເຮັດງານທຳ ຈຳກັດການຫຼັ່ງໄປອອກແຮງງານຢູ່ຕ່າງປະເທດ
7. ຄົນລາວຈະໄດ້ຮຽນຮູ້ສິ່ງແປກ ໃໝ່ ແລະ ເຊື່ອມໂຍງກັບຄວາມກ້າວໜ້າຂອງປະຊາຄົມໂລກ.
8. ລາວຈະກາຍເປັນສູນກາງຄົມມະນາຄົມໃນພາກພື້ນອາຊຽນ ເພາະເປັນເສັ້ນທາງທີ່ສັ່ນ ແລະ ສາມາດໄປໄດ້ທຸກທິດ: ເໜືອ-ໃຕ້, ຕາເວັນອອກ-ຕາເວັນຕົກ.
ທາງລົດໄຟລາວ-ຈີນ ຄືຄວາມພາກພູມໃຈຂອງຄົນລາວທັງຊາດ, ມັນເປັນການເປີດສັງກາດໃໝ່ໃຫ້ລາວພຸ່ງຂຶ້ນສູ່ຄວາມກ້າວໜ້າແຫ່ງຍຸກສະໄໝ, ໄຂມົນທິນທີ່ວ່າ ລາວເປັນປະເທດ ປິດ(land lock) ກາຍມາເປັນປະເທດເຊື່ອມຈອດ, ເຊື່ອມໂຍງ(land link), ເປັນສັນຍາລັກແຫ່ງສາມສາມັກຄີ, ມິດຕະພາບທີ່ຍິ່ງໃຫຍ່, ມູນມໍລະດົກສອງຊາດລາວ-ຈີນ.
