ສປປ ລາວ ຖະແຫລງຂ່າວເປີດປະເທດຕ້ອນຮັບນັກທ່ອງທ່ຽວສີຂຽວ3ໄລຍະ, ໄລຍະທີ1 ມີ17 ປະເທດ.
ວັນທີ17 ທັນວາ 2021 ທີ່ຫໍປະຊຸມແຫ່ງຊາດ, ນະຄອນຫລວງວຽງຈັນ ທ່ານ ນາງ ສວນສະຫວັນ ວິຍະເກດ, ລັດຖະມົນຕີກະຊວງຖະແຫຼງຂ່າວ, ວັດທະນະທໍາແລະ ທ່ອງທ່ຽວ ໄດ້ຖະແຫລງຂ່າວເປີດການຕ້ອນຮັບນັກທ່ອງທ່ຽວຈາກຕ່າງປະເທດເຂົ້າມາທ່ອງທ່ຽວໃນເຂດທ່ອງທ່ຽວສີຂຽວດັ່ງນີ້:
I ກໍານົດໄລຍະການເປີດຕ້ອນຮັບນັກທ່ອງທ່ຽວໄດ້ແບ່ງອອກເປັນ3 ໄລຍະຄື: 1. ໄລຍະທີ1: ເລີ່ມແຕ່ວັນທີ01 ມັງກອນຫາວັນທີ30 ມີນາ2022 2. ໄລຍະທີ2: ເລີ່ມແຕ່ວັນທີ01 ເມສາຫາວັນທີ30 ມິຖຸນາ2022 3. ໄລຍະທີ3: ເລີ່ມແຕ່ວັນທີ01 ກໍລະກົດ2022 ເປັນຕົ້ນໄປ.
ຄະນະຮັບຜິດຊອບຈະໄດ້ມີການຕິດຕາມ, ກວດກາການຈັດຕັ້ງປະຕິບັດວຽກງານດັ່ງກ່າວຢ່າງຕໍ່ເນື່ອງເພື່ອປະເມີນຜົນການເປີດການຕ້ອນຮັບນັກທ່ອງທ່ຽວຈາກຕ່າງປະເທດໃນເຂດທ່ອງທ່ຽວສີຂຽວໃນແຕ່ລະໄລຍະໃຫ້ສອດຄ່ອງກັບສະພາບຕົວຈິງແລ້ວລາຍງານລັດຖະບານພິຈາລະນາຕາມຄວາມເຫມາະສົມ.
II, ເປົ້າຫມາຍກຸ່ມນັກທ່ອງທ່ຽວເຂົ້າມາທ່ອງທ່ຽວເຂດທ່ອງທ່ຽວສີຂຽວສປປລາວໄລຍະທີ1 ລວມມີ17 ປະເທດຄື: ສປຈີນ, ສ.ສຫວຽດນາມ, ກໍາປູເຈຍ, ໄທ, ມາເລເຊຍ, ສິງກະໂປ, ສ. ເກົາຫຼີ, ຍີ່ປຸ່ນ,ຝຣັ່ງ, ອັງກິດ, ເຢຍລະມັນ, ໂຮນລັງ, ສະເປນ,ອີຕາລີ, ອາເມລິກາ, ການາດາແລະອົດສະຕຼາລີ.
III, ເງື່ອນໄຂຂອງນັກທ່ອງທ່ຽວທີ່ຈະເດີນທາງເຂົ້າມາທ່ອງທ່ຽວເຂດທ່ອງທ່ຽວສີຂຽວ
1. ຕ້ອງແມ່ນນັກທ່ອງທ່ຽວທີ່ມາເປັນຫມູ່ຄະນະ, ຜ່ານການບໍລິການຂອງບໍລິສັດທ່ອງທ່ຽວຕາມລາຍການທີ່ໄດ້ກໍານົດໃນຂອບເຂດທ່ອງທ່ຽວສີຂຽວ. ຫ້າມບໍ່ໃຫ້ນໍາເຂົ້ານັກທ່ອງທ່ຽວແບບກະແຈກກະຈາຍໂດຍບໍ່ຜ່ານການບໍລິການຂອງບໍລິສັດທ່ອງທ່ຽວໂດຍທີ່ບໍ່ໄດ້ຮັບອະນຸຍາດຈາກຄະນະສະເພາະກິດ;
2. ນັກທ່ອງທ່ຽວທີ່ມີຈຸດປະສົງເຂົ້າມາທ່ອງທ່ຽວຢູ່ສປປລາວຕ້ອງໄດ້ຮັບວັກຊີນຄົບໂດສຫຼາຍກວ່າ14ວັນຂຶ້ນໄປ, ມີປະກັນໄພຊີວິດ, ມີຢັ້ງຢືນການກວດຫາເຊື້ອດ້ວຍລະບົບRT- PCR ທີ່ມີຜົນເປັນລົບ (ບໍ່ມີເຊື້ອ) ບໍ່ເກີນ72 ຊົ່ວໂມງກ່ອນວັນເດີນທາງ, ເມື່ອມາເຖິງສປປລາວຕ້ອງໄດ້ຮັບກວດຫາເຊື້ອໂຄວິດ-19 ຢູ່ຕາມດ່ານສາກົນເຂົ້າ-ອອກແລະຈໍາກັດບໍລິເວນ01 ວັນຫຼື24ຊົ່ວໂມງເພື່ອລໍຖ້າຜົນກວດ. ເມື່ອຜົນກວດເປັນລົບສາມາດເດີນທາງທ່ອງທ່ຽວຕາມລາຍການໄດ້;
3. ກ່ອນເດີນທາງມາເຖິງສປປລາວນັກທ່ອງທ່ຽວຕ້ອງດາວໂຫຼດແອບLaoStaySafeເພື່ອລົງທະບຽນແລະແຈ້ງຂໍ້ມູນການສັກວັກຊີນຄົບໂດສແລະການກວດກາໂຄວິດກ່ອນ72 ຊົ່ວໂມງເຂົ້າມາທ່ອງທ່ຽວສປປລາວ;
4. ນັກທ່ອງທ່ຽວຕ້ອງຊື້ປະກັນໄພສຸຂະພາບທີ່ມີວົງເງິນຄ້ໍາປະກັນຢ່າງຕໍ່າ50.000 USD.
IV. ຂອບເຂດທ່ອງທ່ຽວສີຂຽວໄດ້ກໍານົດອອກເປັນ2 ປະເພດຄື:
1. ເຂດທ່ອງທ່ຽວສີຂຽວ (Green Travel Zone) 2. ເສັ້ນທາງທ່ອງທ່ຽວສີຂຽວ (Green Travel Trail) • ກໍານົດເປີດເຂດທ່ອງທ່ຽວສີຂຽວໃນໄລຍະທີ1 ມີ3 ເຂດດັ່ງນີ້:
1. ນະຄອນຫຼວງວຽງຈັນ;
2. ນະຄອນຫຼວງພະບາງແລະເມືອງຕ່າງໆຂອງແຂວງຫຼວງພະບາງ;
3. ເມືອງວັງວຽງ, ແຂວງວຽງຈັນ
• ສໍາລັບເສັ້ນທາງທ່ອງທ່ຽວສີຂຽວແມ່ນໄດ້ກໍານົດຢູ່5 ແຂວງດັ່ງນີ້: ແຂວງອຸດົມໄຊ, ແຂວງໄຊຍະບູລີ, ແຂວງຊຽງຂວາງ, ແຂວງຄໍາມ່ວນແລະແຂວງຈໍາປາສັກ.
• ກໍານົດເປີດເຂດທ່ອງທ່ຽວສີຂຽວໃນໄລຍະທີ2 ມີ9 ເເຂວງດັ່ງນີ້:
1. ນະຄອນຫຼວງວຽງຈັນ, 2. ແຂວງວຽງຈັນ, 3. ແຂວງຫຼວງພະບາງ, 4. ແຂວງອຸດົມໄຊ, 5. ແຂວງໄຊຍະບູລີ, 6. ແຂວງຊຽງຂວາງ, 7. ແຂວງຄໍາມ່ວນ, 8. ແຂວງສະຫວັນນະເຂດ, 9. ແຂວງຈໍາປາສັກ
• ສໍາລັບເສັ້ນທາງທ່ອງທ່ຽວສີຂຽວໃນໄລຍະ2 ແມ່ນໄດ້ກໍານົດຢູ່4 ແຂວງດັ່ງນີ້ :ເມືອງຫ້ວຍຊາຍແຂວງບໍ່ແກ້ວ, ແຂວງຫຼວງນ້ໍາທາ, ແຂວງເຊກອງແລະແຂວງສາລະວັນ.
VII, ຂັ້ນຕອນການນໍາເຂົ້ານັກທ່ອງທ່ຽວທີ່ມາໃນເຂດທ່ອງທ່ຽວສີຂຽວ:
1. ບໍລິສັດທ່ອງທ່ຽວຢູ່ສປປລາວກຽມສໍານວນເອກະສານຂໍອະນຸຍາດຊຶ່ງປະກອບມີ: ຫນັງສືສະເຫນີຂອງບໍລິສັດ, ລາຍການທ່ອງທ່ຽວ, ສໍາເນົາຫນັງສືເດີນທາງ, ໃບຈອງໂຮງແຮມ, ສໍາເນົາໃບຢັ້ງຢືນສັກວັກຊີນແລະສໍາເນົາເອກະສານປະກັນໄພ;
2. ຍື່ນສໍານວນເອກະສານທັງຫມົດເຖິງກົມຄຸ້ມຄອງການທ່ອງທ່ຽວ,ກະຊວງຖະແຫຼງຂ່າວ, ວັດທະນະທໍາແລະທ່ອງທ່ຽວຫລັງຈາກກົມຄຸ້ມຄອງການທ່ອງທ່ຽວກວດກາເອກະສານຄົບຖ້ວນແລ້ວສົ່ງໃຫ້ກົມຕໍາຫຼວດກວດຄົນເຂົ້າ-ອອກເມືອງເພື່ອອອກອະນຸມັດການນໍາເຂົ້ານັກທ່ອງທ່ຽວ;
3. ບໍລິສັດ ແລະ ຜູ້ປະກອບການທີ່ຈະເຂົ້າຮ່ວມໃນໂຄງການເຂດທ່ອງທ່ຽວສີຂຽວແລະເສັ້ນທາງທອງທ່ຽວສີຂຽວໃຫ້ລົງທະບຽນແລະສົ່ງລາຍຊື່ໃຫ້ສະພາການຄ້າແລະອຸດສະຫະກໍາແຫ່ງຊາດລາວ.
ທີ່ກ່າວມານັ້ນແມ່ນແຜນການ ແລະ ເງື່ອນໄຂໂດຍລວມທັງຫມົດສ່ວນຄໍາແນະນໍາອື່ນໆທີ່ກ່ຽວຂ້ອງແມ່ນຈະໄດ້ອອກແຈ້ງການເປັນແຕ່ລະໄລຍະຕື່ມ.
